ރިޔާސީ ވައުދު ބޮލާލާ ޖަހާ، މާފަރުގެ އިހުތިސާސްއިން ފަރުމުލި ވަކިކޮށްފި
ފަރުމުލި އަލުން މާފަރުގެ އިހުތިސާސްގައި ހިމެނުމަށް ރިޔާސީ އިންތިޚާބުގެ ދުވަސްވަރު ރައިސް ވައުދުވެވަޑައިގަތް
ރައީސުލްޖުމްހޫރިއްޔާ ޑރ. މުހައްމަދު މުއިއްޒު
މިދިޔަ އަހަރު ނ. މާފަރުގެ ބައެއްގެ ގޮތުގައި ރައީސުލްޖުމްހޫރިއްޔާ މުހައްމަދު މުއިއްޒު ކަނޑައަޅުއްވާފައިވާ ފަރުމުލި އަކީ މާފަރުގެ ބައެއް ނޫން ކަމަށް އަނެއްކާވެސް ކަނޑައަޅުއްވައިފިއެވެ.
އެގޮތަށް ރައީސް ނިންމަވާފައި ވަނީ އާދިއްތަ ދުވަހު އެވެ. ރައީސް އާދިއްތަ ދުވެހު ނެރުއްވި ޤަރާރެއްގައި، މާފަރުގެ އިހުތިސާސްއިން ފަރުމުލި ވަކިކުރުމަށް ފަހު ނިންމަވާފައި ވަނީ އެ ތަނަކީ ޓޫރިޒަމްގެ ބޭނުމަށް ތަރައްގީ ކުރެވޭ ރަށެއްގެ ގޮތުގައި ކަނޑައެޅުމަށެވެ.
މާފަރުގެ ބައެއްގެ ގޮތުގައި އޮތް ފަރުމުލި އަދި ކަނޑިންމާހުރާ އަކީ މީގެ ކުރިން ވެސް މާފަރުގެ ބައެއްގެ ގޮތުގައި ހިމަނާފައި އޮތް ދެރަށެވެ. ނަމަވެސް 2020 ވަނަ އަހަރު އެ ދެ ރަށުގެ އިތުރުން، މާފަރު ފަޅުގެ 80 ހެކްޓަރު އެ ރަށުގެ އިހުތިސާސްއިން ވަނީ އުނިކޮށްފައެވެ.
އެ ދެ ތަން އަލުން މާފަރުގެ އިހުތިސާސްގައި ހިމެނުމަށް ރިޔާސީ އިންތިޚާބުގެ ދުވަސްވަރު ރައިސް ވައުދުވެވަޑައިގަތެވެ. މިދިޔަ އަހަރުގެ އޭޕްރިލް 15 ގައި ރައީސް މުއިއްޒު ވަނީ ކަނޑިންމާހުރާ އާއި ފަރުމުއްޔަކީ މާފަރުގެ ބައެއްގެ ގޮތުގައި ހަމަޖައްސަވާދެއްވާފައެވެ. އެ ނިންމުން ރައީސް ބަދަލުކުރެއްވީ އެ މަނިކުފާނުގެ ރިޔާސީ ވައުދާއި ޚިލާފަށެވެ.
