އިސްރާއީލާއި އީރާންގެ ހަނގުރާމައާ ގުޅޭ ގޮތުން ސައުދީ ވަލީ އަހުދުގެ ފޯނު ކޯލުތަކެއް ޤައުމުތަކުގެ ވެރިންނަށް

އިސްރާއީލާއި އީރާނާ ދެމެދު މިހާރު ކުރިއަށް ދަމުން އަންނަ ހަނގުރާމައިގެ ތެރެއަށް އެމެރިކާ އިން ވަދެ، އީރާނަށް ހަމަލާ ދީފައި ވަނިކޮށް ސައުދީ އަރަބިއްޔާގެ ވަލީ އަހުދު މުޙައްމަދު ބިން ސަލްމާން ޤައުމުތަކުގެ ވެރިންނާ މަޝްވަރާ ކުރައްވައިފި އެވެ. 

އެގޮތުން އާދިއްތަ ދުވަހު މުޙައްމަދު ބިން ސަލްމާން ވަނީ ސަރަހައްދުގެ ލީޑަރުން އަދި ބައިނަލްއަޤުވާމީ ލީޑަރުންނާ ވެސް ފޯނުން ގުޅުއްވައި ވާހަކަ ދައްކަވައި، އަދި މަޝްވަރާ ކުރުންތައް ކުރިއަށް ގެންދަވައިފަ އެވެ. 

ސައުދީގެ ޕްރެސް އެޖެންސީ (އެސްޕީއޭ) އިން ހާމަ ކޮށްފައިވާ ގޮތުގައި، ވަލީ އަހުދު މުޙައްމަދު ބިން ސަލްމާން ވަނީ ޤަލްފު ކޯޕަރޭޝަން ކައުންސިލް (ޖީސީސީ)ގެ މެމްބަރު ޤައުމުތަކުގެ ލީޑަރުންނާ ވަކި ވަކިން ވާހަކަ ދައްކަވައިފަ އެވެ. 

އޭގެ ތެރޭގައި ބަހްރެއިން، އޮމާން، ޤަތަރު، ކުވެއިތު އަދި ޔުނައިޓެޑް އަރަބް އެމިރޭޓްސްގެ ލީޑަރުން ހިމެނޭ ކަމަށް ވެސް ވަނީ ހާމަކޮށްފަ އެވެ. އަދި އެ މަޝްވަރާތަކުގައި ވަނީ ޖީސީސީގެ މެމްބަރު ޤައުމުތަކުގެ އެއްބައިވަންތަކަމުގެ މުހިންމުކަން ވެސް ފާހަގަ ކުރައްވައިފަ އެވެ. 

މީގެ އިތުރުން އިސްރާއީލާއި އީރާނާ ދެމެދު ހިނގަމުން އަންނަ ހަނގުރާމައިގެ ސަބަބުން މެދު އިރުމަތީގެ މަޝްރަހު ހޫނުވެފައިވާ މި ދަނޑިވަޅުގައި، ސަރަހައްދުގެ ޙާލަތު އިތުރަށް ގޯސްވިޔަ ނުދިނުމަށާއި، ހުރިހާ މައްސަލަތަކެއް ވެސް ޑިޕްލޮމަޓިކް ގޮތްތަކެއް މަތިން ޙައްލު ކުރުމަށް ވެސް ވަނީ ގޮވާލައްވައިފަ އެވެ. 

މީގެ އިތުރުން ސައުދީގެ ވަލީ އަހުދު މުޙައްމަދު ބިން ސަލްމާން ވަނީ ފްރާންސްގެ ރައީސް އިމަނުއެލް މެކްރޮން، އަދި އިޓަލީގެ ބޮޑު ވަޒީރު ޖިއޯޖިއާ މެލޯނީއާ ވެސް ގުޅުއްވައި މަޝްވަރާ ކުރައްވައިފަ އެވެ. އެ މަޝްވަރާތަކުގައި ވެސް ވަނީ ޙާލަތު އިތުރަށް ގޯސްވިޔަ ނުދިނުމަށާއި، ޑިޕްލޮމެޓިކް މަގުތައް ބޭނުން ކޮށްގެން މައްސަލަތައް ޙައްލު ކުރުމުގެ މުހިންމުކަން ފާހަގަ ކޮށްފަ އެވެ.