ދިވެހި ފިލްމު "ސޮރީ"ގެ 15 ޝޯ ފުލްވުމާއި ގުޅުވައިގެން ޚާއްސަ ހަރަކާތްތަކަކާއެކު ޕްރީ ރިލީޒް އިވެންޓް އޮލިމްޕަހުގައި ބާއްވައިފިއެވެ.

ފާތިމަތު ނަހުލާގެ އަސަރުގަދަ މި ފިލްމު "ސޮރީ" ޕްރިމިއާ ކުރުމަށް ހަމަޖެހިފައިވަނީ އަންނަ ހަފުތާގެ އަންގާރަ ދުވަހުގަ އެވެ. ނަހުލާގެ މި ފިލްމުގެ ޕްރިމިއާއަށް ޕްރޮޑަކްޝަނުން އަންނަނީ ތަފާތު އެކި މަސައްކަތްތައް ކުރަމުންނެވެ.

ހުކުރު ދުވަހުގެ ރޭ އޮލިމްޕަހުގައި ބޭއްވުނު މި ހަރަކާރާ ގުޅޭގޮތުން "ރާއްޖެ އެމްވީ" އަށް މައުލޫމާތު ދެއްވަމުން ފިލްމުގެ ޕްރޮޑިއުސާރ އަދި ޑައިރެކްޓަރު ފާތިމަތު ނަހުލާ ބުނީ ފާހަގަކުރި މި ކާމިޔާބީއަކީ ފިލްމު އެޅުވުމުގެ ކުރިން 15 ޝޯ ފުލްވުމާއި ގުޅިގެން އެކަން ފާހަގަކުރުމުގެ ގޮތުން ބޭްވި ހަރަކާތެއް ކަމަށެވެ. މިއީ ރާއްޖޭގެ ފިލްމީ ދާއިރާގައި ވަރަށް ތާރީޚީކަމެއްކަން ނަހުލާ ވަނީ ފާހަގަކޮށްފައެވެ.

ނަހުލާ ބުނީ މިކަހަލަ ހަމަ ޮކންމެ ފިލްމަކަށް ވެސް 6 މަހާއި ފަސްމަހާއި ދެމެދުގެ މުއްދަތެއް ނަގާކަމަށާއި މުޅި ފިލްމުގެ ޝޫޓިންގ އަށް ހޭދަވެފައި ވަނީ ދެމަސް ދުވަސް ކަމަށެވެ.

ނަހުލާ ބުނީ މި ފިލްމުގެ މަސައްކަތް ފަށާފައި ވަނީ ނިމުނު އަހަރުގެ ޑިސެމްބަރު މަހުގައި ކަމަށާއި މި ފިލްމުގެ މަސައްކަތް އެހާ ބުރަ ނޫން ކަމަށެވެ. އެގޮތުން މި ފިލްމުގައި ހަރަކާތްތެރިވި ތަރިން އެތަރިންނާ އެހެނިހެން ފަރާތްތަކުން އެ ފަރާތްތަކުގެ ޒިންމާ ވަރަށް ފުރިހަމައަށް އަދާކޮށްފައި ވާކަމަށެވެ. އެގޮތުން އެހެން ފިލްމުތަކާއި އަޅާބަލާއިރު، ވަރަށް ހިތްހަމަ ޖެހިގެން ވަރަށް އަވަހަށް، ވަރަށް ބަރާބަރަށް ހުރިހާ މަސައްކަތެއް ވެސް ނިންމާ ލެވުނު ކަމަށް ނަހުލާ ބުންޏެވެ.

ނަހުލާ ބުނީ އޭނާ އުފެއްދި ފިލްމުތަކުގެ ތެރެއިން މިހާތަނަށް އެންމެ ބޮޑު މަގުބޫލުކަމެއް ލިބިގެން ގޮސްފައިވަނީ ފިލްމު ޔޫސުފް އަށް ކަމަށާއި އެ ފިލްމުގެ 50 ޝޯ ދެއްކުނު ކަމަށެވެ. ނަމަވެސް ފަހުން އެ ފިލްމު ލީކު ވުމުގެ ސަބަބުން އިތުރު ޝޯތަކެއް ކުރިއަށް ނުގެންދެވި މަޑުޖެހުނީ ކަމަށް ވެސް އޭނާ ބުންޏެވެ.

ނަހުލާ ބުނީ މިފަހަރު މި އަޅުވާ ސޮރީ އަކީ ޔޫސުފް އަށް ވުރެވެސް ރަނގަޅު ނަތީޖާއެއް ނެރެވޭނޭ ފިލްމެއް ކަމުގައި އުންމީދު ކުރާ ކަމަށާއި ބޭނުމަކީ ޔޫސުފް އަށް ލިބިފައި އޮތް ރެކޯޑް މުގުރާލުން ކަމަށެވެ. އެގޮތުން އެ ޓާގެޓް މިހާރު ވެސް ގާތްގަނޑަކަށް ހާސިލްވެފައިވާކަމަށް އޭނާ ބުންޏެވެ.

ނަހުލާ ބުނީ ޔޫސުފް ގެ ރެކޯޑް މުގުރާލެވޭ މަންޒަރު މިހާރުވެސް އެބަ ފެންނަ ކަމަށާއި ޕްރި ރިލީޒް ޝޯގެ އިވެންޓެއް ވެސް މި ބޭއްވީ އެ ކާމިޔާބީގެ އުފަލުގައި ކަމަށެވެ.

ނަހުލާގެ ކާމިޔާބު މި ފިލް "ސޮރީ" އޮލިމްޕަސް ސިނަމާގައި ރިލީޒްކުރަން ހަމަ ޖެހިފައިވަނީ ޖޫން މަހުގެ 17 ވަނަ ދުވަހުގެ ރޭގައެވެ.