ހަނގުރާމަ ހުއްޓާލަން އެއްބަސްވުމަށް ފަހު އިސްރާއީލް އިން ބުނީ އީރާނާ ދެކޮޅަށް ހުރިހާ ކަމެއް ހާސިލު ވެއްޖެ ކަމަށް

އިސްރާއީލާއި އީރާނާ ދެމެދު ކުރިއަށް ދިޔަ ހަނގުރާމަ ހުއްޓާލުމަށް ދެ ޤައުމުން ވެސް އެއްބަސްވެފައިވާއިރު، އީރާނާ ދެކޮޅަށް ހިންގި އޮޕަރޭޝަން ކާމިޔާބު ވެފައިވާ ކަމަށް އިސްރާއީލް އިން ބުނެފި އެވެ. 

އިސްރާއީލް އިން ވަނީ، އީރާނާ ދެކޮޅަށް "އޮޕަރޭޝަން ރައިސިން ލަޔަން"ގެ ނަމުން ނަން ދީފައިވާ އޮޕަރޭޝަނެއް ކުރިއަށް ގެންގޮސްފަ އެވެ. މި އޮޕަރޭޝަންގެ ދަށުން އިސްރާއީލް އިން ވަނީ، އީރާންގެ ނިއުކްލިއާ ފެސިލިޓީ އަކަށް އަމާޒުކޮށް ހަމަލާ ދީފަ އެވެ. 

އޭގެ ފަހުން ދެ ޤައުމުގެ ދެ މެދުގައި ވަނީ ގިނަ ހަމަލާތަކެއް ބަދަލުކޮށްފަ އެވެ. އީރާން އިން ވެސް ވަނީ، އިސްރާއީލާ ދެކޮޅަށް ވަރުގަދަ އޮޕަރޭޝަނެއް ކުރިއަށް ގެންގޮސްފަ އެވެ. އެ އޮޕަރޭޝަންގައި އީރާން އިން ވެސް ވަނީ އިސްރާއީލަށް ނުރައްކާތެރި ހަމަލާތަކެއް ދީފަ އެވެ.

އިސްރާއީލް ސަރުކާރުގެ ވަޒީރުންގެ މަޖިލީހުގެ ބައްދަލުވުމެއްގައި ބައިވެރިވެ ވަޑައިގެން، އެ ޤައުމުގެ ބޮޑު ވަޒީރު ބެންޖަމިން ނަތަންޔާހޫ ވިދާޅުވެފައި ވަނީ، އިސްރާއީލް އިން ކުރިއށް ގެންދިޔަ އޮޕަރޭޝަން ކާމިޔާބު ކަމަށެވެ. 

ދިފާއީ ވަޒީރު އާއި މޮސާޑްގެ އިސްވެރިޔާ ވެސް ބައިވެރިވެ ވަޑައިގެންނެވި އެ ބައްދަލުވުމުގައި ނަތަންޔާހޫ ވިދާޅުވެފައި ވަނީ، އީރާންގެ ނިއުކްލިއާ އަދި ބެލިސްޓިކް މިސައިލްތަކުގެ ނުރައްކާ ނައްތާލެވިފައިވާ ކަމަށެވެ. 

އަދި އިސްރާއީލްގެ އަސްކަރިއްޔާ އަށް، އީރާންގެ މައްޗަށް ވައިގެ މަހުން ފުރިހަމަ ބާރު ހޯދިފައިވާ ކަމަށާއި، އީރާންގެ އަސްކަރިއްޔާ ލީޑާޝިޕަށް ބޮޑެތި ގެއްލުން ތަކެއް ދީ، އީރާން ސަރުކާރުގެ އެތައް ލަނޑުދަނޑިތަކެއް ނައްތާލެވިފައިވާ ކަމަށް ވެސް ވިދާޅުވެފައިވެ އެވެ. 

މީގެ އިތުރުން ނަތަންޔާހޫ ބުނެފައި ވަނީ އެމެރިކާގެ ރައީސް ޑޮނަލްޑް ޓްރަމްޕް ހުށަހަޅުއްވާފައިވާ ހަނގުރާމަ ހުއްޓާލުމުގެ އެއްބަސްވުމަށް އިސްރާއީލް އިން ފުރިހަމަ އަށް ތާއީދު ކުރާ ކަމަށާއި، އެކަން ބަލައި ގަންނަ ކަމަށެވެ. ނަމަވެސް، އެއްބަސްވުމާ ޚިލާފަށް އިސްރާއީލަށް ހަމަލާ ދީފި ނަަމަ، އޭގެ ބަދަލުގައި ނުރައްކާތެރި ހަމަލާތަކެއް ދޭނެ ކަމުގެ އިންޒާރު ވެސް ވަނީ ދީފަ އެވެ.