ރެސްޓޯރަންޓް ހިންގަން ކުއްޔަށް ނެގި އިމާރާތުގެ ކުލީގެ ގޮތުގައި ނުދައްކާ ހުރި 8 ލައްކައަށްވުރެ ގިނަ ރުފިޔާ ދައްކަން އާރުޑީސީގެ ޑީއެމްޑީ މުހައްމަދު ނަބީހު އަފީފު އާއި އިތުރު މީހެއްގެ މައްޗަށް ހުކުމްކޮށްފިއެވެ.

މި މައްސަލައަކީ މ. ވެސްޓް އެންޑް ލޮޖް ކިޔާ ގޯތީގައިވާ އިމާރާތުގެ ތިންވަނަ ފަންގިފިލާގައި ހަދާފައިވާ ކެފޭ ކުއްޔަށް ދިނުމާއި ގުޅޭގޮތުން ޑީ ބްލޫ ޕްރައިވެޓް ލިމިޓެޑް އާއި މުހައްމަދު ނަބީހު އަފީފު އަދި އިސްހާގު މުހައްމަދު އާއި ދެމެދުވެފައިވާ އެއްބަސްވުމުގެ ދަށުން 2021 ވަނަ އަހަރުގެ ޑިސެމްބަރު މަހުގެ 1 ވަނަ ދުވަހުން ފެށިގެން 2024 ވަނަ އަހަރުގެ މެއި މަހުގެ 31 ވަނަ ދުވަހުގެ ނިޔަލަށް ކުލީގެ ގޮތުގައި ދައްކަންޖެހި ނުދައްކާ ހުރި 880،000 ރުފިޔާއާއި ޝަރީއަތުގެ ހަރަދު އަދި ގާނޫނޫ ވަކީލުގެ ފީގެ ގޮތުގައި 15000 ރުފިޔާއާއެކު ޖުމްލަ 895،000 ރުފިޔާ އެއްފަހަރާ ދެއްކުމަށް ނަބީހު އަދި އިސްހާގުގެ މައްޗަށް އަމުރުކޮށްދިނުމަށް އެދި ޑީ ބްލޫގެ ފަރާތުން ސިވިލް ކޯޓަށް ހުށަހެޅި މައްސަލައެކެވެ.

ސިވިލް ކޯޓުގެ ހުކުމުގައި ބުނެފައިވަނީ މި ދެމީހުންނަށް މައްސަލައިގެ ލިޔެކިޔުންތައް ލިބުނު ނަމަވެސް، ދިފާއެއް ހުށަހަޅާފައި ނުވާ ކަމަށެވެ.

މި މައްސަލައިގެ ހުކުމުގައި ބުނެފައިވަނީ ޑީ ބުލޫގެ ފަރާތުން މުހައްމަދު ނަބީހު އަފީފު އަދި އިސްހާގު މުހައްމަދުގެ މައްޗަށް ދައުވާކުރާ ބިމާއި އިމާރާތް ކުއްޔަށް ދިނުމާބެހޭ މައްސަލައަށް ބަލާއިރު، ޑީ ބްލޫ އާއި ނަބީހު އަދި އިސްހާގާއި ދެމެދު މ. ވެސްޓް އެންޑް ލޮޖް ކިޔާ ގޯތީގައިވާ އިމާރާތުގެ ތިންވަނަ ފަންގިފިލާގައި ހަދާފައިވާ ކެފޭ ކުއްޔަށް ދިނުމާއި ގުޅޭގޮތުންވެފައިވާ އެއްބަސްވުމުގެ ދަށުން 2021 ވަނ ައަހަރުގެ ޑިސެމްބަރު މަހުގެ 1 ވަނަ ދުވަހުން ފެށިގެން 2024 ވަނަ އަހަރު މެއި މަހުގެ 31 ވަނަ ދުވަހުގެ ނިޔަލަށް ކުލީގެގޮތުގައި ދައްކަންޖެހި ނުދައްކާ ހުރި 880،000 ރުފިޔާ އާއި ޝަރީއަތުގެ ހަރަދުގެ ގޮތުގައި މި މައްސަލައިގައި ނަގައިދިނުމަށް ކަނޑައަޅާފައިވާ 15000 ރުފިޔާއާ އެކު ޖުމްލަ 895،000 ރުފިޔާ އަކީ ދައުވާ ލިބޭ ނަބީހު އަދި އިސްހާގުގެ ފަރާތުން ދައުވާކުރާ ޑީބްލޫ ޕްރައިވެޓް ލިމިޓެޑަށް ދައްކަންޖެހޭ ފައިސާއެއް ކަމަށް ކަނޑައަޅާ ކަމަށެވެ.

އަދި މި ފައިސާ ޑީ ބްލޫއަށް ލިބިދިނުމުގެ ގޮތުން، 2025 ވަނަ އަހަރުގެ ޖުލައި މަހުގެ 7 ވަނަ ދުވަހުން ފެށިގެން 14 ދުވަހުގެ ތެރޭގައި މި ފައިސާ ސިވިލް ކޯޓަށް ދެއްކުމުގެ ގޮތުން، އެ ފައިސާ 2025 ވަނަ އަހަރުގެ ޖުލައި މަހުގެ 22 ވަނަ ދުވަހުގެ ނިޔަލަށް ދައްކާ ހަލާސްކުރުމަށް، ނަބީހު އަދި އިސްހާގުއަށް އަންގައި، ޣައިރު ހާޒިރުގައި ވަނީ ހުކުމްކޮށްފައެވެ.