ގައުމާއި ރައްޔިތުން ސަލާމަތް ކުރުމަށްޓަކައި އެންމެ ފުރަތަމަ ކުރަން ޖެހޭނެ ކަމަކީ ކައުންސިލް އިންތިޚާބު ކާމިޔާބު ކުރުން: ޔައުޤޫބް

ގައުމާއި ގައުމުގެ ރައްޔިތުން ސަލާމަތް ކުރުމަށްތަކައި މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން އެންމެ ފުރަތަމަ ފުރަތަމަ ކުރަން ޖެހޭނެ ކަމަކީ ކުރިއަށް އޮތް ލޯކަލް ކައުންސިލް އިންތިޚާބު ކާމިޔާބު ކުރުން ކަމުގައި ދާންދޫ ދާއިރާގެ ކުރީގެ މެންބަރު ޔައުގޫބް އަބްދުﷲ ވިދާޅުވެއްޖެ އެވެ.

ބުރާސްފަތި ދުވަހުގެ ހެނދުނު އެމްޑީޕީގެ އަހަރީ ދުވަސް ފާހަގަކޮށް، ދިދަ ނެގުމަށް ކުރިއަށް ގެންދިޔަ ޚާއްސަ ހަރަކާތުގައި ރާއްޖެއެމްވީއަށް ޔައުގޫބް ވިދާޅުވީ އެމްޑީޕީއަށް 20 އަހަރު ފުރިގެން ދިއައިރު، މި ރާއްޖޭގައި ވަރަށް ގިނަ ޕާޓީތައް އުފެދިގެން އައި ކަމަށެވެ.

އެހެންނަމަވެސް، އެމްޑީޕީ އަށް ވިހި އަހަރު ވެގެންދާއިރު އެ ޕާޓީއާއި އެއްކޮށް އުފެދިގެން އައި އެއްވެސް ޕާޓީއެއް މިއަދު ސިޔާސީ މައިދާނުގައި ހަރަކާތްތެރިވާތަން ނުފެންނަ ކަމަށް ޔައުގޫބު ވިދާޅުވިއެވެ. އަދި އޭރު އުފެދިގެން އައި ޕާޓީތައް ވުޖޫދުން ވެސް ފެންނަން ނެތްއިރު، އެމްޑީޕީ ދެގޮތެއް ނުވެ، 20 އަހަރުވަންދެއް ދެމިއޮތުމަކީ ލިބުނު ވަރަށް ބޮޑު ކާމިޔާބީއެއް ކަމަށް ޔައުގޫބު ވިދާޅުވިއެވެ.

ޔައުގޫބު ވިދާޅުވީ ނަތީޖާ ހިތިކޮށް ފެނުނު ނަމަވެސް އެ އުނދަގޫ މަސައްކަތް ކާމިޔާބުކޮށް ޕާޓީ އެއްކޮށް އެއްގަލަކަށް އަރުވައި، އެންމެ އެކު ކުރިއަށް ދެވޭނެ މަގު މިއަދު ފަހިވެފައިވާ ކަމަށާއި އެކަމުގެ އަސްލަކީ ޕާޓީގެ ޗެއަރޕާސަން ފައްޔާޒު އިސްމާޢީލް ކަމަށް ޔައުގޫބު ވިދާޅުވިއެވެ. އަދި އެކަމަށް މި ފުރުޞަތުގައި ޕާޓީގެ ޗެއަރ ޕާރސަން ފައްޔާޒު އިސްމާޢީލަށް ވަރަށް ބޮޑަށް ޝުކުރު ދަންނަވާ ކަމަށް ވެސް އޭނާ ވިދާޅުވިއެވެ.

ޔައުގޫބް ވިދާޅުވީ މިހާރު ދެން ކުރިއަށް އޮތީ ލޯކަލް ކައުންސިލް އިންތިޚާބު ކަމަށާއި އޭގެފަހުގައި ދެން އޮތީ ރިޔާސީ އިންތިޚާބު ކަމަށެވެ. ޕާޓީއަށް ވިހި އަހަރު ވެގެންދާއިރު ގައުމު މިއޮތީ ވަރަށް ނާޒުކު ހާލަތެއްގައި ކަމަށާއި މިހާރު މި އޮތް ހާލަތުން ގައުމު ސަލާމަތް ކުރުމަށް ގިނަ މަސައްކަތް ތަކެއް ކުރަން ޖެހިފައިވާ ކަމަށް ޔައުގޫބު ވިދާޅުވިއެވެ.

