ދިއްގަރު ދާއިރާގެ ގިނަ ރަށްތައް އޮތީ ކުދި އާބާދީތަކަށް ތަރައްގީ ގެނެސްދިން ފިކުރާއެކު: އިހުސާން
23 ޖޫން 2025 | ހޯމަ 13:47މަދު ރަށެއްގެ މެޖޯރިޓީ ވެސް ސަރުކާރަށް ލިބިދާނެ ކަމާމެދު ސުވާލު އުފެދޭ
ފަށާއިރު ޕްރޮގްރާމްގައި ދިއްގަރު ދާއިރާގެ ރައީސް މުހައްމަދު އިހްސާން ވާހަކަދައްކަވަނީ
ދިއްގަރު ދާއިރާގެ ގިނަ ރަށްތައް އޮތީ ކުދި އާބާދީތަކަށް ތަރައްގީ ގެނެސްދިން ފިކުރާއެކު ކަމަށާއި، ކުރިއަށް އޮތްތަނުގައި އެމްޑީޕީގެ ފިކުރު ވަރަށް ބޮޑަށް ފުޅާވާނެ ކަމަށް އެޕާޓީގެ ދިއްގަރު ދާއިރާގެ ރައީސް މުހައްމަދު އިހްސާން ވިދާޅުވެއްޖެއެވެ.
ރާއްޖެޓީވީގެ ފަށާއިރު ޕްރޮގްރާމްގައި ވާހަކަދައްކަވަމުން އިހުސާން ވިދާޅުވީ މާޒީއަށް ބަލާއިރު، ދިއްގަރުގައި އެމްޑީޕީގެ ވެރިކަންތަކަށް ނަފްރަތުކުރާ ބަޔަކު ދިރިއުޅޭ ރަށެއް ކަމަށް ބުނެވިދާނެ ކަމަށާއި، ނަމަވެސް މިހާރު މަންޒަރާއި ހާލަތު ވަރަށް ބޮޑަށް ތަފާތުވެފައިވާ ކަމަށެވެ.
އިހުސާން ވިދާޅުވީ ދިއްގަރު ރައްޔިތުންގެ އަޑު އެހީ ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުން ކަމަށާއި، ރައްޔިތުން އެދުނު ގޮތަށް ރަށުގެ ބިން ބޮޑު ކޮށްދީފައިވާ ކަމަށެވެ. ރައްޔިތުންގެ އަޑު އެހި ފިކުރާއެކު، އަބަދުވެސް ރައްޔިތުން ތިބޭނެކަން ފާހަގަކުރައްވައި އިހުސާން ވިދާޅުވީ އެރަށުގައި އޮތީ މިހާރު އެމްޑީޕީ ފިކުރު ކަމަށާއި، އެއީ ތަރައްގީގެ ފިކުރު ކަމަށެވެ. އެފިކުރުގައި ރައްޔިތުންގެ އިހުސާސްތަކާއި، ޖަޒުބާތުތައް އަޑުއެހި ކަމަށާއި، ކުރިއަށް އޮތްތަނުގައި މިފިކުރު ދާނީ ފުޅާވަމުން ކަމަށް އޭނާ ވިދާޅުވިއެވެ.
އިހުސާން ވިދާޅުވީ ކުދި އާބާދީތަކަށް ތަަރައްގީ ގެނެސްދިނީ އެމްޑީޕީގެ ފިކުރުން ކަމަށާއި، އެއަތޮޅުގެ ގިނަ ރަށްތަކުގައި އޮތީ އެފިކުރު ކަމަށެވެ. އަދި މަދު ރަށެއްގެ މެޖޯރިޓީ ވެސް ސަރުކާރަށް ލިބިދާނެ ކަމާމެދު ސުވާލު އުފެދޭ ކަމަށް އޭނާ ވިދާޅުވިއެވެ.
ދިއްގަރު ފަހަރުގައި އަޅުގަނޑުމެންނަށް ތަސްވުރު ކުރެވިފައި ހުރެދާނެ މާޒީގައި އެރަށަކީ އެމްޑީޕީގެ ވެރިކަންތަކަށް ނަފްރަތުކުރާ ބަޔަކު ދިރިއުޅޭ ރަށެކޭ. އެހެނެއް ނޫން މިހާރުގެ ހާލަތަކީ. މިރަށުގެ ކައުންސިލްއަކީ ވެސް އެންމެ މެންބަރެއް ފިޔަވައި ތިބޭނީ އަޅުގަނޑުމެންގެ އެމްޑީޕީގެ މެންބަރުން. ޑަބްލިޔުޑީސީގައި ވެސް ތިބޭނީ އެމްޑީޕީގެ މެންބަރުން. އަދި މިރަށުގެ އެންމެ ފަހުން ހިނގާދިޔަ އިންތިޚާބުތަކުގައި ބޮޑުތަނުން މިސަރުކާރުގެ ބޭފުޅުން އޮންނާނީ ބަލިކޮށްފައި. ރައްޔިތުން މަޖިލީހުގެ އިންތިޚާބުގައި ވެސް މިހާރު ރައްޔިތުން މަޖިލީހުގެ މެންބަރަކަށް ހުންނެވި ފާއިތުވި ދުވަސްތަކުގައި ވަރަށް ދިގު މުއްދަތަށް އަތޮޅު މެންބަރުކަން ކުރެއްވި ބޭފުޅެއް. އެބޭފުޅާ ދިއްގަރުން އެންމެ ތަފާތު ބޮޑުކޮށް ބަލިވެވަޑައިގެންނެވި ފަހަރު. 2024 ވަނަ އަހަރުގެ އިންތިޚާބުއެމްޑީޕީގެ ދިއްގަރު ދާއިރާގެ ރައީސް މުހައްމަދު އިހްސާން
އިހުސާން ވިދާޅުވީ މިސަރުކާރުގައި ދިއްގަރުގެ ތަރައްގީ ވެސް ހުއްޓިފައިވާ ކަމަށެވެ. އަދި ރައްޔިތުންގެ އަޑާއި ކަންބޮޑުވުންތައް ސަރުކާރާ ހިއްސާ ވެސް ނުކުރޭ ކަމަށެވެ. ނަމަވެސް މިދިޔަ ސަރުކާރުގައި ހިތްހަމަ ނުޖެހޭ ކަންކަން ހިނގުމުން އެކަންބޮޑުވުންތައް ހިއްސާ ކުރެވޭ ކަމަށާއި، ރައްޔިތުން ބޭނުންވާ ގޮތް ރައީސްއަށް ދެންނެވޭ ކަމަށާއި، މެޖޯރިޓީއާ އެއްގޮތަށް މަސައްކަތްތައް ކުރިއަށް ގެންދެވޭ ކަމަށް އިހުސާން ވިދާޅުވިއެވެ.
އިހުސާން ވިދާޅުވީ ކުރިއަށް އޮތްތަނުގައި ދިއްގަރުގެ ދާއިރާއިން ތަފާތު ދައްކާނެ ކަމަށާއި، ރައްޔިތުންގެ އަޑު ނީވޭ ސަރުކާރަށް ރައްޔިތުން ނޫނެކޭ ބުނާނެ ކަމަށެވެ.
