"ޓީމް އިއްބެ" ޝޯނުދީ ކައުންސިލަށް ނޭނގި ދާން އުޅުމަކީ ނާތަހުޒީބު އަމަލެއް: ކަމަދޫ ކައުންސިލް
ކަމަދޫ ބަދުނާމުވާ ގޮތަށް ޝޯސަލް މީޑިއާގައި ޕޯސްޓުތައްޖެހުމަކީ ކައުންސިލުން އެއްވެސް ވަރަކަށް ބަލައިގަންނާނެ ކަމެއްނޫން ކަމަދޫ ކައުންސިލުން ބުނޭ
ބ. ކަމަދޫ
ކަމަދޫ ކައުންސިލް އިން 09 ޖޫން 2025 ވަނަ ދުވަހުގެ ރޭ ސްޓޭޖް ޝޯ ކުޅުމަށް ހަމަޖައްސާފައިވާ "ޓީމް އިއްބެ" ޝޯނުދީ ކައުންސިލަށް ނޭނގި ދާން އުޅުމަކީ ނާތަހުޒީބު އަމަލެއް ކަމަށާއި މި އަމަލު ކުށްވެރި ކުރާކަމަށް ކަމަދޫ ކައުންސިލުން ބުނެފިއެވެ.
ކަމަދޫ ކައުންސިލް އިން ނެރުނު ނޫސް ބަޔާނެއްގައި ބުނީ 1446 ވަނަ އަހަރުގެ ޢަލްހާ އީދު ޝޯ ކުޅުމަށް 09 ޖޫން 2025 ވަނަ ދުވަހު "ޓީމް އިއްބެ" ނަމަކަށް ކިޔާ ގުރޫޕެއް ގެނައުމަށް ޓީމް އިއްބެ ގެ އޯނަރ، ހދ. ނައިވާދު އިބްރާހިމް ނިޔާޒް/ފުރުއްމާގެ އާއެކު އެއްބަސް ވުމެއްގައި ސޮއި ކުރެވިފައިކަމަށެވެ.
އަދި ކަމަދޫ ކައުންސިލާއި "ޓީމް އިއްބެ"އާއި ވެފައިވާ އެއްބަސްވުމުގެ ދަށުން އެޑްވާންސް ޕޭމެންޓްގެ ގޮތުގައި -/7500 (ހަތްހާސް ފައްސަތޭކަ ރުފިޔާ) ވަނީ ޖަމާ ކޮށްދީފައި ކަމަށައި ނަމަވެސް މިއަދު (ހޯމަ ދުވަހު) 17:30 ހާއިރު ކަމަދޫ ކައުންސިލަށް އެންގުމަކާއި ނުލާ ކަމަދޫ އިން ފުރައިގެން ދާން އުޅުނު ކަމަށް އެ ކައުންސިލަށް ފާހަގަވުމުން ޕޮލިހުންނަށް އެކަމުގެ މައުލޫމާތު ހިއްސާކޮށްފައިވާކަމަށް އެ ކައުންސިލުން ނެރުނު ނޫސްބަޔާނުގައި ވެއެވެ.
"ޓީމް އިއްބެ"އާއި ކަމަދޫ ކައުންސިލާއެކު 03 ޖޫން 2025 ވަނަ ދުވަހު ވެފައިވާ އެއްބަސްވުމުގެ ކޮޕީއެއް ރާއްޖެއެމްވި އަށް ވަނީ ލިބިފައެވެ. އެ އެއްބަސްވުމުގައި ވާގޮތުން މުޅި ޝޯގެ އަގަކީ -/15000 (ފަނަރަ ހާސް ރުފިޔާ) އެވެ. އަދި އެގްރިމެންޓުގައި ސޮއި ކުރާ ދުވަހު މަސައްކަތުގެ އެޑްވާންސް ފައިސާގެ ގޮތުގައި -/7500 (ހަތްހާސް ފައްސަތޭކަ ރުފިޔާ) މަސައްކަތާއި ހަވާލުވާ ފަރާތާއި ދޭންވާނެއެވެ. އަދި ބާކީ ރުފިޔާ މަސައްކަތް ނިމުމާއި އެކު މަސައްކަތާއި ހަވާލުވާ ފަރާތާއި ހަވާލު ކުރަންވާނެއެވެ.
އޭގެ އިތުރުން، އުޒުރުވެރިކަމަކާއި ނުލާ އެއްވެސް ސަބަބަކާހުރެ ޢީދު ޝޯވް ކަނޑައެޅިފައިވާ ގޮތަށް ކުރިޔަށް ނުގެންދެވިއްޖެ ނަމަ ޖުމްލަ އަގުގެ 50 އިންސައްތަ ކައުންސިލަށް ދައްކަންޖެހޭނެއެވެ. އަދި އެއްބަސްވުމުގައި ނެތްކަމެއް ދިމާވެއްޖެ ހާލަތެއްގައި އެކަމެއް ހައްލު ކުރާނީ ދެފަރާތުން ވާހަކަދައްކައިގެން ކަމަށާއި ދެފަރާތުން ވާހަކަ ދައްކައިގެންވެސް ހައްލު ނުވެއްޖެނަމަ އެކަމެއް ޝަރުޢީ ކޯޓަކަށް ހުށަހަޅައިގެން ހައްލުކުރާނެ ކަމަށްވެސް އެ އެއްބަސްވުމުގައިވެއެވެ.
ކަމަދޫ ކައުންސިލުން ބުނީ، ކަމަދު ބަދުނާމުވާގޮތަށް ޝޯސަލް މީޑިއާގައި ޕޯސްޓުތައްޖެހުމަކީ އެ ކައުންސިލުން އެއްވެސް ވަރަކަށް ބަލައިގަންނާނެ ކަމެއްނޫން ކަމަށެވެ.
