ހައްޖުވެރިން ބަލައި، ވެލާނާ އިންޓަރނޭޝަނަލް އެއަރޕޯޓަށް ވީހާވެސް މަދުން މީހުން ދިއުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން އިލްތިމާސްކޮށްފިއެވެ.

އެޗްޕީއޭއިން ބުނީ، ހައްޖުން އެނބުރި ރާއްޖެއައިސް 14 ދުވަސް ތެރޭގައި ރޯގާގެ އެއްވެސް އަލާމާތެއް ހުރިނަމަ ހޮސްޕިޓަަލަށް ދިއުމަށް އެދޭ ކަމަށާއި، ރޯގާއިން ރައްކާތެރިވުމަށް ޚާއްސަ ސަމާލުކަމެއް ދޭންޖެހޭ ކަމަށެވެ. އަދި ޑޮކްޓަރަށް ދައްކާއިރު، ހައްޖުން އެނބުރި އައި މީހެއް ކަމުގެ މައުލޫމާތު ދިނުމަށް އެދިފައިވެއެވެ.

މީގެ އިތުރުން އަރިދަފުސް ރޯގާޖެހިއްޖެނަމަ ކެއްސާ، ކިނބިހި އަޅާއިރު، އަނގަމައްޗާއި، ނޭފަތް ނިވާކުރުމާއި، ޓިޝޫފަދަ ތަކެތި ބޭނުން ކުރުމަށްފަހު ރައްކާތެރި ގޮތުގައި ނައްތާލުމަށް އެދިފައިވެއެވެ. އަދި ދަތުރުމަތީގައި އުޅޭއިރު، މާސްކް އަޅައިގެން އުޅުމަށް އިލްތިމާސްކޮށްފައިވެއެވެ.

ހައްޖުވެރިން އެނބުރި އައުމަށްފަހު ދެ ހަފުތާ ވަންދެން ބޮޑެތި އެއްވުންތައް ނުބޭއްވުމަށް ވެސް އެޗްޕީއޭއިން އެދިފައިވެއެވެ. އަދި ޚާއްސަކޮށް، ފުރަތަމަ ހަފުތާގައި ކުޑަކުދިންނާއި، އުމުރުން ދުވަސްވީ މީހުންނާއި ބަލިމީހުން ގެނެސްގެން އެއްވުންތައް ނުބޭއްވުމަށް އިލްތިމާސްކޮށްފައިވެއެވެ.

އެޗްޕީއޭގެ ތަފާސްހިސާބުތަކަށް ބަލާއިރު، މިދުވަސްވަރު ރޯގާގެ ގޮތުގައި ފެތުރޭ ބަލިތައް ވަނީ އިތުރުވެފައެވެ. އަދި ކޮންމެ އަހަރަކު ވެސް ހައްޖު މޫސުމާއެކު ރޯގާ ފެތުރޭ މިންވަރު އިތުރުވެގެން ދެއެވެ.

މިދިޔަ އަހަރު ވެސް ހައްޖުގެ އަޅުކަމަށް ދިޔަ މީހުންގެ ތެރޭގައި ރޯގާ ފެތުރޭ މިންވަރު އިތުރުވުމާއި ގުޅިގެން ހައްޖުވެރިންނަށް ޚާއްސަކޮށް އައިޖީއެމްއެޗުން ހައްޖު ފްލޫ ކްލިނިކެއް ހުޅުވައި، ޚިދުމަތް ދީފައިވެއެވެ. އަދި ފުޓްބޯޅަ ކުޅުންތެރިޔާ މުހައްމަދު އާރިފް (ބަކާ) ހައްޖުގެ އަޅުކަމަށް ފަހު އެނބުރި އައި ފަހުން ނުރައްކާތެރި ހުމެއް ކަމަށްވާ މެނިންގޯކޮކަލް ބަލީގައި ވަނީ ނިޔާވެފަ އެވެ.