މައި އެއަރޕޯޓުގެ ތަންތަން ބޭރުގެ ފަރާތްތަކަށް ދޭތީ ހުށަހެޅި ކުއްލި މައްސަލަ ބަލަ އެއް ނުގަތް
7 ޖުލައި 2025 | ހޯމަ 06:05އަބްދުއްރަހީމް ވިދާޅުވީ އެ މައްސަލަ ހުށަހަޅަން ފުރުސަތު ނުދެނީ އެއީ ހަގީގަތާއި އެއްގޮތަށް ހުށަހަޅާފައިވާ ކުއްލި މައްސަލަ އަކަށް ނުވާތީ ކަމަށް
ވައިކަރަދޫ ދާއިރާގެ މެމްބަރު ހުސައިން ޒިޔާދު
ދިވެހިރާއްޖޭގެ އެންމެބޮޑު އެއަރޕޯޓް (ވީއައިއޭ)ގެ މުހިންމު ތަންތަން ބޭރުގެ ފަރާތްތަކަށް ދޫކޮށްލުމަށް މަސައްކަތްކުރަމުންދާތީ އެ މައްސަލަ ސަރުކާރުގެ ސަމާލުކަމަށް ގެނައުމަށް ހުށަހަޅާފައިވާ ކުއްލި މައްސަލަ މަޖިލީހަށް ހުށަހެޅުމަށް ފުރުސަތު ނުދީ ކުއްލި މައްސަލަ ބޭރުކޮށްލައިފިއެވެ.
ހޯމަ ދުވަހު މަޖިލީހުގެ ރިޔާސަތު ބަލަހައްޓަވަން އިންނެވި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވަނީ މި މައްސަލަ ހުށަހަޅަން ފުރުސަތު ދެވެން ނެތް ކަމަށް ފާހަގަކުރައްވާފައެެވެ. އަބްދުއްރަހީމް ވިދާޅުވީ އެ މައްސަލަ ހުށަހަޅަން ފުރުސަތު ނުދެނީ އެއީ ހަގީގަތާއި އެއްގޮތަށް ހުށަހަޅާފައިވާ ކުއްލި މައްސަލަ އަކަށް ނުވާތީ ކަމަށެވެ.
ޒިޔާދު ހުށަހެޅުއްވި ކުއްލި މައްސަލައިގައި ވިދާޅުވެފައި ވަނީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވެރިކަމަށް ވަޑައިގެންފައިވަނީ، ދިވެހިރާއްޖެއަކީ ބޭރުގެ ނުފޫޒުތަކުން އެއްކިބާވެފައިވާ، ދިވެހިންނަށް ފަހި، "ދިވެހީންގެ ރާއްޖެ" އެއް ބިނާކުރުމުގެ ރިޔާސީ ވައުދާއެކު، ދިވެހިންނަށް ކުރެވޭ ހުރިހާ މަސައްކަތެއް ބޭރުގެ އެއްވެސް ބަޔަކަށް ނުދޭނެކަމާއި، ދިވެހިރާއްޖޭގެ އަގުބޮޑު މުދަލާއި ވަސީލަތްތައް ބޭރުގެ ފަރާތްތަކަށް ދިނުމަކީ ގައުމަށް ހިޔާނާތްތެރިވުންކަމަށް ވިދާޅުވުން ކަމަށެވެ.
މީގެ އިތުރުން ވެރިކަމަށް ހުވައިކުރެއްވިފަހުން ވެސް، މި ސަރުކާރުގެ އެންމެހައި ނިންމުންތަކެއްގައި އަބަދުމެ އިސްކަން ދޭނީ، ގައުމިއްޔަތު ކުރިއެރުވުމަށާއި، "މޯލްޑިވްސް ފަސްޓް" ޕޮލިސީގެ ދަށުން މަސައްކަތްކުރުމުގެ މައްޗަށްކަމަށް ތަކުރާރުކޮށް ވަކާލާތުކުރަމުން އައިސްފައިވާ ކަމަށް ވެސް އޭނާ ވަނީ ވިދާޅުވެފައެވެ.
ހަމައެހެންމެ، ދިވެހިރާއްޖޭގެ އެންމެބޮޑު އަދި އެންމެ މުހިންމު އެއަރޕޯޓް ކަމުގައިވާ ވެލާނާ އިންޓަރނޭޝަނަލް އެއާޕޯޓުގައި އަލަށް ތަރައްގީކުރި ތަންތަނުގެ ތެރެއިން، ސީ.އައި.ޕީ ޓާމިނަލް ހިންގުމަށާއި، ރާއްޖެއަށް އަންނަ ޖެޓުތަކުގެ ގްރައުންޑް ހެންޑްލިންގ އާއި، ތެޔޮ ވިއްކުމާއި މިނޫނަސް އެކަމާގުޅޭ އެންމެހައި ހިދުމަތްތައް ދިނުމަށް، ދެންނެވުނު ޓާމިނަލް ދުބާއީގެ ޖެޓެކްސް ނަމަކަށް ކިޔާ ކުންފުންޏައް 25 އަހަރު ދުވަހަށް ދިނުމަށްޓަކައި، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމް.އޭ.ސީ.އެލް) އިން މަސައްކަތް ކުރަމުންދާ ކަމަށް ޚަބަރުތައް ލިބެމުންދާ ކަމަށް އެ މައްސަލައިގައި ވަނީ ފާހަގަކުރައްވާފައެވެ.
