މަޝްހޫރު ދީނީ އިލްމުވެރިޔާ ޑރ. އަބްދުލް މަޖީދު އަބްދުލްބާރީ އަވަހާރަވީ ނޫން ކަމަށާއި، ޝަހީދުކޮށްލީ ކަމަށް ކުރީގެ ހޯމް މިނިސްޓަރު އަދި އަދާލަތު ޕާޓީގެ ރައީސް އިމްރާން އަބްދުﷲ ވިދާޅުވެއްޖެއެވެ.

ހޮނިހިރު ދުވަހު އެކްސްގައި ކުރެއްވި ޕޯސްޓެއްގައި އިމްރާން ވިދާޅުވީ، ޑރ. އަބްދުލްމަޖީދުގެ ކުއްލި މަރާ ގުޅިގެން ގިނަ ދުވަސްތަކެއް ވަންދެން ހިތުގައި އުފެދިފައި އޮތް ޝައްކު މިހާރު ޔަގީންވާ ހިސާބަށް ގޮސްފައިވާ ކަމަށެވެ. އަދި ޑރ. މަޖީދު ބަޔަކު ޝަހީދުކޮށްލީ ކަމަށް އެ ޕޯސްޓުގައި އިމްރާން ވިދާޅުވިއެވެ.

ޑރ.މަޖީދު އަވަހާރަވި ގޮތާއިމެދު މީގެ ކުރިން އެއްވެސް ފަރާތަކުން ސުވާލު އުފައްދާފައެއްނުވެއެވެ. އަދި މިދިޔަ ސަރުކާރުގައި ހޯމް މިނިސްޓަރަކަށް ހުންނެވިއިރު، މިފަދަ ވާހަކައެއް އިމްރާން ވެސް ދައްކާވާފައިނުވެއެވެ.

އިމްރާން މިހެން ވިދާޅުވުމާ ގުޅޭގޮތުން ފުލުހުންނާ މިކަމާ ގުޅޭގޮތުން ސުވާލު ކުރި ނަމަވެސް މިހާތަނަށް ޖަވާބެއް ދީފައިނުވެއެވެ.

ޑރ މަޖީދު އަވަހާރަވެފައިވަނީ އުމުރުން 55 އަހަރުގައެވެ. އަވަހާރަވީ، 22 މެއި 2018 ގައި އޭގެ ހަތަރު ދުވަސް ކުރިން، ސްޓްރޯކެއް ޖެހުމުން ލަންކާ ހޮސްޕިޓަލްގެ އައިސީޔޫގައި ފަރުވާދެމުން ދަނިކޮށެވެ.

ޑރ މަޖީދު ވަނީ ތަފްސީރު އިލްމުން ޕީއެޗްޑީ ހާސިލް ކުރައްވާފަ އެވެ. ޑރ މަޖީދު ވަނީ ކީރިތި ގުރުއާނާ ބެހޭ މަރުކަޒުގެ ރައީސްކަމާއި އިސްލާމިކް މިނިސްޓަރުކަން ކުރައްވާފަ އެވެ. އަދި އަވަހާރަވިއިރު، ވެސް ހުންނެވީ ގައުމީ ޔުނިވަސިޓީގެ ލެކްޗަރައަކަށެވެ.