ހަނިމާދޫ އެއާޕޯޓް ވިއްކާލަން އުޅޭ ކަމުގެ އަޑު ގަދަވެފައި ވަނިކޮށް އިކޮނޮމިކް މިނިސްޓަރު މުހައްމަދު ސައީދު އެކަން ދޮގުކުރައްވައިފިއެވެ.

ހަނިމާދޫ އިންޓަނޭޝަނަލް އެއާޕޯޓު ބަޔަކަށް ވިއްކާލަން އުޅޭ ކަމުގެ އަޑުތައް ވަނީ ފެތުރިފައެވެ. އަދި އެކަމާއި މެދު ބައެއް ސިޔާސީ މީހުން ދަނީ ސަރުކާރަށް އެކި ތުހުމަތުތައް ކުރަމުންނެވެ. އެގޮތުން ޕީއެންއެފުން މިދިޔަ ބުރާސްފަތި ދުވަހު ބޭއްވި ޖަލްސާގައި ވާހަކަފުޅު ދައްކަވަމުން ކުރީގެ ރައީސް އަބްދުﷲ ޔާމީން ވަނީ ހަނިމާދޫ އިންޓަނޭޝަނަލް އެއާޕޯޓު އިންޑިއާގެ އަދާނީ ގުރޫޕަށް ވިއްކަން ސަރުކާރުން މަސައްކަތް ކުރަމުންދާ ކަމަށް ތުހުމަތުކުރައްވާފައެވެ.

ކުރީގެ ރައިސް ޔާމީން ވަނީ ސިންގަޕޫރުގައި ބޭއްވި ބައްދަލުވުމެއްގައިސަރުކާރުން އަދާނީ ގުރޫޕުގެ ޗެއާމަންއާ ބައްދަލުކުރައްވާފައިވާ ކަމަށާއި ހަނިމާދޫ އެއާޕޯޓް އެ ކުންފުންޏަށް ވިއްކަން ސަރުކާރުން ވާހަކަދައްކާފައިވާ ކަމަށް ވިދާޅުވެފައެވެ.

އެކަން ދޮގުކުރައްވާ ސައީދު ކުރެއްވި ޕޯސްޓެއްގައި ވިދާޅުވީ ހަނިމާދޫ އެއާޕޯޓު އެއްވެސް ފަރާތަކަށް ނުވިއްކާ ކަމަށެވެ. އަދި ސަރުކާރުން ސިންގަޕޫރުގައި ބަޔަކާ ބައްދަލުކުރި ކަމަށް ބުނާ ވާހަކަ ވެސް ސައީދު ވަނީ ދޮގުކުރައްވާފައެވެ. އަދި ހަނިމާދޫ އެއާޕޯޓް ކުއްޔަށް ވެސް ދޭން ނޫޅޭ ކަަމަށް އޭނާ ވަނީ ވިދާޅުވެފައެވެ.