މާލޭގެ ގެއެއްގެ ދެވަނަ ފަންގިފިލާއިން އަންހެނަކު ވެއްޓި އަނިޔާވެއްޖެ
22 ޖޫން 2025 | އާދީއްތަ 12:00އެ އަންހެން މީހާގެ ދެ ފައިގެ ކުޑަހުޅު ނެއްޓި ރެނދުލާފައިވޭ
މާލެސިޓީ
މާލޭގެ ގެއެއްގެ ދެވަނަ ފަންގިފިލާއިން އަންހެނަކު ވެއްޓި އަނިޔާވެއްޖެއެވެ.
އާދިއްތަ ދުވަހު ފުލުހުން ބުނީ، މައްޗަންގޯޅީގައި ހުންނަ ގެއެއްގެ ދެވަނަ ފަންގިފިލާއިން 42 އަހަރުގެ ދިވެހި އަންހެނަކު ވެއްޓުނު މައްސަލަ ހޮނިހިރު ދުވަހުގެ ރޭ 4:00 ހާއިރު ރިޕޯޓު ކޮށްފައިވާ ކަމަށެވެ.
މި ހާދިސާގައި އެ އަންހެން މީހާގެ ދެ ފައިގެ ކުޑަހުޅު ނެއްޓި ރެނދުލާފައިވާ ކަމަށް މައުލޫމާތު ލިބޭ ކަމަށް ފުލުހުން ބުނެ އެވެ.
އެމީހާއަށް އައިޖީއެމްއެޗްގައި ދަނީ ފަރުވާ ދެމުންނެވެ. ނަމަވެސް މިމައްސަލައާ ގުޅޭ އިތުރު ތަފްސީލެއް ހިއްސާކޮށްފައިނުވެއެވެ.
މި މައްސަލަ ފުލުހުން ގެންދަނީ އިތުރަށް ތަހުގީގު ކުރަމުންނެވެ.
މިފަހުން މާލޭގައި ފުރާޅެއްގެ މައްޗަށް ޒުވާން އަންހެނެއް ވެއްޓިފައި އޮއްވާ ފެނުނު ހާދިސާއަކީ ގިނަ ބައެއްގެ ސަމާލުކަން ލިބުނު ހާދިސާއެކެވެ. އޭޕްރީލް މަހުގެ 18 ވަނަ ދުވަހު ހ. ފެންޓެނޯއީ ގެއިން ގުދަނެއްގެ ފުރާޅު މައްޗަށް ވެއްޓިފައި އޮއްވައި ފެނުނު ހައްވާ ޔުމްނު ރަޝީދު މައްސަލަ ސީރިއަސް މައްސަލައެއްގެ ގޮތުގައި ތަހުގީގު ކުރަމުންދާއިރު، ޔުމްނު ވައްޓާލީ ކަމަށް އެއާއިލާއިން ބުނެފައިވެއެވެ.