ދެން އަޅުގަނޑުމެންނަށް މިހާރު ދެން ކުރިއަށް އޮތީ ލޯކަލް ކައުންސިލް އިންތިޚާބު. އޭގެފަހުގައި ރިޔާސީ އިންތިޚާބު. އަޅުގަނޑު ހިތުން އަޅުގަނޑުމެންނަށް ވިހި އަހަރު ވެގެންދާއިރު އަދި މި ރާއްޖޭގައި ވަރަށް ގިނަ ޕާޓީތައް އުފެދިގެން އައި. މަލްޓި ޕާޓީ ޑިމޮކްރަސީގެ މި ސިސްޓަމް އުފެދިގެން އައިއިރު ވަރަށް ބައިވަރު ޕާޓީ އެމް.ޑީ.ޕީއާއެކު އުފެދިގެން އައި. އެހެން ނަމަވެސް އަޅުގަނޑުމެން މިއަދު މި ހިސާބަށް އައިއިރު ވިހި އަހަރު ވެގެންދާއިރު އަޅުގަނޑުމެންނަށް ނުފެނޭ އަޅުގަނޑުމެންނާ އެއްކޮށް އުފެދިގެން އައި އެއްވެސް ޕާޓީއެއް.

ދާންދޫ ދާއިރާގެ ކުރީގެ މެންބަރު ޔައުގޫބް އަބްދުﷲ

އެގޮތުން އެންމެ ފުރަތަމަ މި ގައުމާއި ގައުމުގެ ރައްޔިތުން މިހާރު މިއޮތް ހާލަތުން ސަލާމަތް ކުރުމަށް އެންމެ ފުރަތަމަ ވެސް ކުރަން ޖެހިފައިވާ ކަމަކީ ކުރިއަށް މި އޮތް ލޯކަލް ކައުންސިލް އިންތިޚާބު ކާމިޔާބު ކުރުން ކަމަށް ޔައުގޫބު ވިދާޅުވިއެވެ.

ޔައުގޫބު ވިދާޅުވީ މިހާރު ގައުމު މިއޮތް ހާލަތަށް ވިސްނާލައިފި ނަމަ، ގައުމު ގޮސްފައި އޮތް ނުރައްކާތެރި ހާލަތު ހަމަ ކޮންމެ ދިމާއަކަށް ބަލާލިއަސް ފެންނަކަމަށެވެ. އެގޮތުން ޑޮލަރުގެ އަގު ދުވަހެއް ދުވަހަކަށް މައްޗަށް ގޮސް، މިހާރު ޑޮލަރުގެ އަގު 20 އަށްވުރެ މަތިވެގެން ގޮސްފައިވާ ކަން އޭނާ ފާހަގަކުރިއެވެ. އަދި މިއީ ކޮވިޑުގެ އެންމެ ތާށި ދުވަސްތަކުގައި ވެސް ޑޮލަރުގެ އަގު ނުދާހާ މައްޗަށް މި ސަރުކާރު އައިފަހުން މައްޗަށް ގޮސްފައިވާ ކަމަށް ޔައުގޫބު ވިދާޅުވިއެވެ.

ޔައުގޫބު ވިދާޅުވީ ޑޮލަރުގެ އަގަށް އެކަނި ބަލާލި ނަމަވެސް މިއަދު ގައުމުގެ އިގްތިސާދު ދަށަށް ގޮސްފައިވާ މިންވަރު ވަރަށް ސާފުކޮށް އެނގޭ ކަމަށާއި އެހެންވީމާ، އެކަމުން ސަލާމަތްކުރަން، ފުރަތަމަ ކަމަކަށް އަޅުގަނޑުމެން ކުރަންޖެހޭނެ ކަމަކީ، ލޯކަލް ކައުންސިލުން އިންތިޚާބު ކާމިޔާބުކުރުން ކަމަށެވެ. އަދި އޭގެ ފަހުގައި ދެން އޮތް އިންތިޚާބު ކާމިޔާބުކުރުން ކަމަށް ވެސް އޭނާ ވިދާޅުވިއެވެ.