ސަރުކާރުގައި މައި ހޮސްޕިޓަލް އައިޖީއެމްއެޗުގެ އިހުމާލުން 8 މަހުގެ ތުއްތު ކުއްޖަކު މަރުވި ކަމަށް ބުނާ މައްސަލަ ބަލަން ފަށައިފިއެވެ.

ޔޫނުސް ހުސައިން އަބްދުﷲ ނަމަކަށް ކިޔާ މި ތުއްތު ފިރިހެން ކުއްޖާ މަރުވީ އައިޖީއެމްއެޗްގެ އިހުމާލުން ކަމަށް އެއާއިލާއިން ބުނެފައިވެއެވެ. މި ކުއްޖާއަށް ފަރުވާ ދިނުމުގައި އައިޖީއެމްއެޗް ވަރަށް ބޮޑަށް އިހުމާލުވެފައިވާ ކަމަށް ބުނެ، އެކަންބޮޑުވުންތައް ސޯޝަލް މީޑިއާގައި ވަނީ ހިއްސާކޮށްފައެވެ.

އާއިލާއިން ބުނީ، ޔޫނުސް އަކީ ސިއްހަތު ރަނގަޅު ކުއްޖެއް ކަމަށާއި، ސިއްހީ އެއްވެސް މައްސަލައެއް ފާހަގަކުރެވިފައިނުވާ ކަމަށެވެ. ނަމަވެސް މީގެ ދެ ހަފުތާކުރިން ޔޫނުސްގެ އުޅުމަށް ބަދަލު އައިސް، ހޮޑުލާތީ، ދެ ފަހަރެއްގެ މަތިން ޑޮކްޓަރަށް ދެއްކުމުން ވެސް ހޮސްޕިޓަލުން ބޭސް ދީފައި ފޮނުވާލީ ކަމަށް ބުނެފައިވެއެވެ. އަދި ތިން ވަނަ ފަހަރަށް 20 ޖޫން ގައި ޑޮކްޓަރަށް ދެއްކުމަށް ދިއުމުން އެޑްމިޓްކޮށް އައިވީ ގުޅި ކަމަށެވެ.

އޭގެފަހުން 21 ޖޫން ގައި ޔޫނުސްގެ ހަށިގަނޑު ދުޅަވެ ފުފެން ފެށި ކަމަށާއި، ޔޫނުސް ދުޅަވަނީ ލިވާގައި ހުންނަންޖެހޭ އެންޒައިމެން މަތިވެފައި ހުރުމުން ކަމަށް ކަމަށް ޑޮކްޓަރުން ބުނެފައިވާ ކަމަށެވެ. މި ދުޅައާއި ފުފުން މަޑުކުރުމަށް ހޮސްޕިޓަލުން އިންޖެކްޝަނެއް ދިން ކަމަށާއި، އޭގެފަހުން ދުޅަތިރިވި ކަމަށެވެ. ނަމަވެސް އެކުއްޖާގެ ބަނޑު ހުރީ ވަރަށް ބޮޑަށް ފުއްޕާފައި ކަމަށް އާއިލާއިން ބުނެއެވެ.

ހޮސްޕިޓަލުގައި ފަސް ދުވަސް ވީއިރު ވެސް ކުއްޖާގެ ހާލަތަށް މާބޮޑު ކުރިއެރުމެއް ނުލިބޭތީ އާއިލާގެ އެދުމުގެ މަތިން ކުޑަކުދީންގެ ޚާއްސަ ޑޮކްޓަރަކަށް ދެއްކިއެވެ. އެޑޮކްޓަރު ލަފާ ދެއްވީ ލިވަރ ވަރަށް ބޮޑަށް ހަލާކުވާތީ ވީހާވެސް އަވަހަށް ރާއްޖެއިން ބޭރަށް ދިއުމަށެވެ. އަދި ރާއްޖެއިން ބޭރަށް ފުރެންދެން އައިސީޔޫގައި ފަރުވާ ދިނުމަށް އެޑޮކްޓަރު އެދުނު ނަމަވެސް އެކަން ކޮށްފައިނުވާ ކަމަށާއި، ޔޫނުސް އައިސީޔޫއަށް ނުލެވުނީ އެ ހޮސްޕިޓަލުގެ އައިސީޔޫ ފުރިފައި ވުމުންކަން ނަރުހުންގެ ފަރާތުން އެނގިފައިވާ ކަމަށް އާއިލާއިން ބުނެއެވެ.

މީގެ އިތުރުން ހިޖުރީ އައު އަހަރާ ދިމާވެ، ސަރުކާރު ބަންދުވެފައިވާތީ އެކުއްޖާގެ ސްކޭންތައް ވެސް ހަދާފައިނުވާ ކަމަށް އާއިލާއިން ބުނެފައިވެއެވެ. އަދި ރާއްޖެއިން ބޭރަށް ފުރުން ލަސްވިއިރު، އާސަންދަ ހަމަޖެހި ފުރޭނެ ކަމަށް އެންގީ އެކުއްޖާ މަރުވެ ގާތްގަނޑަކަށް 10 މިނިޓް ފަހުން ކަމަށް ވެސް އާއިލާއިން ބުނެއެވެ.

އާއިލާގެ ފަރާތުން ބޮޑެތި ތުހުމަތުތަކެއް އައިޖީއެމްއެޗަށް ކޮށްފައިވާތީ، އެ މައްސަލައާ ގުޅިގެން އާދިއްތަ ދުވަހު ހެލްތް މިނިސްޓްރީން ބުނީ، މި މައްސަލަ ސަމާލު ކަމަށް އައިސްފައިވާ ކަމަށާއި، ބަލަންޖެހޭ ކަންކަން ބަލަމުންދާ ކަމަށެވެ. ތަހުގީގު ކުރުމަށްފަހު، އިހުމާލުވާ ފަރާތްތަކާމެދު ފިޔަވަޅު އަޅާނެ ކަމަށް ވެސް ހެލްތް މިނިސްޓްރީން ބުނެފައިވެއެވެ.

ރާއްޖޭގެ ސިއްހީ ނިޒާމުގެ އިހުމާލުން ގިނަ ބައެއްގެ ފުރާނަ ގެއްލިފައިވާ ކަމަށް މީގެ ކުރިން ވެސް އާއިލާތަކުން ތުހުމަތުކޮށްފައިވެއެވެ. ނަމަވެސް މިފަދަ މައްސަލަތަކުގައި ނިންމާ ނިންމުންތަކާއި ކުރާ ތަހުގީގުތައް ހެލްތް މިނިސްޓްރީން އާއްމެއް ނުކުރެއެވެ. އަދި އަޅާ ފިޔަވަޅެއް ނޭނގެއެވެ. އަދި ޚާއްސަކޮށް އައިޖީއެމްއެޗަށް ގިނަ ތުހުމަތުތައް ކުރެވޭއިރު، ސަރުކާރު ބަންދުވުމާ ގުޅިގެން ސިއްހީ ޚިދުމަތް ނުލިބޭ ކަމުގެ ޝަކުވާ ވަރަށް ބޮޑެވެ.