މެޓަރނިޓީ ލީވްއާ ގުޅިގެން އަންހެނުންނަށް ވަޒީފާ ލިބުން ދަތިވެފައިވާ މައްސަލަ ހައްލު ކުރުމަށް ގޮތްތަކެއް ހޯދަނީ
މި މައްސަލަ ސަރުކާރުގެ ސަމާލު ކަމަށް ވަނީ އައިސްފައި
ރައްޔިތުންގެ މަޖިލީހުގައި މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް ޑރ.އަލީ ހައިދަރު ވާހަކަދައްކަވަނީ
ވިހެއުމާއި ގުޅިގެން އަންހެނުންނަށް ލިބޭ ހަ މަަސް ދުވަހުގެ ޗުއްޓީގެ ސަބަބުން އަންހެނުންނަށް ވަޒީފާ ލިބުން ދަތިވެފައިވާ މައްސަލަ ހައްލު ކުރުމަށް ގޮތްތަކެއް ހޯދަމުންދާ ކަމަށް މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް ޑރ.އަލީ ހައިދަރު ވިދާޅުވެއްޖެއެވެ.
ހޯމަ ދުވަހު ކުރިއަށްދިޔަ ރައްޔިތުން މަޖިލީހުގެ ޖަލްސާގައި ރައްޔިތުން މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު ވަނީ އަންހެނުން ވިހެއުމާ ގުޅިގެން ލިބޭ މެޓަރނިޓީ ލީވްގެ ސަބަބުން އަންހެނުންނަށް ވަޒީފާ ލިބުމުގައި ދަތިތަކެއް ހުރިކަން ފާހަގަކުރައްވާފައެވެ. އިންޓަވިއުތަކުގައި ވެސް ދަރިން ހޯދަން ވިސްނާތޯ ސުވާލު ކުރާ ކަމަށާއި، މި މައްސަލަ މަޖިލީހުގެ ކޮމެޓީއަށް ވެސް ހުށަހަޅާފައިވާ ކަމަށް މެންބަރު ޒިޔާދު ވިދާޅުވިއެވެ. އެހެންކަމުން މި މައްސަލަ ސަމާލުކަމަށް އައިސްފައިގޭތޯއާއި، ހައްލު ކުރުމަށް ކުރާނެ މަސައްކަތާ ގުޅޭގޮތުން މެންބަރު ޒިޔާދު ސުވާލު ކުރެއްވިއެވެ.
މި ސުވާލުތަކަށް މިނިސްޓަރު ހައިދަރު ވިދާޅުވީ މި މައްސަލަ ސަރުކާރުގެ ސަމާލު ކަމަށް އައިސްފައިވާ ކަމަށާއި، މައްސަލަ ހައްލު ކުރުމަށް ކޮންސަލްޓޭޝަން މަސައްކަތްތައް މިހާރު ކުރިއަށް ގެންދާ ކަމަށެވެ.
އާދެ ތިއީ އަޅުގަނޑުމެންނަށް ވެސް ފާހަގަކުރެވިފައިވާ މައްސަލައެއް. ތި މައްސަލަ އަޅުގަނޑުމެން ކޮންސަލްޓޭޝަން މަސައްކަތްތަކެއް އެބަ ކުރަމޭ ތި މައްސަލަ ހައްލު ކުރުމަށް ގޮތްތަކެއް ހޯދަން އެނގޭތޯ.މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް ޑރ.އަލީ ހައިދަރު
ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި ވިހެއުމުން އަންހެނުންނަށް ހަ މަސް ދުވަހުގެ ޗުއްޓީ ލިބޭ ގޮތަށް، އަދި ފިރިހެނުންނަށް އެއް މަސް ދުވަހުގެ ޗުއްޓީ ލިބޭ ގޮތަށް ވަނީ ހަމަޖައްސާފައެވެ. 8 މާރޗް 2019 ވަނަ ދުވަހު އަންހެނުންގެ ދުވަސް ފާހަގަކުރުމަށް ބޭއްވި ޖަލްސާގައި ރައީސް ސާލިހު އެކަން އިއުލާން ކުރެއްވުމާއެކު، ސަރުކާރުގެ ގިނަ ކުންފުނިތަކާއި، އަމިއްލަ އޮފީސް ގޮތުން އެގޮތަށް ޗުއްޓީދޭ އުސޫލު ބަދަލުކުރިއެވެ.
ނަމަވެސް މި ސަރުކާރާއެކު، މިހާރު ބައެއް ކުންފުނިތަކުން އަންހެން މުވައްޒަފުންނަށް ޗުއްޓީ ދިނުމަށް ދަނީ ދެކޮޅު ހަދަމުންދާ ކަމަށް ބައެއް މުވައްޒަފުން ބުނެފައިވެއެވެ. އަދި އައު މުވައްޒަފުން ނެގުމުގައި ވެސް މާބަނޑު އަންހެނުންނަށް ފުރުސަތު ނުދޭ ކަމާއި، އަދި އިންޓަވިއުގައި ދަރިން ހޯދުމާ ގުޅޭގޮތުން ސުވާލު ކުރާކަމުގެ ޝަކުވާ ވަނީ ބޮޑުވެފައެވެ.
