އަންގާރަ ދުވަހު ޣައްޒާ ގައި 60ށް ވުރެ ގިނަ މީހުން ޝަހީދު ކޮށްލައިފި
ޝަހީދުވި މީހުންގެ ތެރޭގައި އެމެރިކާ އަދި އިސްރާއީލުގެ އެހީތެރިކަމާއެކު ހިންގާ އެހީ ބެހުމުގެ ސަރަޙައްދުތަކުގައި ކާނާ ހޯދަން އުޅުނު 16 އަށް ވުރެ ގިނަ މީހުން ހިމެނޭ
ޣައްޒާ ސިޓީގެ ކެފޭ އަކަށް އިސްރާއީލުން ބޮން އެޅުމުގެ ސަބަބުން ޒަޚަމްވި މީހަކު އެތަނުން ބޭރަށް ނިކުންނަނީ - 2025 ޖޫން 30
އިސްރާއީލުގެ ހަމަލާތަކުގައި އަންގާރަ ދުވަހު 65 ށް ވުރެ ގިނަ ފަލަސްތީނު މީހުން ޣައްޒާ ގައި ޝަހީދު ކޮށްލައިފި ކަމަށް އަލް ޖަޒީރާ އިން ބުނެފިއެވެ.
މީގެ ތެރޭގައި އެމެރިކާ އަދި އިސްރާއީލުގެ އެހީތެރިކަމާއެކު ހިންގާ އެހީ ބެހުމުގެ ސަރަޙައްދުތަކުގައި ކާނާ ހޯދަން އުޅުނ16 އަށް ވުރެ ގިނަ މީހުން ހިމެނެއެވެ.
މި ފަހުގެ ތާރީޚުގެއްގައި އެންމެ ގިނަ އަދަދެއްގެ މީހުން އެއް ހަމަލާ އެއްގައި މަރުވި ޙާދިސާ ގައި، ހޯމަ ދުވަހު އިސްރާއީލުގެ ހަނގުރާމަ މަތީ މަތިންދާބޯޓުތަކުން ކުޑަކުދިންގެ އުފަންދުވަހުގެ ޕާޓީއެއް ކުރިއަށް ދިޔަ ކެފޭ އަކަށް ބޮން އެޅުމުން މަދުވެގެން 39 މީހުން މަރުވިއެވެ.
ހަމާސްގެ އިސް އޮފިޝަލެއް އަލްޖަޒީރާ އަށް ބުނެފައިވަނީ، ހަމާސް އިން "މީހުންގެ ފުރާނަ ސަލާމަތް ކުރުމަށްޓަކައި ހުއްޓުމެއްނެތި ހަނގުރާމަ ހުއްޓުވުމަށް މަސައްކަތް ކުރާނެ" ކަމަށާއި އެހެން ނަމަވެސް އިސްރާއީލުން "މަޝްވަރާތަކަށް ހުރަސް އަޅަމުންދާ" ކަމަށް ތުހުމަތުކުރިއެވެ.
އަނެއްކޮޅުން އިސްރާއީލުގެ ހުރަސްތަކުގެ ސަބަބުން ޣައްޒާ އަށް ކުޑަކުދިންގެ ކާނާ ނުލިބި ގިނަ އަދަދެއްގެ ކުދިން މަރުވެދާނެ ކަމުގެ އިންޒާރު ޑޮކްޓަރުން ދީފިއެވެ.
ޣައްޒާ ގައި ތިބި ޑޮކްޓަރުން އިންޒާރު ދެމުން ބުނެފައިވަނީ މިކަމުގެ ސަބަބުން ހާހުން ގުނާލެވޭ ވަރަށް ކުޑަކުދިން މަރުވެދާނެ ކަމަށެވެ.
ޣައްޒާގެ ޞިއްޙަތާ ބެހޭ މިނިސްޓްރީގެ މަޢުލޫމާތު ދައްކާގޮތުން، އިސްރާއީލުގެ ހަމަލާ ތަކުގައި މިހާތަނަށް މަދުވެގެން 56,531 މީހުން މަރުވެ، 133,642 މީހުން ޒަޚަމްވެފައިވެއެވެ.
އަނެއްކޮޅުން އިސްރާއީލުގެ އެންމެ ގާތް އެކުވެރިޔާ އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައިވަނީ "އަންނަ ހަފްތާގެ ތެރޭގައި" ޣައްޒާ ހަނގުރާމަ ހުއްޓުވުމަށް އެމެރިކާ އިން މަސައްކަތް ކުރަމުންދާ ކަމަށެވެ.
ޓްރަމްޕް މިހެން ވިދާޅުވީ، ނަތަންޔާހޫ ވައިޓް ހައުސް އަށް ޒިޔާރަތް ކުރުމަށް ހަމަޖެހިފައިވާ ޖުލައި 7 ގެ ކުރިން ހަނގުރާމަ ހުއްޓުވުމުގެ އެއްބަސްވުމެއް ވެވިދާނެތޯ ނޫސްވެރިން ސުވާލުކުރުމުން ދެއްވި ޖަވާބުގައެވެ.
"އުންމީދު ކުރަނީ އެކަން ވާނެ ކަމަށް، އަދި އަންނަ ހަފްތާގެ ތެރޭގައި އެކަން ވާނެ ކަމަށް ބަލަމުން މިދަނީ،" ވޮޝިންގްޓަނުން ފްލޮރިޑާ އަށް ފުރާވަޑައިގަންނަވަމުން ޓްރަމްޕް ވިދާޅުވިއެވެ.
ހަނގުރާމަ ހުއްޓާލުމުގެ ވާހަކަ އަންގާރަ ދުވަހު ޓްރަަމްޕް ވިދާޅުވި އިރު އޭނާގެ ސަރުކާރުން އިސްރާއީލަށް 510 މިލިއަން ޑޮލަރުގެ ހަތިޔާރު ވިއްކުމުގެ ހުއްދަ ހޯމަ ދުވަހު ވަނީ ދީފައެވެ.
