އެމްޑީޕީގެ ދާއިމީ ޗެއާޕަރސަން ހޮވުން ކައުންސިލް އިންތިޚާބުގެ ފަހަށް

މޯލްޑިވިއަން ޑިމޮކްރެޓިކް ޕާޓީ، އެމްޑީޕީ އަށް ދާއިމީ ޗެއާޕަރސަންގެ މަގާމަށް މެންބަރަކު ހޮވުމަށް ބާއްވާ އިންތިޚާބު، ލޯކަލް ކައުންސިލް އިންތިޚާބަށް ފަހު ބާއްވާ ގޮތަށް އެ ޕާޓީގެ ގައުމީ މަޖިލީހުން ފާސް ކޮށްފި އެވެ.

ހޯމަ ދުވަހުގެ ރޭ އެމްޑީޕީ އިން ބޭއްވި އެ ޕާޓީގެ ގައުމީ މަޖިލީހުގެ ޖަލްސާގައި ހޯރަފުށީ ދާއިރާގެ ރައީސް އަދި ރައްޔިތުންގެ މަޖިލީހުގެ ހޯރަފުށީ ދާއިރާގެ ކުރީގެ މެންބަރު އަހްމަދު ސަލީމް ވަނީ އެ މަގާމަށް ދާއިމީ މެންބަރަކު ހޮވުމަށް ނަގާ ވޯޓު ލޯކަލް ކައުންސިލް އިންތިޚާބުގެ ފަހުން ބޭއްވުމަށް ހުށަހަޅާފަ އެވެ.

މެންބަރުގެ އެ ހުށަހެޅުއްވުން ފާސްވީ، ބައްދަލުވުމުގައި ބައިވެރިވި 58 މެންބަރުންގެ ވޯޓާ އެކު އެވެ.

ސަލީމް ވިދާޅުވީ އެ އިންތިޚާބު ފަސް ކުރަން ހުށަހެޅުއްވީ ކުރިއަށް އޮތީ ލޯކަލް ކައުންސިލް އިންތިޚާބު ކަމަށް ވުމާއެކު ޕާޓީގެ އެފަދަ ބޮޑު އިންތިޚާބެއް ބާއްވާ، ކައުންސިލް އިންތިޚާބަށް ހިޔަނި ނޭޅޭނެ ގޮތަކަށް އިންތިޒާމު ހަމަޖެއްސުމަށް ކަމަށެވެ.

ކުރިއަށް އޮތީ ލޯކަލް ކައުންސިލް އިންތިޚާބު ކަމަށް ވެފައި އެ އިންތިޚާބަށް ހިޔަނި އެޅޭ ގޮތަކަށް ޕާޓީގެ ބޮޑު އިންތިޚާބެއް ކުރިއަށް ގެންދިއުމަކީ ބުއްދިވެރި ކަމަކަށް ނުވާތީ. އެ އިންތިޚާބަށް ހިޔަނި އެޅިދާނެ އެއްވެސް ކަމެއް އަޅުގަނޑުމެން ކުރަން ބޭނުން ނުވާތީ.... އަޅުގަނޑުމެންނަކަށް ނެތް ލޯކަލް ކައުންސިލް އިންތިޚާބަށް ދޭންޖެހޭ ސަމާލުކަން ނުދީ ހަމަ އެއްވެސް ގޮތެއް.

ހޯރަފުށީ ދާއިރާގެ ރައީސް އަދި ރައްޔިތުންގެ މަޖިލީހުގެ ހޯރަފުށީ ދާއިރާގެ ކުރީގެ މެންބަރު އަހްމަދު ސަލީމް

އެމްޑީޕީ ގެ ޗެއާޕަރސަންގެ މަގާމު ހުސްވެފައި ވަނީ އެ މަގާމުގައި ހުންނެވި ކުރީގެ އިކޮނޮމިކް މިނިސްޓަރު ފައްޔާޒު އިސްމާއިލް މަގާމުން އިސްތިއުފާ ދެއްވުމުންނެވެ.

ހޯމަ ދުވަހުގެ ރޭ ބޭއްވި ގައުމީ މަޖިލީހުގެ ޖަލްސާގައި ވަނީ އެމްޑީޕީގެ ވަގުތީ ޗެއާޕަރސަންގެ މަގާމަށް ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ އިންތިޚާބު ކޮށްފަ އެވެ.

އެ ޖަލްސާގައި ގައުމީ މަޖިލީހު ގެ މެންބަރެއް ކަމުގައިވާ އިލްހާމް އަހުމަދު ޕާޓީގެ ވަގުތީ ޗެއާޕަރސަން ކަމުގެ މަގާމަށް ހަނިމާދޫ ދާއިރާގެ މަޖިލީހު ގެ މެންބަރު އަބްދުލްޣަފޫރު މޫސާގެ ނަން ހުށައެޅުއްވުމުން އެ ނަމަށް ތާއިދު ލިބި ޕާޓީގެ ވަގުތީ ޗެއާޕަރސަން ކަމަށް އަބްދުލްޣަފޫރު ހޮވުނީ ގައުމީ މަޖިލީހުގެ ޖަލްސާގައި ބައިވެރިވި 66 މެންބަރުންގެ ތެރެއިން 65 މެންބަރުންގެ ވޯޓާއެކު އެވެ. އަބްދުލްޣަފޫރު ވަނީ އޭނާ އެ މަޤާމަށް ހޮވުމުން ވޯޓުދެއްވި މެމްބަރުންނަށް ޝުކުރު އަދާކުރައްވާފަ އެވެ.

އަބްދުލްޣަފޫރު މޫސާ އަކީ އެމްޑީޕީގެ ޕާލިމެންޓްރީ ގްރޫޕުގެ އެންމެ ގިނަ ދުވަސްވީ މެންބަރެވެ. އޭނާ އަކީ މަޖިލީހުގައި ވެސް ގިނަ ދުވަހު ޚިދުމަތް ކުރައްވާފައިވާ މެންބަރެކެވެ.