ސަޢޫދީ އިން ވަނީ މުސްލިމުންނަށް ބޭވަފާތެރިވެފައި: ޚާމަނާއީ

ސަޢޫދީ ޢަރަބިއްޔާ އިން އިސްރާއީލާއި އެމެރިކާއާ ގުޅުން ބަދަހިކުރުމަކީ މުސްލިމުންނަށް ބޭވަފާތެރިވުން ކަމަށް އީރާނުގެ ރޫޙީ ލީޑަރު އާޔަތުﷲ އަލީ ޚާމަނާއީ ސިފަކުރައްވައިފިއެވެ.

އިސްލާމީ ޤައުމުތަކުގެ ޤާނޫނު ހަދާ މަޖިލިސްތަކުގެ މެމްބަރުންގެ ކޮންފަރެންސެއްގައި އަންގާރަ ދުވަހު އީރާނުގެ ވެރިރަށް ތެހެރާންގައި ވާހަކަ ދައްކަވަމުން ޚާމަނާއީ ވިދާޅުވީ ޤުދުސްއަކީ ޝައްކެއް ނެތް ގޮތުގައި ފަލަސްތީނުގެ ވެރިރަށް ކަމަށާއި، އެރަށަކީ އިސްރާއީލުގެ ވެރިރަށް ކަމަށް އެމެރިކާއިން ނިންމި ނިންމުމުގައި ބުރަދަނެއް ނެތް ކަމަށެވެ.

ޚާމަނާއީ ވިދާޅުވީ ސަޢޫދީ އިން ގެންދަނީ އެމެރިކާއަށާއި ޒަޔަނިސްޓުންނަށް އެހީތެރިވަމުން ކަަމަށެވެ. އަދި އެއީ އިސްލާމީ އުއްމަތަށާއި މުސްލިމު ޤައުމުތަކަށް ބޭވަފާތެރިވުން ކަމަށް އޭނާ ސިފަކުރެއްވިއެވެ.

ޚާމަނާއީ ވަނީ އީރާނާ ދެކޮޅަށް މަސައްކަތްކުރި އިސްލާމީ ޤައުމުތަކާ ގުޅިގެން އަޚުންގެ ގޮތުގައި މަސައްކަތްކުރުމަށް އެޤައުމު ތައްޔާރަށް އޮތްކަން ހާމަކުރައްވާފައެވެ.

"ބޮޑު އާބާދިއަކާއި އަދި ގިނަ ވަޞީލަތްތަކަކާ އެކު، ގުޅިގެން މަސައްކަތްކޮށްފި ނަމަ އިސްލާމީ ޤައުމުތަކަށް ދުނިޔޭގެ ބޮޑު ބާރަކަށް ވެވިދާނެ. މުސްލިމް ޤައުމުތަކުގައި ހަމަނުޖެހުން އުފައްދައި، ޒަޔަނިސްޓުންނަށް ރައްކާތެރި ޤައުމުތައް އުފެދިގެން ނުވާނެ،" ޚާމަނާއީ ވިދާޅުވިއެވެ.

ޝީޢީންގެ އެންމެ ބޮޑު ބާރު ކަމަށްވާ އީރާނާއި ސުންނީންގެ އެންމެ ބޮޑު ބާރު ކަމަށްވާ ސަޢޫދީ ޢަރަބިއްޔާއާ ދެމެދު ފަހަަކަށް އައިސް ނުތަނަވަސްކަން ވަނީ އިތުރު ވެފައެވެ. އީރާނުގެ މައްސަލައިގައި ސަޢޫދީ އާއި އިސްރާއީލް ގުޅިގެން މަސައްކަތްތަކެއް ކުރާ ކަމަށް އިސްރާއީލުގެ އަސްކަރިއްޔާ އާއި އެޤައުމުގެ ކެބިނެޓް ވަޒީރަކު ވަނީ ދާދިފަހުން ކަށަވަރުކޮށްދީފައެވެ.