އެންސިސްގެ ގުދަނުގައި ރޯވި އަލިފާންގަނޑު ކޮންޓްރޯލް ކުރުމުގެ މަސައްކަތުގައި އުޅުނު ތިން ފުލުހަކަށް ފަރުވާ ދެނީ
އެ ފުލުހުންގެ ހާލު މިހާރު ދަނީ ރަނގަޅުވަމުން
އެންސިސްގެ ގުދަނުގައި ރޯވުން - 10.07.2025
އެންސިސްގެ ގުދަނުގައި ރޯވި އަލިފާންގަނޑު ކޮންޓްރޯލް ކުރުމުގެ މަސައްކަތުގައި އުޅުނު ތިން ފުލުހަކަށް ހޮސްޕިޓަލްގައި ފަރުވާ ދޭން ފަށައިފިއެވެ.
ހުކުރު ދުވަހު ފުލުހުން ބުނީ، ބުރާސްފަތި ދުވަހުގެ ރޭ ހުޅުމާލޭގައި ހިނގި އަލިފާނުގެ ހާދިސާ ކޮންޓްރޯލް ކުރުމަށް މަސައްކަތް ކުރުމުގެ ތެރޭގައި ދުމުގެ އަސަރުކޮށްގެން ހުޅުމާލޭގައި މަސައްކަތް ކުރާ ތިން ފުލުހަކަށް ބުރާސްފަތި ދުވަހުގެ ރެއިން ފެށިގެން ހޮސްޕިޓަލްގައި އެޑްމިޓް ކޮށްގެން ފަރުވާ ދެމުންދާ ކަމަށެވެ.
އެ ފުލުހުންގެ ހާލު މިހާރު ރަނގަޅުވަމުންދާ ކަމަށް ވެސް ފުލުހުން ބުނެއެވެ.
މި ހާދިސާގެ މައުލޫމާތު ރިޕޯޓު ކޮށްފައިވަނީ ބުރާސްފަތި ދުވަހުގެ ރޭ 18:48 ހާއިރު އެވެ. މި ހާދިސާގައި ރޯވީ އެ ގުދަނުގެ ހަތަރުވަނަ ފަންގިފިލާގައެވެ. އަދި އަލިފާންގަނޑު ކޮންޓްރޯލް ކުރެވިފައިވަނީ ގަޑިއިރުތަކެއް ފަހުންނެވެ.
މި އަލިފާނުގެ ހާދިސާ ހިނގަން މެދުވެރިވި ސަބަބު ސާފެއް ނުވެއެވެ. އަދި ލިބުނު ގެއްލުންތަކުގެ މައުލޫމާތުވެސް ނުލިބެއެވެ.
