ބަޔާނުން މޮނާކޯ ބަލިކޮށްފި
އައު ސީޒަންގެ ފުރަތަމަ މެޗަކީ ބަޔާން އާއި އާރްބީ ލައިޕްޒިގް ވާދަކުރާ ޖަރުމަނު ސުޕަ ކަޕްގެ ފައިނަލް
ބަޔާން އާއި މޮނާކޯ ކުޅުނު މެޗުގެ ތެރެއިން
ކުރިއަށް އޮތް އައު ސީޒަނަށް ތައްޔާރުވުމުގެ ގޮތުން ޖަރުމަނުގެ ބަޔާން މިއުނިކުން ކުޅުނު ރަޙުމަތްތެރިކަމުގެ ފަހު މެޗުގައި މޮނާކޯ ބަލިކޮށްފި އެވެ.
ހޯމަ ދުވަހުގެ ރޭ ކުޅުނު މެޗު ބަޔާނުން ކާމިޔާބު ކުރީ 4-2 އިންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ މޮނާކޯ އިންނެވެ. މެޗުގެ 29 ވަނަ މިނެޓުގައި އެ ޓީމަށް ލީޑު ނަގައިދިނީ ޓަކުމީ މިނަމިނޯ އެވެ. ނަމަވެސް އޭގެ ދެ މިނެޓު ފަހުން ކޮނާޑް ލެއިމާ ވަނީ ލަނޑެއް ޖަހައި ބަޔާނަށް ނަތީޖާ ހަމަހަމަ ކޮށްދީފަ އެވެ. ފުރަތަމަ ހާފު ނިމުމުގެ ކުރިން ބަޔާނުން ވަނީ އިތުރު ދެ ލަނޑު ޖަހައި ލީޑު ފުޅާ ކޮށްފަ އެވެ. އެގޮތުން 42 ވަނަ މިނެޓުގައި ބަޔާނަށް ލީޑު ނަގައިދިނީ ޖަމާލް މުސިއާލާ އެވެ. ފުރަތަމަ ހާފުގެ އިތުރު ވަގުތުގައި ލިބުނު ޕެނަލްޓީއެއް ކާމިޔާބުކޮށް ލީޑު ފުޅާކޮށްދިނީ ސާޖް ގްނަބްރީ އެވެ. ދެ ވަނަ ހާފަށް ނިކުމެ މޮނާކޯ އިން ވަނީ ލަނޑެއް ޖަހައި ފަރަގު ކުޑަ ކޮށްފަ އެވެ. ލިބުނު ޕެނަލްޓީއެއް ކާމިޔާބުކޮށް 64 ވަނަ މިނެޓުގައި އެ ޓީމުގެ ދެ ވަނަ ލަނޑު ޖެހީ ވިސާމް ބެން ޔެޑާ އެވެ. އޭގެ ހަތަރު މިނެޓު ފަހުން ބަޔާންގެ ހަތަރު ވަނަ ލަނޑު ޖެހީ ލެރޯއީ ސާނޭ އެވެ.
އައު ސީޒަަނަށް ތައްޔާރުވުމަށް ބަޔާނުން ވަނީ ޖުމުލަ ހަތަރު މެޗު ކުޅެފަ އެވެ. އޭގެ ތެރެއިން އެ ޓީމު ވަނީ ތިން މެޗު ކާމިޔާބުކޮށްފަ އެވެ. އެއް މެޗުން ވަނީ ބަލިވެފަ އެވެ. އައު ސީޒަންގެ ފުރަތަމަ މެޗަކީ ބަޔާން އާއި އާރްބީ ލައިޕްޒިގް ވާދަކުރާ ޖަރުމަނު ސުޕަ ކަޕްގެ ފައިނަލް އެވެ. އެ މެޗު އޮންނާނީ އޯގަސްޓު މަހުގެ 12 ވަނަ ދުވަހު އެވެ.
