ޑޮލަރުގެ އަގު ދަށެއް ނުވޭ، މިހާރު ހުރީ 19.35 އަށް
14 ޖޫން 2025 | ހޮނިހިރު 14:03ކަޅު ބާޒާރުގައި ޑޮލަރު ވިއްކަން ހުރި އަގު އިންތިހާ އަށް އުފުލެން ވަނީ ފަށާފަ
ކަޅުބާޒާރުގެ އަގުތައް އަދިވެސް ދަނީ މައްޗަށް
ކަޅު ބާޒާރުގައި ޑޮލަރު ވިއްކަން ހުރި އަގު ދަށް ނުވެ، އެ އަގު އިންތިހާ އަށް އުފުލެން ފަށައިފި އެވެ.
ބާޒާރުގައި ހޮނިހިރު ދުވަހު ޑޮލަރުގެ އަގު ހުރީ 19.35 އަށެވެ. މިއީ ޑޮލަރުގެ އަގު މަތި ވަމުން އަންނަ ދަނޑިވަޅުގައި، އާންމު ރައްޔިތުން އަދި ވިޔަފާރިތަކަށް އޮތް ބޮޑު ގޮންޖެހުމަކަށް ވާނެ އެވެ.
މި ފަހުން އައިސް ޑޮލަރުގެ އަގު އުޅެނީ ނަވާރަ ރުފިޔާ އަށް ވުރެ މަތީގަ އެވެ. ނިމުނު އީދު ބަންދުގައި ޑޮލަރުގެ އަގު ހުރީ 19.45 އާއި 19.50 އާ ދެމެދުގަ އެވެ. މިއީ މިހާރު ޑޮލަރުގެ އަގު ހުރި ވަރަށް ވުރެ ވެސް ބޮޑު އަގެކެވެ.
މިވަގުތު ބާޒާރުގައި ޑޮލަރު ގަންނަން ލިބޭ އަގު ބޮޑުވުމުގެ ސަބަބުން ގިނަ ވިޔަފާރިވެރިން އަންނަނީ އެކަމުގެ ކަންބޮޑުވުން ފާޅު ކުރަމުންނެވެ. އެގޮތުން ބޭންކުން ވެސް ޑޮލަރު ލިބުން ދަތިވެ، ކަޅު ބާޒާރުގައި ޑޮލަރުގެ އަގު މައްޗަށް ދިޔުމުގެ ކަންބޮޑުވުން ދަނީ ފާޅު ކުރަމުންނެވެ.
ކަޅު ބާޒާރުގައި ޑޮލަރުގެ އަގު ތިރި ކުރުމަކީ ރައީސް ޑޮކްޓަރު މުޙައްމަދު މުޢިއްޒުގެ ވަރަށް ބޮޑު ވައުދުފުޅެކެވެ. އެގޮތުން 2024 ވަނަ އަހަރުގެ އޭޕްރީލް މަހު އޮތް ރައްޔިތުންގެ މަޖިލިސް އިންތިޚާބުގެ ކެމްޕެއިން ޖަލްސާއެއް ގައި ވާހަކަ ދައްކަވަމުން ރައީސް މުޢިއްޒު ވިދާޅުވެފައި ވަނީ، ޑޮލަރުގެ އަގު މައްޗަށް ނުދާނެ ކަމަށާއި، ހިފެހެއްޓިފައި ހުންނާނެ ކަމަށެވެ.
ރައީސް މުޢިއްޒު އެހެން ވިދާޅުވިތާ އަހަރަކަށް ވުރެ ގިނަ ދުވަސް ވެގެން ދިޔަ އިރު ވެސް، މިވީ އެއް އަހަރުގެ ތެރޭގައި ވެސް ޑޮލަރުގެ އަގު ހުރީ ނަވާރަ ރުފިޔާ އަށް ވުރެ މަތީގަ އެވެ.
އޭގެ ފަހުން ޑޮލަރު މާރުކުރުމުގެ ސިޔާސަތަށް ސަރުކާރުން ގެނައި ބަދަލާ އެކު، 2027 ވަނަ އަހަރު އާންމު ރޭޓުގައި ޑޮލަރު ލިބެން ފަށާނެ ކަމަށް ވެސް ރައީސް މުޢިއްޒު ވިދާޅުވެފައިވެ އެވެ.