އެ މައްސަލަ އާއި މެދު ފާހަގަކުރެވޭ ފުރަތަމަ ކަމަކީ، ބޭރުގެ ބަޔަކަށް މިފަދަ މުހިންމު ތަނެއް ދޫކޮށްލާންވާނީ، އެކަމަށް ބޭނުންވާ އިންފްރާސްޓްރަކްޗަރ އަދި އެހެނިހެން ވަސީލަތްތައް ޤާއިމުކުރެވޭނެ ފެންވަރު ސަރުކާރުގައި ނެތް ހާލަތެއްގައި، އަމިއްލަ ފައިސާ އިންވެސްޓްކޮށްގެން އެފަދަ ވަސީލަތްތައް ޤާއިމުކުރާނެ ބަޔަކަށްކަމަށް އެ މައްސަލައިގައި ވަނީ ބުނެފައެވެ. އަދި މިކަމުގައި، އެތަން އިމާރާތްކުރާކަށް ނުޖެހޭކަމާއި، އެތަނަކީ ހަދައި ނިމިފައި ހުރި ތަނެއް ކަމުން، ބޭރު ބައެއްގެ އިންވެސްޓްމަންޓެއް ބޭނުން ނުވާކަން އެނގުން ކަމަށް އޭނާ ވިދާޅުވިއެވެ.
"ދެވަނަ ކަމަކީ، ބޭރުގެ ބަޔަކަށް މިފަދަ ހިދުމަތެއް ދިނުމަށް ޓަކައި ދޫކޮށްލާންވާނީ، އެކަން ކުރުމުގެ ޤާބިލުކަން ދިވެހި ކުންފުނިތަކުގެ ނުވަތަ ދިވެހިންގެ ކިބައިގައި ނެތް ހާލަތެއްގައި ނުވަތަ ދިވެހިންނަށް ނުކުރެވޭނެ ވަރުގެ މަސައްކަތަކަށް ވާ ހާލަތުގައި ކަމާއި، މިތަން ހިންގުމަށް ދިވެހިން ތިބީ ތައްޔާރުވެފަކަމާއި، މިހާރުވެސް އެ ހިދުމަތްތައް ދެމުން ގެންދަނީ ހުނަރުވެރި ދިވެހިންކަމުން، އެކަން ކުރާކަށް ބޭރު ބަޔަކު ގެންނަން ނުޖެހޭކަން އެނގޭހިނދު؛ މިކަން މި ގޮތަށް ކުރަނީ، މޯލްޑިވްސް އެއަރޕޯޓްސް ކޮމްޕެނީ ލިމިޓެޑްގެ ނުވަތަ ސަރުކާރުގެ ކޮންމެވެސް ބަޔަކު މިކަމުން ނާޖައިޒް މަންފާތަކެއް ހޯދުމަށް ކަމަށް ބެލެވޭ" މައްސަލައިގައި ވަނީ ބުނެފައެވެ.
އެކަމުގެ ސަބަބުން ލިބޭނެ 3 ގެއްލުމެއް ޒިޔާދު ވަނީ ފާހަގަކުރައްވާފައެވެ. އޭގެ ތެރޭގައި ހިމެނެނީ:
ގައުމީ ސަލާމަތައް ނުރައްކާވުން:
ދިވެހިރާއްޖޭގެ އެންމެބޮޑު އަދި އެންމެ މުހިންމު އެއަރޕޯޓްގެ މި ފަދަ މުހިންމު ތަނެއް ބޭރުގެ ބަޔަކަށް ދޫކޮށްލުމުން، ދިވެހިރާއްޖެއަށް ދަތުރުކުރާ ޖެޓްތަކާއި އޭގައި ރާއްޖެއަށް އެތެރެވާ ކަމަށް އެ މައްސަލައިގައި ވަނީ ބުނެފައެވެ. އެގޮތުން، ރާއްޖެއިން ބޭރުވާ މީހުންނާއި އެމީހުން އުފުލާތަކެތި ބެލޭނޭ ފުރުސަތު ހަނިވުމާއި، ޕްރައިވެޓް ޖެޓްގައި ރާއްޖެއަށް ޒިޔާރަތްކުރާ މީހުންގެ މައުލޫމާތު ބޭރު ބައެއްގެ އަތުގައި ހުރުމުގެ ސަބަބުން، ސެކިއުރިޓީ ގޮތުން ކޮންމެފަދަ ކަމެއްވެސް ހިނގުމުގެ ޖާގަ އޮންނާނެކަން އޭނާ ފާހަގަކުރެއްވިއެވެ.
