އޭޕްރީލް މަހުގެ 18 ވަނަ ދުވަހު ހ. ފެންޓެނޯއީ ގެއިން ގުދަނެއްގެ ފުރާޅު މައްޗަށް ވެއްޓިފައި އޮއްވައި ފެނުނު ހައްވާ ޔުމްނު ރަޝީދުގެ މައްސަލައިގެ ތަހުގީގު ރިޕޯޓު ނިންމައި ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު އަށް އަރުވާފައިވާ ކަމަށް ރިޔާސީ ކޮމިޝަނުން ބުނެފި އެވެ.

ޔުމްނު ވެއްޓުނު މައްސަލައިގެ ތަހުގީގު ކުރިއަށް ގެންދާ ގޮތާ މެދު ހިތްހަމަ ނުޖެހި ގިނަ އަދަދެއްގެ ޒުވާނުން މަގު މައްޗަށް ނުކުމެ، އިންސާފު ހޯދައި ދިނުމަށް ގޮވާލައި މުޒާހަރާ ކުރަން ފެށުމުން ރައީސް މުޢިއްޒު ވަނީ ރިޔާސީ ކޮމިޝަނެއް އުފައްދަވައިފަ އެވެ.

އެގޮތުން ރައީސް މުޢިއްޒު ވަނީ 2025 އޭޕްރީލް 27 ވަނަ ދުވަހު ރިޔާސީ ކޮމިޝަން އުފައްދަވައިފަ އެވެ. އެންމެ ފުރަތަމަ އެ ކޮމިޝަންގެ މެމްބަރުންގެ ގޮތުގައި ތިއްބެވީ ތިން މެމްބަރުންނެވެ. ފަހުން ވަނީ ކޮމިޝަންގެ މެމްބަރުން ބަދަލު ކުރައްވައި، ފަސް މެމްބަރުންގެ ކޮމިޝަނަކަށް ބަދަލު ކުރައްވައިފަ އެވެ.

ނަމަވެސް މި ކޮމިޝަނަށް އިތުބާރު ނެތް ކަމަށް ޔުމްނުގެ އާއިލާގެ އިތުރުން އަދި އާންމު ރައްޔިތުން އޭރު ވަނީ ބުނެފަ އެވެ. ރައީސް މުޢިއްޒު އުފެއްދެވި ރިޔާސީ ކޮމިޝަނުގެ ރައީސް އަކީ ކުރީގެ ބަންޑާ ރަނައިބު ޑރ. މުހައްމަދު މުނައްވަރު އެވެ.

މީގެ ކުރިން އެ ކޮމިޝަން އިން ބުނެފައި ވަނީ ގާތް ގަނޑަަކަށް ދެ ހަފުތާއެއްހާ މުއްދަތުގެ ތެރޭގައި ކޮމިޝަންގެ ރިޕޯޓު ރައީސް މުޢިއްޒު އަށް އަރުވާނެ ކަމަށެވެ. އަންގާރަ ދުވަހު ރިޔާސީ ކޮމިޝަން އިން އެކްސް ގައި ކޮށްފައިވާ ޕޯސްޓެއްގައި ބުނެފައި ވަނީ ކޮމިޝަންގެ ރިޕޯޓު ރައީސް މުޢިއްޒު އަށް އަރުވާފައިވާ ކަމަށެވެ. ނަމަވެސް އެކަމާ ގުޅޭ އިތުރު ތަފްސީލެއް ކޮމިޝަން އިން ދީފައި ނުވެ އެވެ.

ކޮމިޝަންގެ އެ ޕޯސްޓު ރީ ޕޯސްޓު ކުރައްވައި ރައީސް މުޢިއްޒު އެކްސްގައި ވިދާޅުވެފައި ވަނީ ކޮމިޝަންގެ ރިޕޯޓު ލިބިފައިވާ ކަމަށާއި، އެ ރިޕޯޓު އާންމު ކުރެއްވުމަށް ރިޔާސީ ކޮމިޝަނަށް އަންގަވާފައިވާ ކަމަށެވެ. ނަމަވެސް، އެ ރިޕޯޓު އާންމު ކުރާނެ ތާރީޚެއް ރައީސް ވެސް ވިދާޅުވެފައި ނުވެ އެވެ.

ރައީސް މުޢިއްޒު އުފެއްދެވި ރިޔާސީ ކޮމިޝަނުން ޔުމްނު ވެއްޓުނު މައްސަލައިގެ ރިޕޯޓު ނިންމައި ރައީސަށް އަރުވާފައިވާއިރު، މި މައްސަލަ އަކީ އާންމުންގެ މެދުގައި ނުހަނު ކަންބޮޑުވުން އޮތް މައްސަލަ އެކެވެ. ޚާއްސަކޮށް މި މައްސަލައިގެ ތަހުގީގު ކުރިއަށް ގެނދިޔަ ގޮތާ މެދު ގިނަ ބައެއްގެ ނުރުހުން އަމާޒުވެފައިވެ އެވެ.