މި ސަރުކާރަށް ދައުލަތުގެ ހަރަދު ނުހިފެހެއްޓޭ، މަސައްކަތް ކުރަނީ ކަތީބު ޒަމާން ގެނައުމަށް: މެންބަރު މީކާއިލް
ލާމަރުކަޒީ ނިޒާމަކީ ޕީއެންސީގެ ފިކުރު ގަބޫލުކުރާ ނިޒާމެއް ނޫން
ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވާހަކަދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރަށް ދައުލަތުގެ ހަރަދު ނުހިފެހެއްޓޭ ކަމަށާއި، މަސައްކަތް ކުރަނީ ކަތީބު ޒަމާން ގެނައުމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވިދާޅުވެއްޖެއެވެ.
ހޯމަ ދުވަހު ރައްޔިތުން މަޖިލީހުގެ ޖަލްސާގައި ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ނިޒާމަށް ދިމާވެފައިވާ ދަތިތަކާއި، ގޮންޖެހުންތަކާ ހުށަހަޅާ ގަރާރަށް ބަހުސް ކުރައްވަމުން މެންބަރު މީކާއިލް ވިދާޅުވީ ލާމަރުކަޒީ ނިޒާމަކީ ޕީއެންސީގެ ފިކުރު ގަބޫލުކުރާ ނިޒާމެއް ނޫން ކަމަށާއި، ލާމަރުކަޒީ ނިޒާމު ގަބޫލުނުކުރާ މިންވަރު ހާމަވެފައިވާ ކަމަށެވެ.
މިއަދު ވެރިކަމުގައި ތިއްބެވީ ކުރީގެ ރައީސް އަބްދުﷲ ޔާމީން މި ނިޒާމު ގަބޫލުފުޅު ނުކުރައްވާ ކަމަށް ވިދާޅުވިއިރު، އެކަމަށް އަތް ޖެއްސެވި ބޭފުޅުންކަން ފާހަގަކުރައްވައި މެންބަރު މީކާއިލް ވިދާޅުވީ އެބޭފުޅުން ލާމަރުކަޒީ ނިޒާމު ހަރުދަނާ ކުރާ ވާހަކަ ދެއްކެވުމުން އެކަން ދެކޮޅު ނުޖެހޭ ކަމަށެވެ.
މި ނިޒާމަށް ގެންނަން ބޭނުންވާ ބަދަލު މާކުރިން ރައީސް ޑރ.މުހައްމަދު މުއިއްޒު ނިންމަވައި، އެކަން އިއުލާން ކުރައްވާފައިވާ ކަމަށް ވެސް މެންބަރު މީކާއިލް ވިދާޅުވިއެވެ. އަދި ވިދާޅުވީ ރައީސް މުއިއްޒު ބޭނުންފުޅުވެވަޑައިގަންނަވާ ގޮތަކަށް އެކަމެއް ވާނެ ކަމަށާއި، ރައްޔިތުން މަޖިލީހުގައި މި ބަހުސް ކުރިއަށް ގެންދިއުމަކީ ވެސް ބޭކާރު ކަމެއް ކަމަށް އޭނާ ވިދާޅުވިއެވެ.
މީގެ އިތުރުން މެންބަރު މީކާއިލް ވިދާޅުވީ ކައުންސިލްތަކަށް ކުރާ ހަރަދު ބޮޑުވާ ވާހަކަ މިސަރުކާރުން ބުނާއިރު، މިދިޔަ އަހަރަށް ވުރެ މިއަހަރުގެ ޕޯ ރޯލް ބޮޑުވެފައިވާ ކަމަށެވެ. އަދި މިސަރުކާރަށް ދައުލަތުގެ ހަރަދުތައް ނުހިފެހެއްޓޭ ކަމަށް މެންބަރު މީކާއިލް ވިދާޅުވިއެވެ.
ކައުންސިލްގެ މުސާރަ ބޮޑުވެގެން ކައުންސިލްތަކުގެ އަދަދު ގިނަވެގެން މާ ބޮޑު ކަންބޮޑުވުމަކަށް ރައްޔިތުންނަށްވާ ކަމަށް މިރައްޔިތުންގެ މަޖިލީހުން ވާހަކަ ދެކެވޭއިރު، މިދިޔަ އަހަރަށް ވުރެ މިއަހަރުގެ ދައުލަތުގެ ޕޭ ރޯލް 400 މިލިއަނަށް ވުރެ މިހާރު ބޮޑު. ކޮބައިތޯ ހަރަދު ކުޑަކުރުން. ކޮބައިތޯ ސިޔާސީ މަގާމުތަކަށް އައްޔަން ކުރި މީހުންގެ އަދަދު. ރައީސުލްޖުމްހޫރިއްޔާ ހަމަ ތަކުރާރުކޮށް މީޑިއާ ބައްދަލުކުރައްވާ ކޮންމެ ފަހަރަކު މި ރައްޔިތުންގެ މަޖިލީހަށް މި ގައުމަށް އެޑްރެސް ކުރައްވަން ވަޑައިގަންނަވާ ކޮންމެ ފަހަރަކު އެބަ ވިދާޅުވޭ ހާމަކުރައްވާނަމޭ. ކޮބައިތޯ އެ ހާމަކުރެއްވުން.ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް
މެންބަރު މީކާއިލް ވިދާޅުވީ މިސަރުކާރަށް އަދިވެސް ސިޔާސީ މަގާމުތަކުގެ އަދަދު ހާމަނުކުރެވޭ ކަމަށާއި، އެމަގާމުތަކަށް ބޭފުޅުން އައްޔަން ކުރެއްވުމުގައި ނިމުމެއް ކަމަށެވެ.
ޑެޕިއުޓީ މިނިސްޓަރުންނާއި، ކުންފުނިތަކަށް އައްޔަން ކުރައްވާ ބޭފުޅުންނަކީ މީގެ ކުރީގައި ދައުލަތަށް ބޮޑެތި ގެއްލުންތައް ދީފައިވާ ބޭފުޅުން ކަމަށާއި، އެބޭފުޅުންނަށް ދައުލަތުން 30،000 ރުފިޔާ، 40،000 ރުފިޔާ އަދި 50،000 ރުފިޔާއިން ހަރަދު ކުރުމަށްފަހު، ރައްޔިތުން ރުޖޫއަ ކުރުމަށް މަސައްކަތް ކުރަނީ ކަތީބުގެ ޒަމާނަށް ކަމަށެވެ. ނަމަވެސް މިއީ ބަލައިގަނެވޭނެ ކަމެއް ނޫން ކަމަށް މެންބަރު މީކާއިލް ވިދާޅުވިއެވެ.
