ތައުލީމީ ދާއިރާ އާއި ސިއްހީ ދާއިރާގެ އޯޓީގެ ވާހަކަ ސިޔާސީކޮށްގެން ދައްކާ ނަމަ އެ ވާހަކަ ދައްކާނީކީ މިއަދަކު ނޫން - އަމީން
30 ޖޫން 2025 | ހޯމަ 12:59ގަރާރު ސިޔާސީ ކުރުމަކީ ހިތާމަކުރައްވާ ކަމެއް ކަމަށް ވެސް އަމީން ވިދާޅުވި
ރައްޔިތުން މަޖިލީހުގެ ކަނޑިތީމު ދާއިރާގެ މެންބަރު އަމީން ފައިސަލް
ތަޢުލީމީ ދާއިރާގެ މަސައްކަތްތެރިންނާއި ޞިއްޙީ މަސައްކަތްތެރިން އިތުރުގަޑީގައި ކުރާ މަސައްކަތަށް ފައިސާ ދޭ އުސޫލުތަކާއި މެދު ސިޔާސީކޮށްގެން ދައްކާ ނަމަ އެ ވާހަކަ ދައްކާވާނީ މިއަދަކު ނޫން ކަމަށް ރައްޔިތުންގެ މަޖިލީހުގެ ކަނޑިތީމު ދާއިރާގެ މެންބަރު އަމީން ފައިޞަލް ވިދާޅުވެއްޖެއެވެ.
ކަނޑިތީމު ދާއިރާގެ މެންބަރު އަމީން ފައިޞަލް ހުށަހަޅުއްވާ ފައިވާ، ތަޢުލީމީ ދާއިރާގެ މަސައްކަތްތެރިންނާއި ޞިއްޙީ މަސައްކަތްތެރިން އިތުރުގަޑީގައި ކުރާ މަސައްކަތަށް ފައިސާ ދޭ އުސޫލުތަކާއި ޢަދުލުވެރި މަސައްކަތު މާހައުލެއް ގާއިމުކުރުމާއި މެދު ރައްޔިތުންގެ މަޖިލީހުގެ މެންބަރުން ދެކެވަޑައިގަންނަވާ ގޮތެއް ބެލުމަށް ހުށަހަޅުއްވާފައިވާ ގަރާރެކެވެ.
އެ ގަރާރު ހުށަހަޅުއްވާފައި ވަނީ ސިޔާސީ ބޭނުމަކަށް ކަމަށް ބާރަށު ދާއިރާގެ މެމްބަރު އިބްރާޙިމް ޝުޖާއު ވިދާޅުވުމުން އެކަމަށް އަމީން ވަނީ ރައްދު ދެއްވާފައެވެ. އަމީން ވިދާޅުވީ ސިޔާސީކޮށްގެން އެ ވާހަކަ ދައްކާ ނަމަ ދައްކާނީ އޭނާގެ ދައުރަށް އަހަރެއް ފުރުނު ފަހުން ނޫން ކަމަށެވެ.
އެ ގަރާރުގެ ބަހުސް ނިންމާލަން ވާހަކަދައްކަވަމުން އެ ގަރާރު ސިޔާސީ ކުރުމަކީ ހިތާމަކުރައްވާ ކަމެއް ކަމަށް ވެސް އަމީން ވިދާޅުވިއެވެ. އޭނާ ވިދާޅުވީ މި މައްސަލަ އަކީ އޭނާ އަމިއްލަފުޅަށް ވެސް ތަޖުރިބާ ކުރައްވާފައިވާ މައްސަލަ އެއް ވާހަކަ ކަމަށެވެ. އަދި ތައުލީމީ ދާއިރާ އާއި ސިއްހީ ދާއިރާ ސިޔާސީ ކުރާހާ ހިނދަކު އެ ދާއިރާ ރަނގަޅު ނުވާނެ ކަމަށް ވެސް އަމީން ވަނީ ވިދާޅުވެފައެވެ.
"މި މައްސަލަ ހުށަހެޅީ ދެ ޤާނޫނަށް ބަލާ އިރު ޤާނޫނީ ފުށު އެރުންތަކެއް އެބަ ހުރި. މިކަމަށް ހައްލެއް ގެނެވޭނީ މިތަނުން. އަޅުގަނޑު މި ދަންނަވަނީ އޯޓީ ލިމިޓް ކަނޑާލާށެކޭ ވެސް ނޫން." އޭނާ ވިދާޅުވިއެވެ.
މި މައްސަލަ އަށް ހައްލެއް ހޯދާދިނުމަކީ އެ ދެ ދާއިރާގެ މަސައްކަތްތެރިންނަށް ލިބޭނެ ފަހިކަމަކަށް ވާނެ ކަމަށް އޭނާ ވިދާޅުވިއެވެ. އަދި ޤާނޫނުގައި ބުނާ މިންވަރަށް ވުރެ އިތުރަށް އިތުރު ގަޑީގައި މަސައްކަތް ކުރުވައިގެން ނުވާނެ ކަމަށް ބުނި ނަމަވެސް މުދައްރިސުންނާއި ސިއްހީ މަސައްކަތްތެރިންގެ މަސައްކަތް ބައްޓަން ވެފައި ވަނީ އެގޮތަށް ނޫން ކަމަށް އޭނާ ވިދާޅުވިއެވެ.
