އެމެރިކާގެ ހަމަލާއާ ގުޅިގެން، ދިފާއުގައި އީރާން އިން ހުރިހާ އޮޕްޝަންތަކެއް ބޭނުން ކުރާނެ

އީރާނަށް އަމާޒުކޮށް އެމެރިކާ އިން ދިން ހަމަލާއާ ގުޅިގެން، އެކަމުން ދިފާއުވުމަށް އީރާން އިން ހުރިހާ އޮޕްޝަންތަކެއް ބޭނުން ކުރާނެ ކަމަށް، އީރާންގެ ޚާރިޖީ ވަޒީރު އައްބާސް އަރާގްޗީ ވިދާޅުވެއްޖެ އެވެ.

އަރާގްޗީ އޭނާގެ ރަސްމީ އެކްސް އެކައުންޓުގައި ކޮށްފައިވާ ޕޯސްޓެއްގައި ވިދާޅުވެފައި ވަނީ، އެމެރިކާގެ އެ ހަމަލާތަކަކީ ނުރައްކާތެރި އަދި ދާއިމީ ނަތީޖާތަކެއް ނިކުންނާނެ ހަމަލާތަކެއް ކަމަށެވެ. އަދި އެ ހަމަލާތަކަކީ ބައިނަލްއަޤުވާމީ ގޮތުން ހެދިފައިވާ ޤާނުނުތަކާ ޚިލާފު ހަމަލާތަކެއް ކަމަށް ވެސް އަރާގްޗީ ވަނީ ވިދާޅުވެފަ އެވެ.

އަރާގްޗީ ވިދާޅުވެފައި ވަނީ އދ ގެ ޗާޓަރާ އެއްް ގޮތްވާ ގޮތުގެ މަތިން، އަމިއްލަ ޤައުމުގެ ދިފާއުގައި މަސައްކަތް ކުރުމުގެ ފުރުސަތު އީރާނަށް އޮންނާނެ ކަމަށެވެ. އެގޮތުން އީރާންގެ އިސްތިޤުލާލާއި، މަސްލަޙަތު އަދި ޤައުމުގެ ރައްޔިތުންގެ ހިމާޔަތަށްޓަކައި ކުރެވެހެން ހުރި ހުރިހާ ކަމެއް އީރާނުން ކުރާނެ ކަމަށް ވެސް ވަނީ ބުނެފަ އެވެ.

އާދީއްތަ ދުވަހު އަރާގްޗީ މިހެން ވިދާޅުވެފައި މި ވަނީ، އީރާނަށް އަމާޒުކޮށް އެމެރިކާ އިން ދިން ހަމަލާއާ ގުޅިގެން، އޭގެ ރައްދުގައި އީރާން އިން ވެސް ހަމަލާތަކެއް ދޭނެ ކަމަށް ރިޕޯޓުތަކުގައި ބުނެފައި ވަނިކޮށެވެ. އަދި އެމެރިކާގެ ހަމަލާތައް ޤައުމުތަކުން ކުށްވެރި ކުރަމުން ވެސް އަންނަ ވަގުތެއްގަ އެވެ.

އެމެރިކާ އިން އީރާނަށް ހަމަލާ ދިނުމާ ގުޅިގެން، އީރާނާއި އެމެރިކާއާ ދެމެދު އޮތް ގުުޅުމަށް އިތުރަށް ބުރޫއަރާނެ ކަމަށް ސަރަހަައްދީ މާހިރުން ވަނީ ފާހަގަ ކޮށްފަ އެވެ. އަދި އެކަމުގެ ސަބަބުން ދެ ޤައުމުގެ ދެ މެދުގައި އިތުރު މައްސަލަތަކެއް ޖެހި، ސަރަހައްދީ ހަމަނުޖެހުމަކަށް މަގު ފަހި ވާނެ ކަމަށް ވެސް ވަނީ ލަފާ ކޮށްފަ އެވެ. 

ވަކިން ޚާއްސަކޮށް ނިއުކްލިއާ ޕްރޮގްރާމާ ގުޅޭ ގޮތުން ދެ ޤައުމުގެ ދެ މެދުގައި އޮތް ދެބަސްވުންތައް އިތުރަށް ބޮޑުވެ، އެކަމުގެ ގުޅުން ވެސް ގޯސްވެދާނެ ކަމުގެ ބިރު އަންނަނީ ފާޅު ކުރަމުންނެވެ.