އިސްރާއީލާއި އީރާނާ ދެމެދު މިހާރު ހިނގަމުން އަންނަ ހަނގުރާމައިގައި، އީރާންގެ ރޫޙާނީ ލީޑަރު އާޔަތުﷲ އަލީ ޚާމަނާއީ އަވަހާރަކޮށްލަން އިސްރާއީލް އިން ރޭވި ކަމަށާއި، އެކަން ހުއްޓުވީ އެމެރިކާގެ ރައީސް ޑޮނަލްޑް ޓްރަމްޕް ކަމަށް އެމެރިކާގެ އިސް އޮފިޝަލަކު ބުނެފި އެވެ.

އެމެރިކާގެ ދެ އޮފިޝަލަކު ހާމަކޮށްފައިވާ މި މައުލޫމާތުތައް މީޑިއާ ތަކުގައި މިހާރު އަންނަނީ ދައުރު ކުރަމުންނެވެ. އެގޮތުން އިސްރާއީލް އިން އީރާންގެ ނިއުކްލިއާ ފެސިލިިޓީ ކަމަށް އަމާޒުކޮށް ދާދި ފަހުން ދިން ހަމަލާއާ ގުޅިގެން، އެމެރިކާގެ އިސް އޮފިޝަލުން އަންނަނީ އިސްރާއީލްގެ އޮފިޝަލުންނާ އެކު ގާތް މުއާމަލާތްތަކެއް ކުރަމުން ކަމަށް އެ ދެ އޮފިޝަލުން ވަނީ ބުނެފަ އެވެ. 

މީގެ އިތުރުން އެ ދެ އޮފިޝަލުން ބުނެފައިވާ ގޮތުގައި، މިހާތަނަށް އައިއިރު އީރާން އިން އެމެރިކާގެ އެއްވެސް ރައްޔިތަކު މަރާލާފައި ނެތް ކަމަށާއި، އެފަދަ ކަމެއް ހިނގުމުގެ ކުރިން އީރާންގެ ސިޔާސީ އިސްވެރިން އަދި ލީޑާޝިޕަށް އަމާޒުކޮށް ނުރައްކާވާ ފަދަ ވާހަކަ ދެއްކުން ނުވަތަ ހަމަލާ ދިނުމަކީ ކޮށްގެން ވާނެ ކަމެއް ނޫން ކަމަށެވެ. 

އިތުރަށް އެ މީހުން ބުނެފައި ވަނީ އެމެރިކާގެ ރައީސް ޓްރަމްޕް އަދި އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫއާ ދެމެދު ގިނަ ވާހަކަތަކެއް ދެކެވި، މުއާމަލާތްތަކެއް ކުރެވިފައިވާ ކަމަށެވެ. ނަމަވެސް، އިސްރާއީލާއި އީރާންއާ ދެމެދު މިހާރު އުފެދިގެން އުޅޭ މައްސަަލައިގައި ޓްރަމްޕް އިސްވެ، ނަތަންޔާހޫ އަށް އެއްވެސް މެސެޖެއް ފޮނުވި ކަމެއް ނުވަތަ ނޫން ކަމެއް ހާމަކޮށްފައި ނުވެ އެވެ.

އިސްރާއީލް އިން ޚާމަނާއީ އަވަހާރަކޮށްލަން ރޭވި ކަމުގެ އަޑުތައް ފެތުރެން ފެށުމާ އެކު، ނޫސްވެރިން ވަނީ އިސްރާއީލްގެ ބޮޑު ވަޒީރު ނަތަންޔާހޫއާ ވެސް އެ ސުވާލު އަމާޒުކޮށްފަ އެވެ. އެގޮތުން ޚާމަނާއީ އަވަހާރަކޮށްލުމުގެ ފުރުސަތު އިސްރާއީލަށް ލިބުނުތޯ ނޫސްވެރިޔަކު ސުވާލު ކުރުމުން، ނަތަންޔާހޫ ވަނީ އެ ސުވާލަށް ޖަވާބު ދިނުމަށް ދެކޮޅު ހަދައިފަ އެވެ.

އޭގެ ބަދަލުގައި ނަތަންޔާހޫ ވިދާޅުވީ، އެކަމާ ގުޅޭ ގޮތުން އޭނާ ވާހަކަ ދައްކަވަން ބޭނުން ނުވާ ކަަމަށެވެ. އަދި އެ ވާހަކައިގެ ތެރެއަށް ވަންނަން ވެސް ބޭނުން ނުވާކަން ފާހަގަ ކުރައްވައި އޭނާ ވިދާޅުވީ، ބައެއް ވާހަކަތައް ދޮގުގެ ގޮތުގައި ފެތުރިފައިވާ ކަމަށާއި، ނުހިނގާ ކަންކަމުގެ ވާހަކަ ވެސް ދެކެވެމުން އަންނަ ކަމަށެވެ.

އެހެން ނަމަވެސް އޭނާ ވިދާޅުވެފައި ވަނީ އިސްރާއީލް އިން ކުރަން ޖެހޭ އެންމެހާ ކަންކަން ކުރިއަށް ގެންދަމުން އަންނާނެ ކަމަށެވެ. އަދި އެމެރިކާ އިން ވާހަކަ ދައްކާނީ އެ ޤައުމަށް އެންމެ ފައިދާ ހުރި ގޮތަށް ކަމަށާއި، އިސްރާއީލް އިން އަޅަން ޖެހޭ ފިޔަވަޅުތައް ހުރިހާ ވަގުތެއްގައި ވެސް އަޅަމުން ގެންދާނެ ކަމަށެވެ.

އީރާނަށް އަމާޒުކޮށް އިސްރާއީލް އިން މި ފަހުން ދީފައިވާ ހަމަލާތަކުގައި އީރާންގެ އަސްކަރިއްޔާގެ އިސް އޮފިޝަލުން ތަކެއް ވެސް ވަނީ އަވަހާރަކޮށްލައިފަ އެވެ. މީގެ އިތުރުން އީރާންގެ އިންޓެލިޖެންސްގެ ވެރިޔާ އަދި އޭނާގެ ޑެޕިއުޓީ ވެސް ވަނީ އަވަހާރަކޮށްލާފައި ކަމަށް އިސްރާއީލް ވެސް ހާމަކޮށްފައިވެ އެވެ.