އިސްރާއީލަށް އަމާޒުކޮށް އީރާން އިން ދިން މިސައިލް ހަމަލާގައި އެ ޤައުމުގެ ތިން މީހަކު މަރުވެފައިވާ ކަމަށް، އިސްރާއީލްގެ ކުއްލި ނުރައްކަލުގެ ޙާލަތާ ބެހޭ އިދާރާ އިން ބުނެފި އެވެ.

އިސްރާއީލް އިން ބުނެފައި ވަނީ އެ ޤައުމުގެ ބީއާރްޝެބާ ސަރަހައްދަށް އަމާޒުކޮށް އީރާން އިން މިސައިލް ހަމަލާ ދީފައިވާ ކަމަށެވެ. އެ ހަމަލާގައި ތިން މީހަކު މަރުވެފައިވާއިރު، އިތުރު ބަޔަކަށް އެކި ވަރުގެ ޒަޚަމުތައް ލިބިފައިވާ ކަމަށް ވެސް ވަނީ ހާމަކޮށްފަ އެވެ. އީރާން އިން މި ހަމަލާ ދީފައި ވަނީ ދެ ޤައުމުގެ ދެ މެދުގައި ހަނގުރާމަ ހުއްޓާލުމުގެ އެއްބަސްވުން ޤާއިމު ކޮށްފައިވާ ކަމަށް އިއުލާން ކުރުމުގެ ކުރިންނެވެ.

އިސްރާއީލްގެ އައިއެލްޓީވީ ނިއުސް ޗެނަލް އަށް އެ ޤައުމުގެ ކުއްލި ނުރައްކަލުގެ އެޖެންސީގެ އިސްވެރިޔާ އެލީ ބިން ވވިދާޅުވެފައި ވަނީ، އެ ހަމަލާގައި ބޮޑެތި ގެއްލުންތަކެއް ލިބިފައިވާ ތިން އިމާރާތެއްގައި މީހުން ތާށިވެފައިވާ ތިބުމުގެ ބިރު އޮތް ކަމަށެވެ. އޭގެ ތެރެއިން އެއް އިމާރާތެއްގައި ހުރި ރައްކާތެރި ކަމުގެ ކޮޓަރިއަކުން ތިން މީހަކު ސަލާމަތް ކޮށްފައިވާ ކަމަށް ވެސް އޭނާ ވަނީ ވިދާޅުވެފަ އެވެ. 

ބައެއް މަސްދަރުތަކުން ސޯޝަލް މީޑިއާގައި ޝާއިއު ކުރި ވީޑިއޯ އެއްގައި، އީރާންގެ މިސައިލް ދެކުނު އިސްރާއީލްގައި ޖެހޭ މަންޒަރު ވަނީ އާންމު ކޮށްފަ އެވެ. އެ ހަމަލާ އާއެކު އިތުރު ހަމަލާއެއްގެ އިންޒާރު ލިބިފައިވާ ކަމަށް ވެސް އޭރު ވަނީ ރިޕޯޓު ކޮށްފަ އެވެ. 

މިވަގުތު އިސްރާއީލްގެ ސަލާމަތީ ބާރުތަކުން އަންނަނީ އިމާރާތްތަކުގައި ތާށިވެފައިވާ މީހުންނާއި، ގެއްލިފައިވާ މީހުން ހޯދުމުގެ މަސައްކަތް ކުރަމުންނެވެ. އަދި އެ ސަރަަހައްދުގެ ރައްޔިތުންނަށް ވަނީ ސަލާމަތީ ފިޔަވަޅުތައް އެޅުމަށް ވެސް އިލްތިމާސްކޮށްފަ އެވެ.