ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެންބަރު މުހައްމަދު ސިނާންގެ މައްޗަށް ދަރަނީގެ މައްސަލަ އެއް ހުށަހަޅައިފިއެވެ.

މި މައްސަލަ އަކީ މިއީ އަމިއްލަ މީހެއްގެ އަތުން މެމްބަރު ސިނާން ނަންގަވާފައިވާ 3 ލައްކަ ރުފިޔާ އަނބުރާ ނުދޭތީ ހިތަދޫ ކޯޓަށް ހުށަހެޅި މައްސަލައެކެވެ. މިއީ މ.މަހެކް / މާލެ، އަހުމަދު ޝިހާމްގެ އަތުން ނަގާފައިވާ ފައިސާ އަނބުރާ ނުދޭތީ ހުށަހަޅާފައިވާ މައްސަލައެކެވެ.އޭނާގެ މައްޗަށް ދައުވާ ހުށަހެޅީ ޝީހާމްއެވެ.

މީގެ ކުރިން ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ޕީއެންސީގެ މެންބަރު މުހައްމަދު ސިނާންގެ މައްޗަށް ސާބިތުވި ދަރަނި ދެއްކީ އޭނާގެ ގޮނޑި ގެއްލިއްޖެ ކަމަށް ކަނޑައަޅައިދިނުމަށް އެދި ސުޕްރީމް ކޯޓަށް މައްސަލަ ހުށަހެޅި ދުވަހުއެވެ.

ޕީއެންސީއަށް ނިސްބަތްވާ މެމްބަރު ސިނާން އިސްލާމިކް ބޭންކަށް ދައްކަވަންޖެހޭ ލޯނެއް ހުކުމާ އެއްގޮތަށް ދައްކަވާފައި ނުވާތީ އޭނާގެ ގޮނޑި ގެއްލިފައިވާ ކަމަށް ކަނޑައަޅަން ސުޕްރީމް ކޯޓަށް މައްސަލައެއް، ކޯޓަށް ހުށަހެޅީ މިދިއަ ފެބްރުއަރީ މަހުގެ 13 ވަނަ ދުވަހު ޣާލިބު ސަލީމް ކިޔާ މީހެކެވެ.

ސިނާންގެ މައްޗަށް ސާބިތުވެފައިވަނީ އޭނާއާއި ސ. ހިތަދޫ، ވާދޫގެ، އަހުމަދު ވަހީދާއި އެ ރަށު، ވިހަލަގޮޑިމާގެ، މުޙައްމަދު ސަލީމް ބައިވެރިވެގެން ނެގި ލޯނެއްގެ ފައިސާ ދައްކާފައިނުވާ މައްސަލަ އެވެ. މި ހިނގާ ޖޫން މަހުގެ 25 ވަނަ ދުވަހު ސުޕްރީމް ކޯޓުން ޝަރީއަތް ފަށައި، ބޭއްވި އަޑުއެހުމުގައި ޣާލިބުގެ ފަރާތުން ބުނެފައިވަނީ އިސްލާމިކް ބޭންކުން އިތުރު ބަޔަކާ އެކު ސިނާން ނެންގެވި 2.5 މިލިއަން ރުފިޔާގެ ލޯނު ނުދައްކަވާ އޮތުމުން އިސްލާމިކް ބޭންކުން ހިތަދޫ މެޖިސްޓްރޭޓް ކޯޓަށް އެ މައްސަލަ ހުށަހެޅި ކަމަށެވެ.

އެ ކަމާއި ގުޅިގެން ފައިސާ ދައްކަން ޙުކުމް ކުރި ނަމަވެސް އެކަން ނޭނގޭ ކަމަށް ސިނާންގެ ފަރާތުން އޭނާގެ ވަކީލް ވިދާޅުވިއެވެ. އަދި އެ ފައިސާ މިހާރު އަމިއްލަ އިޚުތިޔާރުގައި ދައްކައި ނިންމާފައިވާ ކަމަށް ވެސް އޭނާ ވިދާޅުވިއެވެ.

ފަހުން ހުށަހަޅާފައިވާ މައްސަލައިގެ ކޭސް ނަމްބަރަކީ 2025/Civ/S2c/178 އެވެ.