އެމްޓީސީސީގެ ބަސްތައް ޕާކުކުރާ ބިން ހުސްކޮށް، ބަސްތައް މަގުމަތީ ޕާކުކުރަން ފަށައިފި
9 ޖޫން 2025 | ހޯމަ 13:58މައުލޫމާތު ލިބޭ ގޮތުގައި އެޗްޑީސީން އެ ބިން ހުސްކުރަން ބުނެފައިވަނީ އެބިމަކީ ބޯޓް އެސޯސިއޭޝަނަށް ދީފައިވާ ބިމެއް ކަމަށް ބުނެ
އެމްޓީސީސީގެ ބަސްތައް
ހުޅުމާލޭގައި އެމްޓީސީސީގެ ބަސްތައް ޕާކުކުރާ ބިން ހުސްކޮށް ބަސްތައް މަގުމަތީ ޕާކުކުރަން ފަށައިފިއެވެ.
ރާއްޖެއެމްވީ އަށް އިތުބާރު ހުރި ފަރާތަކުން މައުލޫމާތު ދިން ގޮތުގައި، ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އިން ވަނީ ހުޅުމާލޭގައި އެމްޓީސީސީ ބަސްތައް ޕާކުކުރަމުން އައި ޕާކިން ޒޯން އަތުލާފައެވެ. އަދި އެޗްޑީސީން އެ ބިން އަތުލާފައިވަނީ ބަސްތައް ޕާކުކުރާނެ ބިމެއް ނުދައްކާ ކަމަށް މައުލޫމާތު ލިބެއެވެ.
ބިން ހުސްކޮށް ބަސްތައް މަގުމަތީ ޕާކުކޮށްފައި ހުރުމުން އެމްޓީސީސީގެ ބަހެއް ހޯދުމަށް މީޑިއާ އޮފިސަރަށް ގުޅުމުން ފޯނަށް ޖަވާބެއް ނުދެއްވައެވެ. ތަކުރާރުކޮށް ގުޅުމުން ބިޒީ ކޮށްލުމަށްފަހު ކުރި މެސެޖުގައި ބުނީ "އައި އޭމް ބިޒީ ޕްލީސް ޓެކްސްޓް މީ" މިހެންނެވެ. އަދި މައުލޫމާތު ސާފުކުރުމަށް މެސެޖު ކުރުމުން ޖަވާބު ދީފައެއް ނުވެއެވެ. އެހެންކަމުން މިކަމުގައި އެމްޓީސީސީގެ ބަހެއް ލިބޭގޮތް ވަނީ ނުވެފައެވެ.
އެމްޓީސީސީގެ ބަސް އޮޕަރޭޝަންތަކަށް ބޭނުންކުރާ ބަސްތައް ޕާކުކުރާ ބިމަކީ ހުޅުމާލޭގައި ހުންނަ އެމްޓީސީސީ ފެރީ ޓާރމިނަލާއި ރަށު މާރުކޭޓާ ދެމެދު އޮންނަ ހުސް ބިން ނުވަތަ ޕާކިން ޒޯނެެވެ. ފެރީ ދަތުރުތައް ހިންގި ދުވަަސްވަރު އެ ތަނަކީ ސައިކަލު ޕާކު ކުރުމަށް ޚާއްސަ ޕާކިން ޒޯނެކެވެ. ބަސް ދަތުރުތައް ފެށި ފަހުން އެ ތަން ބޭނުންކުރަނީ އެމްޓީސީސީގެ ބަސް ޕާކިންއަށް ޚާއްސަ ތަނެއްގެ ގޮތުގައެވެ.
މައުލޫމާތު ލިބޭ ގޮތުގައި އެޗްޑީސީން އެ ބިން ހުސްކުރަން ބުނެފައިވަނީ އެބިމަކީ ބޯޓް އެސޯސިއޭޝަނަށް ދީފައިވާ ބިމެއް ކަމަށް ބުނެއެވެ.
