ކުރީ ސަރުކާރުން އިމާރާތްކުރި 4000 ހައުސިން ޔުނިޓްތަކަކީ ރައްޔިތުންނަށް ލިބޭ ރަނގަޅު ފެންވަރުގެ ބޯހިޔާވަހިކަމެއް: މިނިސްޓަރު މުއްތަލިބު
20 ޖޫން 2025 | ހުކުރު 07:53މި މަޝްރޫއުގެ މަސައްކަތްތައް ވަރަށް ބާރު ސްޕީޑްގައި ކުރިއަށްދޭ، ކޮލެޓީ ވެސް ރަނގަޅު
ގެދޮރުވެރިޔާގެ ދަށުން ދޫކުރާ ފްލެޓެއް
ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި ގެދޮރުވެރިޔާ ސްކީމްގެ ދަށުން އިމާރާތްކުރި 4000 ހައުސިން ޔުނިޓްތަކަކީ ރައްޔިތުން ހިތްހަމަޖެހޭނެ، އެ ރައްޔިތުންނަށް ލިބޭ ރަނގަޅު ފެންވަރުގެ ބޯހިޔާވަހިކަމެއް ކަމަށް ހައުސިން އަދި ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެއެވެ.
ބުރާސްފަތި ދުވަހު ފްލެޓުތަކުގެ މަސައްކަތްތައް ކުރިއަށްދާ ސަރަހައްދުގައި ހުންނަވައި މީޑިއާތަކަށް ދެއްވި އިންޓަވިޔުއެއްގައި މިނިސްޓަރު މުއްތަލިބު ވިދާޅުވީ، މިމަޝްރޫއުގެ މަސައްކަތްތައް ވަރަށް ބާރު ސްޕީޑްގައި ކުރިއަށްދާ ކަމަށާއި، ކޮލެޓީ ވެސް ރަނގަޅު ކަމަށެވެ. އަދި ފަހި ދިރިއުޅުން ކޯޕަރޭޝަން (އެފްޑީސީ) ކޮންޓްރެކްޓަރާ ގުޅިގެން ވަރަށް ރަނގަޅަށް މަސައްކަތްތައް ކުރިއަށް ގެންދާ ކަމަށް ވިދާޅުވިއެވެ.
ފްލެޓުތައް ނިމެމުންދާ ވަރަކަށް އެފްލެޓުތަކުގެ ހައްގުވެރިންނަށް ހަވާލު ކުރުމުގެ މަސައްކަތް ކުރިއަށް ގެންދާނެކަން ފާހަގަކުރައްވައި މިނިސްޓަރު މުއްތަލިބު ވިދާޅުވީ ޖުލައި މަހުގެ ތެރޭގައި އެއްބަސްވުންތައް ހަދައި، ހަވާލު ކުރުމުގެ މަސައްކަތް ފަށާނެ ކަމަށެވެ.
މިގޮތަށް ހަވާލު ކުރުމުގެ މަސައްކަތް ކުރިއަށް ގެންދާއިރު ޕްރޮޖެކްޓްގެ ސްކޯޕްގެ ތެރޭގައި ހިމެނިފައިނުވޭ ފެނާއި، ނަރުދަމާ ކަރަންޓު ގުޅުމުގެ މަސައްކަތެއް. އެހެންވީމަ އަޅުގަނޑުމެން ސްޓެލްކޯއާއި، އެމްޑަބްލިޔުއެސްސީއާ ގުޅިގެން ވީހާ ވެސް އަވަހަށް ޚިދުމަތް ދިނުމުގެ މަސައްކަތް ކުރިއަށް މިގެންދަނީ. އެހެންވީމަ އެ ޚިދުމަތްތައް ގުޅި މަސައްކަތްތައް ނިމިފައި ހުރި ޓަވަރުތަކަށް މީހުން ވެއްދޭ ހިސާބަށްދާއިރުގައި އިރާދަކުރެއްވިއްޔާ އަޅުގަނޑުމެންނަށް އެޓަވަރުތަކުން ފްލެޓުތައް ލިބިފައިވާ ފަރާތްތަކަށް އެގްރިމެންޓްކޮށްގެން އެފަރާތްތަކަށް ފްލެޓުތަކަށް ވަނުމުގެ ފުރުސަތު ލިބިގެންދާނެ. އެހެންވީމަ އަޅުގަނޑުމެން އުންމީދުކުރަނީ ޖުލައި މަސްތެރޭގައި އެގްރިމެންޓް ހެދުމުގެ މަސައްކަތާއި، އަދި ތަން ހަވާލުކުރުމުގެ މަސައްކަތް ކުރިއަށް ގެންދެވޭނެ ކަމަށް. ދެން މިއީ އެއް ފަހަރާ ކުރިއަށް ގެންދެވޭނެ ކަމަކަށްވުރެ ބޮޑަށް މަސައްކަތް ނިމެމުންދާ ވަރަކަށް ހަވާލުކުރަމުން ގެންދެވޭނީ.