އީރާނާއި އިސްރާއީލާ ދެމެދު މިހާރު ކުރިއަށް ދަމުން އަންނަ ހަމަލާތައް ބަދަލު ކުރުމާ ގުޅޭ ގޮތުން، ސައުދީ އަރަބިއްޔާގެ ވަލީ އަހުދު މުޙައްމަދު ބިން ސަލްމާން އަދި އެމެރިކާގެ ރައީސް ޑޮނަލްޑް ޓްރަމްޕް މަޝްވަރާ ކުރައްވައިފި އެވެ.

މި ހަމަލާތައް ފެށުމާ އެކު، މެދު އިރުމަތީގެ މަޝްރަހާ ގުޅޭ ގޮތުން މުޙައްމަދު ބިން ސަލްމާން އަދި ޓްރަމްޕް މަޝްވަރާ ކުރައްވާފައި ވަނީ ފޯނުން ގުޅުއްވައިގެންނެވެ. އެގޮތުން އިސްރާއީލް އިން އީރާނަށް ދިން ހަމަލާތަކާ ގުޅިގެން އުފެދިފައިވާ ޙާލަތާ ގުޅޭ ގޮތުން ވަނީ މަޝްވަރާ ކުރައްވައިފަ އެވެ.

މުޙައްމަދު ބިން ސަލްމާން އަދި ޓްެރަމްޕާ ދެމެދު ކުރިއަށް ދިޔަ މަޝްވަރާތަކުގައި އަމިއްލަ ރައްކާތެރިކަން ޔަގީންކޮށް ދެމެހެއްޓުމާއި، ކަންކަން މަޑު މައިތިރި ކުރުމަށް މަސައްކަތް ކުރުމާއި، އަދި އުފެދިފައިވާ މައްސަލަތައް ޑިޕްލޮމެޓިކް ގޮތް ގޮތުން ޙައްލު ކުރުމުގެ މުހިންމު ކަމާ މެދު މަޝްވަރާއް ކުރައްވާފައިވާ ކަަމަށް މީޑިއާ ތަކުގައި ވަނީ ބުނެފަ އެވެ. 

ހަމަ އެހެންމެ، މެދު އިރުމަތީގެ ސަލާމަތްތެރިކަމާއި، ރައްކާތެރިކަން އަދި އަމާންކަމާއި ހަމަޖެހުން ޤާއިމު ކުރުމަށް އެއްބާރުލުން ދިނުމާއި، ހަމަޖެހުން ޤާއިމު ކުރުމުގެ މުހިންމު ކަމާ މެދު ވެސް ވަނީ މަޝްވަރާ ކުރައްވައިފަ އެވެ.

މި މަޝްވަރާތަކާ ގުޅިގެން އެމެރިކާގެ ރިޔާސީ ގަނޑުވަރު ވައިޓް ހައުސް އިން ބުނެފައި ވަނީ، ޓްރަމްޕް ވަނީ އިސްރާއީލްގެ ބޮޑު ވަޒިރު ބެންޖަމިން ނަތަންޔާހޫއާ ވެސް މަޝްވަރާ ކުރައްވައި ވާހަކަ ދައްކަވައިފަ އެވެ. އަދި އޭގެ އިތުރުން، އިނގިރޭސިވިލާތުގެ ބޮޑު ވަޒީރު ކިއާ ސްޓާމާ ވެސް ވަނީ ޓްރަމްޕާ މަޝްވަރާ ކުރައްވާފައި ކަމަށް ބުނެފައިވެ އެވެ.

އިނގިރޭސިވިލާތުގެ ސަރުކާރުގެ ތަރުޖަމާނު ވިދާޅުވެފައިވާ ގޮތުގައި، އީރާާންގެ ނިއުކްލިއާ ޕްރޮގްރްތަކާ މެދު އިނގިރޭސިވިލާތުން ކަންބޮޑުވުން ފާޅު ކުރާ ކަމަށް ބޮޑު ވަޒީރު ސްޓާމާ ވަނީ ތަކުރާރު ކުރައްވައިފަ އެވެ. މި މަޝްވަރާތަކަކީ މެދު އިރުމަތީގެ ސަރަޙައްދުގައި އޮތް ހަމަ ނުޖެހުން މަޑު މައިތިރިކޮށް، ސުލްޙަވެރި ހައްލެއް ހޯދުމަށް ކުރެވޭ މަސައްކަތްތަކުގެ ބައެއްގެ ގޮތުގައި މަޝްރަޙު ދިރާސާ ކުރާ ފަރާތްތަކުުން ވަނީ ފާހަގަ ކޮށްފަ އެވެ. 

އީރާނަށް އަމާޒުކޮށް އިސްރާއީލް އިން ދިން ހަމަލާތަކާ ގުޅިގެން، އީރާނުން ވެސް އަންނަނީ އިސްރާއީލަށް ވަރުގަދަ ހަމަލާތަކެއް ދެމުންނެވެ. އެގޮތުން އީރާންގެ ހަމަލާތަކުގައި އިސްރާއީލަށް ބޮޑެތި ގެއްލުންތަކެއް ލިބެމުން އަންނަ ކަމަށާއި، އިސްރާއީލް އިން އެ ޤައުމުގެ ރައްޔިތުންނަށް ސަލާމަތްތެރި ކަމުގެ އިންޒާރު ދީފައިވާ ކަމަށް ވެސް ބުނެފައިވެ އެވެ.