ދައުލަތުގެ އާމްދަނީއަށް އަސަރުކުރުން:
އެ ޓާމިނަލް ބޭރުގެ ކުންފުންޏަކާ ހަވާލުކުރުމުގެ ނަތީޖާއަކަށްވެގެންދާނީ، މޯލްޑިވްސް އެއަރޕޯޓްސް ކޮމްޕެނީ ލިމިޓެޑުން އެތަން ހިންގައިގެން މިހާރު ލިބޭ އާމްދަނީ އަދި މުޅި އެއަރޕޯޓް ބޭނުންކުރަން ފެށުމުން ހިދުމަތްތައް ފުޅާވެ، އެތައް ގުނައަކަށް އިތުރުވެގެންދާނެ ކަމަށް އަންދާޒާކުރެވޭ އާމްދަނީ، އެ ކުންފުންޏަށް ނުލިބުމުގެ ސަބަބުން، އެ އަދަދު ދައުލަތަށް ނުލިބުންކަމަށް ޒިޔާދު ވަނީ ވިދާޅުވެފައެވެ.
ޒިޔާދު ފާހަގަކުރައްވާފައިވާ ގޮތުގައި ފާއިތުވި އަހަރުގެ ހިސާބުތަކަށް ބަލައިގެން އަންދާޒާކުރާނަމަ، މަދުވެގެން 7 މިލިއަން ޑޮލަރު އެމް.އޭ.ސީ.އެލް އަށް ގެއްލޭނެއެވެ. އެއީ، ނިމިދިޔަ އަހަރު މަދުވެގެން 12 މިލިއަން ޑަލަރު ދައްކާފައިވާއިރު ޖެޓެކްސް ހުށަހަޅަނީ އެންމެ 5 މިލިއަން ޑޮލަރު އެމް.އޭ.ސީ.އެލް.އަށް ދިނުމަށް ކަމަށް ވާތީ ކަމަށް ޒިޔަދު ވިދާޅުވިއެވެ.
ރާއްޖެއިން ބޭރުވާ ޑޮލަރުގެ އަދަދު އިތުރުވުމުން ޑޮލަރުގެ ދަތިކަން އިތުރުވުން:
އެ ޓާމިނަލް ހިންގައިގެން މޯލްޑިވްސް އެއަރޕޯޓްސް ކޮމްޕެނީ ލިމިޓެޑަށް ޑޮލަރުން ލިބޭ އާމްދަނީ މިހާރު ރާއްޖޭގައި ހިފެހެއްޓޭކަމާއި، އެއިން ބޮޑު ބައެއް ސީދާ ދައުލަތަށް އަދި ރާއްޖޭގެ މާލީ ނިޒާމުގެ ތެރެއަށް ވަންނަ ކަމަށް އޭނާ ވިދާޅުވިއެވެ. އެހެން ނަމަވެސް އެތަން ބޭރުގެ ކުންފުންޏަކަށް ދޫކޮށްލުމުން އެތަނަށް ލިބޭ ޑޮލަރުގެ ބޮޑު އަދަދެއް އެ ކުންފުނިން ކޮންމެ މަހަކު ރާއްޖެއިން ބޭރުކުރުމުގެ ނަތީޖާއަކަށްވެގެންދާނީ، މިހާރު ރާއްޖެއަށް ލިބެމުންދިޔަ ޑޮލަރުގެ އެކަށީގެންވާ ބޮޑު އިންސައްތައެއް ލިބުނުން ހުއްޓި، އޭގެ ސަބަބުން ޑޮލަރުގެ ދަތިކަން އިތުރުވުން ކަމަށް ޒިޔާދު ވަނީ ވިދާޅުވެފައެވެ.
މިގޮތުން، ފާއިތުވި އަހަރުގެ ހިސާބުތަކަށް ބަލައިގެން އަންދާޒާކުރާނަމަ، 25 އަހަރުގެ މުއްދަތުގައި ގެއްލޭނެ މިންވަރު ބެލުމުން، ޖުމްލަ 175 މިލިއަން ޑޮލަރު ގެއްލޭނެ ކަމަސް އޭނާ ވިދާޅުވިއެވެ. އެހެންކަމުން ދެ ގުނަ ނުވަތަ 350 މިލިއަން ޑޮލަރު ރާއްޖޭން ބޭރުވެގެން ދިއުމަކީ ވަރަށް އެކަށީގެންވާކަމެއް ކަމަށް އޭނާ ވިދާޅުވިއެވެ.
