ފައްޔާޒް ގެ ހިދުމަތްތަކަށް އެމްޑީޕީ އިން ޝުކުރު ދަންނަވައިފި
ފައްޔާޒް އިސްމާއީލް އެމްޑީޕީގެ ދެވަނަ ސަރުކާރުގެ އިކޮނޮމިކް ޑިވެލޮޕްމަންޓް މިނިސްޓަރުގެ ހައިސިއްޔަތުން ޕާޓީގެ ސިޔާސަތުތައް ތަންފީޒުކުރުމުގައި އިސް ދައުރެއް އަދާކުރެއްވި
އެމްޑީޕީގެ ޗެއާޕާސަން އަދި ކުރީގެ އިކޮނަމިކް މިނިސްޓަރ ފައްޔާޒް އިސްމާއިލް
ދިވެހިރައްޔިތުންގެ ޑިމޮކްރަޓިކް ޕާޓީ (އެމްޑީޕީ) ގެ ޗެއަރޕާސަންގެ މަގާމުގައި ހުންނަވައިގެން އަލްއުސްތާޛު ފައްޔާޒް އިސްމާއީލް ކޮށްދެއްވި ހިދުމަތްތަކުގެ އަގުވަޒަން ކުރައްވާ، ޕާޓީގެ ފަރާތުން ފައްޔާޒަށް ޝުކުރު ދަންނަވައިފި އެވެ.
އެމްޑީޕީއިން ނެރުނު ނޫސްބަޔާނެއްގައި ބުނެފައިވަނީ، ޗެއަރޕާސަންގެ މަގާމުގައި ހުންނަވައިގެން ފައްޔާޒް އިސްމާއީލް ކޮށްދެއްވި ގިނަގުނަ އަދި އެހާމެ އަގުހުރި ހިދުމަތްތައް ބަލައިގަނެ، އެކަމަށްޓަކައި ޕާޓީގެ އެންމެހައި މެންބަރުންގެ ނަމުގައި ނުހަނު އިޚްލާސްތެރިކަމާއެކު ޝުކުރު ދަންނަވާ ކަމަށެވެ.
އެމްޑީޕީގެ ދެވަނަ ސަރުކާރުގެ އިކޮނޮމިކް ޑިވެލޮޕްމަންޓް މިނިސްޓަރުގެ ހައިސިއްޔަތުން، ޕާޓީގެ ސިޔާސަތުތައް ތަންފީޒުކުރުމުގައި ފައްޔާޒް އިސްމާއީލް ވަރަށް އިސް ދައުރެއް އަދާކުރެއްވިކަން ޕާޓީން އުފަލާއެކު ފާހަގަކުރި އެވެ. ސަރުކާރުގެ އިސް މަގާމެއްގައި ހުންނަވައިގެން ޗެއާޕާސަންގެ މަގާމާ ހަވާލުވެވަޑައިގެންނެވި ނަމަވެސް، ޕާޓީގެ މަސައްކަތްތަކާއި ކަންކަމަށް ވަރަށް ބޮޑު ސަމާލުކަމެއް ދެއްވައި، ޕާޓީގެ ކުރިއެރުމާއި ތަރައްގީއަށް ގިނަގުނަ މަސައްކަތްތަކެއް ފެއްޓެވި ކަމަށް ނޫސްބަޔާނުގައި ބުންޏެވެ.
ޕާޓީގެ ތެރޭގައި އޮންނަންޖެހޭ އެކުވެރިކަމާއި ބަދަހިކަން ހިފެހެއްޓުމަށްޓަކައި އެކި ފެންވަރުގައި ފައްޔާޒް އިސްމާއީލް މަސައްކަތް ކުރެއްވި ކަމަށްވެސް ނޫސްބަޔާނުގައި ފާހަގަކޮށްފައިވެ އެވެ. ސަރުކާރުގެ ދައުރު ނިމުމަށްފަހު، ޕާޓީގެ މަސައްކަތަށް ހުރިހާ ވަގުތެއް ހޭދަކުރައްވައި، ޕާޓީއަށް ކޮންމެހެން ގެންނަންޖެހޭ އިސްލާހުތައް ގެނައުމަށާއި، ރައްޔިތުން އެދޭގޮތަށް ޕާޓީގެ މިސްރާބު ސީދާކޮށް، ޕާޓީއަށް ކާމިޔާބު ހޯދޭނެ މަގުތައް ތަނަވަސްކުރުމަށް އެތަކެއް މަސައްކަތްތަކެއް ކުރެއްވި ކަމަށްވެސް ނޫސްބަޔާނުގައި ބުންޏެވެ.
ފައްޔާޒް އިސްމާއީލްގެ ތާއީދާއި ހިދުމަތް އަބަދުވެސް ޕާޓީއަށް ލިބޭނެކަމަށް ޔަގީންކުރާ ކަމަށާއި، ފައްޔާޒް އިސްމާއީލަށް ކާމިޔާބު މުސްތަގުބަލަކަށް ޕާޓީން އެދޭ ކަމަށްވެސް ނޫސްބަޔާނުގައި ބުނެފައިވެ އެވެ.
ފައްޔާޒް އިސްމާއީލަކީ އެމްޑީޕީގެ ނުފޫޒުގަދަ ލީޑަރުންގެ ތެރޭގައި ހިމެނޭ ބޭފުޅެކެވެ. ޕާޓީގެ ތަރައްގީއަށް އޭނާ ކޮށްދެއްވި މަސައްކަތްތަކަކީ ޕާޓީގެ ތާރީޚުގައި ފަނޑުވެގެން ނުދާނެ މަސައްކަތްތަކެއް ކަމަށް ޕާޓީގެ މެންބަރުން ފާހަގަކުރެ އެވެ.
