ފަނޑިޔާރުންގެ ޤާނޫނަށް ގެންނަ އިސްލާހު ފާސްކޮށްފި ނަމަ މަޖިލީހަށް ވުރެ ޖޭއެސްސީ ބާރުގަދަ ވާނެ - މީކާއިލް

ފަނޑިޔާރުންގެ ޤާނޫނަށް ގެންނަ އިސްލާހު ފާސްކޮށްފި ނަމަ މަޖިލީހަށް ވުރެ ޖޭއެސްސީ ބާރުގަދަ ވާނެ ކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް ވިދާޅުވެއްޖެއެވެ.

ދިވެހިރާއްޖޭގެ ފަނޑިޔާރުންގެ ޤާނޫނަށް އިސްލާހު ހުށަހަޅާފައި ވަނީ ޕީއެންސީ އަށް ނިސްބަތްވާ ރައްޔިތުންގެ މަޖިލީހުގެ ތިނަދޫ އުތުރު ދާއިރާގެ މެމްބަރު ސައުދުﷲ ޙިލްމީ އެވެ. އެ އިސްލާހަށް ބަހުސްކުރައްވަމުން، ފަނޑިޔާރުގެ އާއި ކުޅުން ނިމުނީ ކަމަށް ވިދާޅުވެ ވެރިކަމަށް ވަަޑައިގަތް ނަމަވެސް ރައީސް ޑރ.މުހައްމަދު މުއިއްޒުގެ ވެރިކަމަށް ދޮޅު އަހަރު ވާއިރު "ނުކުޅޭ" އެންމެ ފަނޑިޔާރެއް ވެސް ފަނޑިޔާރު ގޭގައި ނެތް ކަމަށް މީކާއިލް ވަނީ ވިދާޅުވެފައެވެ.

އޭނާ ވިދާޅުވީ ފަނޑިޔާރުންގެ އިތުރުން ޓެކްނިކަލް ސްޓާފުންނާއި، ހުރިހާ ކޯޓުތަކާއި ވެސް ރައީސް މުއިއްޒު ނުފޫޒު ފޯރުވަމުން ގެންދަވާ ކަމަށެވެ. މީގެ އިތުރުން ރައްޔިތުންގެ މަޖިލީހުގެ މެމްބަރަކަށް ހުންނެވި އިރު މިހާރުގެ ބަންޑާރަ ނައިބު އަހުމަދު އުޝާމް ދެއްކެވި ވާހަކަ އާއި މިހާރު ދައްކަވަމުންދާ ވާހަކަތަކާއި ދިމާނުވާކަމަށް މީކާއިލް ވިދާޅުވިއެވެ. އޭރު ޖޭއެސްސީ އާއި ޖުޑީޝަރީ ރަނގަޅުކުރަން ކަމަށް ބުނެ ދެއްކެވި ވާހަކަތަކާއި ބަންޑާރަނައިބުގެ ގޮތުގައި ހުންނަވާ ދައްކަވާ ވާހަކަތާއި މުޅިން ތަފާތު ކަމަށް އޭނާ ވިދާޅުވިއެވެ.

މިއަދު ޖޭއެސްސީ އަކީ ނުފޫޒު ފޯރުވާ ތަނަކަށް ވެސް ނުވޭ. ކޮމްޕޮޒިޝަން ވެސް ރަނގަޅު. އެހެންވީމާ މި ރައްޔިތުންގެ މަޖިލީހުގެ ދައުރު މުހިންމު ވަނީ. މިއަދު ހުންނަ މަޤާމަކާއި ގުޅުވާފަ އެއް ނޫން ތިމާގެ ފިކުރު ހުންނަން ޖެހެނީ

ގަލޮޅު ދެކުނު ދާއިރާގެ މެމްބަރު މީކާއިލް ނަސީމް

ކައުންސެލް ޖެނެރަލްގެ ލަފަޔާއި ވެސް ޚިލާފަށް ސުޕްރީމް ކޯޓުގެ ފަނޑިޔާރުން ވަކިކުރި ކުރުމަށް ވެސް މީކާއިލް ވަނީ ފާޑު ވިދާޅުވެފައެވެ. ފަނޑިޔާރުންނާއި މެދު ތަހުގީގެއް ކުރަމުން ދާ އިރު އެ ފަނޑިޔާރުންނާއި ސުވާލެއް ވެސް ކޮށްފައި ނުވާ ކަމަށާއި އެހެންވީމަ އެއީ ޤާނޫނުގައި ހުރި މައްސަލަ އެއް ނޫން ކަމަށް މީކާއިލް ވިދާޅުވިއެވެ. މިއީ ޖޭއެސްސީ ބާރުވެރިކޮށް ޖޭއެސްސީ އަށް އިތުރަށް ނުފޫޒު ފޯރުވަން ފުރުސަތު ދިނުން ކަމަށް އޭނާ ވިދާޅުވިއެވެ.

ސަރުކާރުގެ ފަރާތުން މި ބިލް ހުށަހެޅުމުގެ ބޭނުމަކީ ފަނޑިޔާރުންނަކީ ފަނޑިޔާރުކަމުގެ މަޤާމާއި ޝަރުއީ ދާއިރާގެ މުސްތަގިއްލުކަން ދެމެހެއްޓޭނެ ފަދައަކުން އަދި ޝަރުއީ ދާއިރާގެ އިތުބާރު ދެމެހެއްޓޭނެ ގޮތަށް މަސްއޫލިއްޔަތު އަދާކުރާ ފަރާތެއްކަން ކަށަވަރުކުރުމަށްޓަކާ ކަމަށެވެ.

މީގެ އިތުރުން ފަނޑިޔާރުން އަމަލުކުރަން ޖެހޭ ސުލޫކީ މިންގަނޑު ޤާނޫނުގަ ކަނޑައެޅުމާއި، ފަނޑިޔާރުންގެ މަސައްކަތުގެ ފެންވަރު ބެލުމާ ގުޅޭގޮތުން ޤާނޫނުގައި ކަނޑައަޅާފައިވާ އުސޫލުތައް އިތުރަށް ތަފްސީލްކުރުމަކީ މި ބިލުގެ ބޭނުމެއް ކަމަށް ވަނީ ބުނެފައެވެ. ހަމައެހެންމެ ފަނޑިޔާރުންގެ މުސްތަގިއްލުކަން ދެމެހެއްޓުމަށް ފަނޑިޔާރުންގެ ގާނޫނަށް އިސްލާހު ގެންނަ ކަމަށް ވެސް ސައުދުﷲ ހުށަހެޅުއްވި އެ ބިލުގައި ވަނީ ބުނެފައެވެ.