އަންނަ އަހަރު ދަރަންޏަށް ދައްކަންޖެހޭ 1 ބިލިއަން ޑޮލަރު ރާއްޖެއަކު ނެތް، ޚަރަދު ކުޑަނުކޮށް ނުވާނެ: ސިޔާމް
ދައުލަތުގެ ޚަރަދު 40 އިންސައްތަ އިން ކުޑަ ކުރަން ޖެހޭ ކަމަށް ޝިޔާމް ވިދާޅުވި
މީދޫ ދައިރާގެ މެންބަރު އަހުމަދު ސިޔާމް މުހައްމަދު
އަންނަ 2026 ވަނަ އަހަރު ރާއްޖެއިން ދަރަނީގެ ގޮތުގައި 1 ބިލިއަން ޑޮލަރު ދައްކަން ޖެހޭ ކަމަށާ އެ ފައިސާ އަކީ މިއަދު މި ގައުމުގައި ނެތް ފައިސާ ކަމަށް ރައްޔިތުންގެ މަޖިލީހުގެ މީދޫ ދާއިރާގެ މެންބަރު އަހުމަދު ސިޔާމް މުހައްމަދު ވިދާޅުވެއްޖެ އެވެ.
އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާގައި 2026 ވަނަ އަހަރަށް ހުށަހަޅާފައިވާ ބަޖެޓަށް ބަހުސް ކުރައްވަމުން ސިޔާމް ވިދާޅުވީ ދައުލަތުން ކުރާ ޚަރަދު ބޮޑުތަނުން ކުޑަކުރަން ޖެހިފައިވާ ކަމަށެވެ. އެގޮތުން ދައުލަތުގެ ޚަރަދު 40 އިންސައްތަ އިން ކުޑަ ކުރަން ޖެހޭ ކަމަށް ގަބޫލު ކުރައްވާ ކަމަށް މެންބަރު ވިދާޅުވި އެވެ.
އަޅުގަނޑު ބޭނުންވޭ ދައުލަތުގެ ޚަރަދު މިހާރު ހުރި ވަރަށް ވުރެ ގާތްގަނޑަކަށް 40 އިންސައްތަ ކުޑަކުރަން. އެއީ އަޅުގަނޑުމެންނަށް މިވަގުތު ލިބޭ ފައިދާ އަށް ބަލާއިރު އަޅުގަނޑުމެން ކުރަން ޖެހޭ ޚަރަދަކީ ލިބޭ އެއްޗަކާ އެއްވަރުގެ ޚަރަދަކަށް ވާން ޖެހޭ އިރު އަޅުގަނޑުމެންނަށް އިތުރު އެއްވެސް ކަމެއް ރިޒަރވެއް ކުރެވޭނެ ގޮތެއް ނެތް.މީދޫ ދާއިރާގެ މެންބަރު އަހުމަދު ސިޔާމް މުހައްމަދު
ސިޔާމް ވިދާޅުވީ ޚަރަދު ކުޑަކުރަން ޖެހޭ އެންމެ ބޮޑު ސަބަބަކީ އަންނަ އަހަރު ދަރަނީގެ ގޮތުގައި 1 ބިލިއަން ޑޮލަރު ދައްކަން ޖެހުން ކަމަށެވެ. އަދި އެއީ މިވަގުތު ރާއްޖޭގައި ހުރި ފައިސާ ނޫން ކަމަށާ އެ ފައިސާ ހޯދޭނީ ވެސް ޚަރަދު ކުޑަ ކޮށްގެން ކަމަށް ސިޔާމް ވިދާޅުވި އެވެ.
ރާއްޖެ އަށް މިވަގުތު ލިބޭ ފައިދާ އަށް ބަލާއިރު ދައުލަތުން ކުރާ ޚަރަދަކީ ލިބޭ އެއްޗަކާ އެއްވަރުގެ ޚަރަދަކަށް ވާން ޖެހޭ އެއްޗެއް ކަމަށް ވެސް މެންބަރު ވިދާޅުވި އެވެ. އަދި އެ ނޫން އިތުރު އެއްވެސް ގޮތަކަށް ދައުލަތުގެ ރިޒަރވް އިތުރު ނުކުރެވޭނެ ކަމަށާ ރާއްޖޭގެ ރިޒަރވް އޮތީ ވަރަށް ދަށުގައި ކަމަށް ވެސް ސިޔާމް ވިދާޅުވި އެވެ.
އެހެންކަމުން ރިޒަރވް ހަމަޖެއްސުމަށްޓަކައި ވެސް އެންމެ ފުރަތަމަ ކުރަން ޖެހޭ ކަމަކީ ޚަރަދުތައް ކުޑަކުރުން ކަމަށް ސިޔާމް ވިފާދުވި އެވެ.
އިތުރަށް ވާހަކަ ދައްކަވަމުން ސިޔާމް ވިދާޅުވީ, ކުރިއަށް އޮތްތަނުގައި މުސާރަތައް ބޮޑުކޮށްފި ކަމަށްވާނަމަ, ތަކެއްޗާއި ޚިދުމަތުގެ އަގުތައް, ނުވަތަ އިންފްލޭޝަނަށް ބޮޑެތި މައްސަލަތައް ކުރިމަތި ވާނެ ކަމަށެވެ. މުސާރަތައް ބޮޑު ކުރި ނަމަވެސް އެކަން އެއްފަހަރާ ކޮށްފިނަމަ އޭގެ ގެއްލުން މުޅި ދައުލަތާ ހުރިހާ ރައްޔިތުންނަށް ވެސް ވާނެ ކަމަށް ސިޔާމް ވިދާޅުވި އެވެ.
މެންބަރު ވިދާޅުވީ އެކަންކަން ވެސް ކުރެވިދާނެ ކަމަށެވެ. ނަމަވެސް އެއީ އެކަމަށް ވަގުތު ބޭނުންވާނެ ކަމެއް ކަން ހަނދާނުގައި ބަހައްޓަން ޖެހޭ ކަމަށް ވެސް ސިޔާމް ވިދާޅުވި އެވެ. ކޮންމެ ޚަރަދެއް ކުރި ނަމަވެސް ކުރާ ޚަރަދުތަކަކީ ކޮން ކަމަކަށް ކުރާ ހަރަދުތަކެއް ތޯ ވިސްނާލަން ޖެހޭ ކަމަށް ވެސް ސިޔާމް ވިދާޅުވި އެވެ. މިސާލެއް ގޮތުން ސިޔާމް ވިދާޅުވީ އެތައް މިލިއަން ރުފިޔާ އެއް ޚަރަދުކޮށްގެން ހަދާފައިވާ ގިނަ އެއަރޕޯޓްތަކަކީ ބަރަވެލި ފިޔަވާ އިތުރު އެއްޗެއް އަރާނެ އެއާޕޯޓްތަކެއް ނޫން ކަމަށެވެ.
