އީރާންގެ ހަމަލާ ތަކުގައި އިސްރާއީލްގެ 11 މީހަކު ޒަޚަމުވެއްޖެ
އިސްރާއީލްގެ ކުއްލި ނުރައްކަލުގެ ޚިދުމަތް ދެމުން އަންނަ ފަރާތްތަކުން ބުނެފައިވާ ގޮތުގައި، އިސްރާއީލްގެ 10 ސަރަހައްދަކަށް ވަނީ އީރާންގެ މިސައިލްގެ ބައިތައް ވެއްޓިފައި.
އިސްރާއީލަށް އަމާޒުކޮށް އީރާން އިން ފޮނުވާލި މިސައިލް ހަމަލާތައް
އިސްރާއީލަށް އަމާޒުކޮށް އީރާން އިން ފޮނުވާލި މިސައިލް ހަމަލާތަކުގައި 11 މީހަކު ޒަޚަމުވެފައިވާ ކަމަށް، ކުއްލި ނުރައްކަލުގެ ޚިދުމަތް ދެމުން އަންނަ ފަރާތްތަކުން ބުނެފި އެވެ.
އީރާން އިން ވަނީ އިސްރާއީލަށް އަމާޒުކޮށް އާދީއްތަ ދުވަހު މިސައިލް ހަމަލާތަކެއް ފޮނުވާލައިފަ އެވެ. މިއީ އީރާނަށް އަމާޒުކޮށް އެމެރިކާ އިން ހަމަލާ ދިން ފަހުން، އީރާން އިން ދިން ފުރަތަމަ ހަމަލާ އެވެ. މި ހަމަލާތައް އަމާޒު ކުރުމާ އެކު، އިސްރާއީލްގެ އަސްކަރިއްޔާ އިން ވަނީ އިންޒާރު ވެސް ދީފަ އެވެ.
އިސްރާއީލްގެ ކުއްލި ނުރައްކަލުގެ ޚިދުމަތް ދެމުން އަންނަ ފަރާތްތަކުން ބުނެފައިވާ ގޮތުގައި، އިސްރާއީލްގެ 10 ސަރަހައްދަކަށް ވަނީ އީރާންގެ މިސައިލްގެ ބައިތައް ވެއްޓިފަ އެވެ. އޭގެ ތެރޭގައި ކާމެލް، ހައިފާ، ތެލް އަވީވް އަދި އުތުރު ސަރަހައްދުގެ ކަނޑު ކައިރީގެ ހިސާބުތައް ވެސް ހިމެނެ އެވެ.
މި ހަމަލާތަކުގައި އިސްރާއީލްގެ 11 މީހަކު ވަނީ ޒަޚަމުވެފަ އެވެ. އޭގެ ތެރެއިން އެކަކަށް ޒަޚަމުވެފައި ވަނީ މިސައިލްގެ ބައިތައް އަމާޒުވެގެން ކަމަށް ވެސް ވަނީ ބުނެފަ އެވެ. ޓައިމްސް އޮފް އިސްރާއީލްގައި ބުނެފައިވާ ގޮތުން، އަނެއް 10 މީހުންނަށް ލިބިފައި ވަނީ ކުދި ކުދި ޒަޚަމުތަކެކެވެ.
އިސްރާއީލްގެ ހޯމް ފްރަންޓް ކޮމާންޑުން ވަނީ މިހާރު ހަމަލާތައް ނިމުމަކަށް އައިސްފައިވާ ކަމަށާއި، އާންމު ރައްޔިތުން ޝެލްޓަރުތަކުން ނިކުތުމުގެ ހުއްދަ ވެސް ދީފަ އެވެ. އަދި ކުއްލި ޚިދުމަތްތަކުން މިހާރު ދަނީ މިސައިލްތައް ވެއްޓުނު ސަރަހައްދުތަކުގައި މަސައްކަތް ކުރަމުންނެވެ.
