ހަނގުރާމައިގެ ސަބަބުން ރާއްޖެ އަށް ދިމާވެދާނެ ހާލަތުތަކަށް ފިޔަވަޅު އެޅުމަށް ގޮވާލާ މަޖިލީހަށް ގަރާރެއް ހުށަހަޅައިފި

ހަނގުރާމައިގެ ސަބަބުން ދިވެހިރާއްޖެއަށް ކުރިމަތި ވެދާނެ ދަތިތަކަށް ތައްޔާރުވުމުގެ ގޮތުން ކުރިޔާލާ ފިޔަވަޅުތައް އަޅަންވެއްޖެކަން ސަރުކާރުގެ ސަމާލުކަމަށް ގެނައުމަށް މަޖިލީހަށް ކުއްލި މައްސަލަ އެއް ހުށަހަޅައިފިއެވެ.

މަޖިލީހަށް އެ ގަރާރު ހުށަހެޅުއްވީ ގަލޮޅު ދެކުނު ދާއިރާގެ މެންބަރު މީކާއީލު އަޙްމަދު ނަސީމް އެވެ.

Advertisement

އެ ޤަރާރުގައި ބުނެފައި ވަނީ އިސްރާއީލާއި އެމެރިކާއިން އީރާނަށް ދިން ހަމަލާތަކުގެ ރައްދުގައި އިރާނުން ހަމަލާތައް ދޭން ފަށާފައިވާ ކަމަށާއި މެދުއިރުމަތީގައި މިހާރު ހަނގުރާމައެއް ހިނގަމުންދާ ހިނދު، އަދި އެ ހަނގުރާމަ އެ ސަރަހައްދުގެ އިތުރު ގައުމުތަކަށް ފެތުރިފައިވާ ކަަމށެވެ. އަދި އެތަކެއް ދުވަސްތަކަކަށް ހަނގުރާމަ ދިގުދެމިގެން ދިއުމުގެ ފުރުސަތު އެބަ އޮތްކަން ފާހަގަކޮށްފައިވެއެވެ.

އެހެންކަމަށް ވާއިރު ޤަތަރުގެ ވެރިރަށް ދޯހާގައި ހުންނަ އެމެރިކާގެ އަސްކަރީ މަރުކަޒަކަށް މި މަހުގެ 23 ވަނަ ދުވަހު އިރާނުން ހަމަލާ ދިނުމާއި ގުޅިގެން ދޯހާ އާއި ދުބާއި ފަދަ މަންޒިލްތަކުން ވައިގެ ދަތުރުފަތުރު ހުއްޓާލައިފައިވާ ކަމަށް ޙަބަރު ލިބެމުންދާ ކަމަށް ވެސް އެ ގަރާރުގައި ވަނީ ބުނެފައެވެ. ހަނގުރާމައިގެ ސަބަބުން އަދި ބައިނަލްއަޤްވާމީ ވައިގެދަތުރުފަތުރަށް ބުރޫއެރުމުގެ ސަބަބުން އެންމެ ފުރަތަމަ އަސަރުކުރާ ސިނާއަތަކީ ޓޫރިޒަމް ކަމަށް ވެސް މީކާއިލް ވަނީ އެ ގަރާރުގައި ފާހަގަކުރައްވާފައެވެ.

މިކަމުގެ ނަތީޖާ އެއްގެ ގޮތުން ދިވެހިރާއްޖެ އަށް ޓޫރިސްޓުން އައުން މަދުވެ އެކަމުގެ ނަތީޖާއެއްގެ ގޮތުން، ދައުލަތުގެ އާމްދަނީ ދަށްވުމާއި ބޭރުފައިސާ ލިބުން ނުހަނު ބޮޑަށް ދަށްވުން ފަދަ ދަތި ހާލަތެއް ދިވެހިރާއްޖެ އަށް ކުރިމަތިވުމަކީ އެކަށީގެންވާ ކަމެއް ކަމަށް ވެސް އޭނާ ފާހަގަކުރެއްވިއެވެ.

އަސާސީ ޚިދުމަތްތަކަށް ބޭނުންވާ ތެލާއި ގޭސް ފަދަ ތަކެތި މެދުނުކެނޑި އެތެރެކުރެވޭނެކަން ކަށަވަރުކުރުމާއި އެކު ބޭހާއި ކާޑުގެ ބާވަތްތަކާ، ތުއްތުކުދިންގެ ކާނާ ފަދަ ކޮންމެހެން ބޭނުންވާ ތަކެތި ހުސްނުވެ ރައްޔިތުންނަށް ލިބެން ހުންނާނެކަން ކަށަވަރުކުރުމަށްޓަކައި ފިޔަވަޅުތައް އެޅުމަކީ ސަރުކާރުގެ މައްޗަށް ލާޒިމުކަމެއް ކަމަށް ވެސް މީކާއިލް ވަނީ ވިދާޅުވެފައެވެ.

އެހެންކަމުން އެ ތަކެތީގެ ސްޓޮކް އެކަށީގެންވާ މިންވަރަށް ހުރިތޯ ނުވަތަ ނޫންތޯ ސަރުކާރުން ރައްޔިތުންނަށް އަންގަވައިދެއްވަންވާނެ ކަމަށް ދެކޭ ކަމަށް ވެސް މީކާއިލް ވިދާޅުވެފައެވެ.