އީރާާންގެ އިތުރު ދެ ކޮމާންޑަރަކު ޝަހީދު ކޮށްލާފައިވާ ކަމަށް އިސްރާއީލް އިން ބުނެފި 

އިސްރާއީލާއި އީރާނާ ދެމެދު ހިނގަމުން އަންނަ ހަނގުރާމައިގައި، އީރާން ރިވޮލިއުޝަނަރީ ގާޑްސް ކޯޕްސް (އައިއާރުޖީސީ)ގެ އިސް ދެ ކޮމާންޑަރަކު ޝަހީދުކޮށްލާފައިވާ ކަމަށް އިސްރާއީލްގެ އަސްކަރިއްޔާ އިން ބުނެފި އެވެ. 

އިސްރާއީލްގެ އަސްކަރިއްޔާ އިން ބުނެފައި ވަނީ، އީރާންގެ ވެރި ރަށް ތެހެރާން ގައި ދިން ހަމަލާއެއްގައި ބެންހަމް ޝަރިޔާސީ ނަމަކަށް ކިޔާ ކޮމާންޑަރަކު ޝަހީދު ކޮށްލާފައިވާ ކަމަަށެވެ. އަދި އޭނާ ޝަހީދު ކޮށްލާފައި ވަނީ، އޭނާގެ އުޅަނދަކަށް އަމާޒުކޮށް ދެެވުނު ހަމަލާއެއްގައި ކަމަށް ވެސް ވަނީ ބުނެފަ އެވެ.

މީގެ އިތުރުން ތެހެރާންގައި މި ހަމަލާ ދީފައި ވަނީ، އޭގެ ކުރިން ގޮން ޕްރޮވިންސްގައި ހުރި އެޕާޓްމަންްޓަކަށް ދިން ހަމަލާއެއްގައި އެހެން ކޮމާންޑަރަކު ޝަހީދު ކޮށްލާފައި ކަމަށް ވެސް ބުނެފައިެ އެވެ. 

އިސްރާއީލްގެ އަސްކަރިއްޔާ އިން ބުނެފައިވާ ގޮތުގައި ޝަރިޔާރީ އަކީ، މެދު އިރުމަތީގެ ސަރަހައްދުގައި ހުރި އީރާންގެ ގުޅުން ހުރި ޖަމާއަތަކަށް ހަތިޔާރު ފޯރުކޮށްދިނުމުގައި އިސްކޮށް އުޅޭ މީހެކެވެ. އެގޮތުން ހިޒްބުﷲ ޖަމާއަތާއު، ހަމާސް ޖަމާއަތުގެ އިތުރުން، ޔަމަންގެ ހޫތީން އަށް މިސައިލްތަކާއި، ރޮކެޓުތައް ފޯރުކޮށްދޭ ކަމަށް ވެސް ވަނީ ބުނެފަ އެވެ. 

ޤުދުސް ފޯސް އަކީ 1982 ވަނަ އަހަރު ލުބުނާންގައި ހިޒްބުﷲ އުފެއްދުމާއި، ޣައްޒާގައި ހަމާސް އަށް އެހީތެރިވުމުގައި މުހިންމު ދައުރެއް އަދާކުރި ބާރެކެވެ. ނަމަވެސް ފާއިތުވި ދެ އަހަރު ތެރޭގައި އިސްރާއީލްގެ ހަމަލާތަކުގައި އީރާނާ ގުޅުންހުރި މި ނެޓްވޯކަށް ބޮޑެތި ގެއްލުންތަކެއް ވަނީ ލިބިފަ އެވެ.

އިސްރާއީލް އިން، އީރާންގެ ދެ ކޮމާންޑަރަކު ޝަހީދު ކޮށްލާފައިވާ ކަމަށް ބުނެފައިވީ ނަމަވެސް، އީރާނުގެ އިސްލާމިކް ރެވޮލިއުޝަނަރީ ގާޑްސް ކޯޕްސް (އައިއާރުޖީސީ) އިން މި ދެ ކޮމާންޑަރުން ޝަހީދުވެފައިވާ ކަމަށް މިހާތަނަށް ކަށަވަރު ކޮށްދީފައި ނުވެ އެވެ.

އިސްރާއީލް އިން މީގެ ކުރިން ވެސް ވަނީ އީރާންގެ އައިއާރުޖީސީގެ އިސް ކޮމާންޑަރުންތަކެއް ޝަހީދުކޮށްލައިފަ އެވެ. އެގޮތުން މި ފަހުން އީރާންގެ ނިއުކްލިއާ ފެސިޓީ އަކަށް އަމާޒުކޮށް ދިން ހަމަލާގައި، އިސް ކޮމާންޑަރުންތަކެއްގެ އިތުރުން، ސައިންޓިސްޓުން ތަކެއް ވެސް ވަނީ ޝަހީދު ކޮށްލައިފަ އެވެ.