ހައުސިން އަދި ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު
މިނިސްޓަރު މުއްތަލިބު ވިދާޅުވީ މި އަހަރުގެ ސެޕްޓެމްބަރު މަސް ނިމުމުގެ ކުރިން 4000 ފްލެޓު ދޫކޮށް، އެތަންތަނުގައި މީހުންނަށް ދިރިއުޅެވޭނެ ކަމަށެވެ. އަދި އެ އަމާޒުގައި މަސައްކަތްތައް ކުރިއަށް ގެންދާ ކަމަށާއި، ރައްޔިތުންނަށް މިލިބޭ ފްލެޓުތަކަކީ ރަނގަޅު ފެންވަރެއްގެ ފްލެޓުތަކެއް ކަމަށާއި، ރައްޔިތުން ހިތްހަމަޖެހޭނެ ތަނެއް ކަމަށެވެ. މިއީ ރައްޔިތުންނަށް ފޯރުކޮށްދެވޭ އެކަށީގެންވާ ބޯހިޔާވަހިކަމެއް ކަމަށް މިނިސްޓަރު މުއްތަލިބު ވިދާޅުވިއެވެ.
އެހެންވީމަ ހަގީގަތުގައި ވަރަށް ބޮޑެތި ވަރަށް ބައިވަރު މަސައްކަތްތަކެއް އެފްޑީސީންނާ ކޮންޓްރެކްޓަރު ކޮށްފައި މިހުރީ. އެފްޑީސީން ކޮށްފައިހުރި މަސައްކަތަށް އަޅުގަނޑުމެން ވަރަށް ބޮޑަށް ބަލައިގަނެ ޝުކުރު އަދާކުރަން. އިރާދަކުރެއްވިއްޔާ ރައްޔިތުންނަށް މިލިބިގެންދާ ފްލެޓުތަކަކީ ރަނގަޅު ފެންވަރެއްގެ ރައްޔިތުން ހިތްހަމަޖެހޭ ފެންވަރުގެ ރަނގަޅު ދިރިއުޅުމެއް އުޅުމަށް އެކަށީގެންވާ ބޯހިޔާވަހިކަމެއްގެ ގޮތުގައި އަޅުގަނޑުމެން ގަބޫލުކުރަނީ.ހައުސިން އަދި ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު
މި 4000 ހައުސިން ޔުނިޓްތަކަކީ ކުރީ ސަރުކާރުގައި އިމާރާތްކޮށް، ސްޓަރަކްޗަރގެ ހުރިހާ މަސައްކަތެއް ނިންމާފައިވާ މަޝްރޫއެކެވެ. އަދި ފްލެޓު ލިބޭނެ މީހުންގެ ލިސްޓްވެސް ފައިނަލް ކޮށްފައިވެއެވެ. ނަމަވެސް މިސަރުކާރުން ފުރަތަމަ ވަނީ އެލިސްޓަށް ފްލެޓުތައް ދޫކުރުމަށް ދެކޮޅު ހަދައި، މައްސަލަތަކެއް ބަލާކަން ހާމަކޮށްފައިވެއެވެ. މިސަރުކާރަށް ދޮޅު އަހަރުވެގެން ދިޔައިރު ވެސް މި މައްސަލަ ނިންމިފައިނުވާތީ، އަދި ގާނޫނީ ގޮތުން ކުރެވޭނެ ކަމަކަށްނުވާތީ ގިނަ ބައެއްގެ ފާޑުކިޔުން އަމާޒުވުމާއި ގުޅިގެން ކުރީ ސަރުކާރުގެ ފްލެޓު ލިސްޓަށް ފްލެޓުތައް ދޫކުރަން ނިންމައި އެކަން 29 މެއި 2025 ގައި ބޭއްވި ނޫސްވެރިންގެ ބައްދަލުވުމެއްގައި ހާމަކުރިއެވެ.
