ރައްޔިތުންގެ މަޖިލިސް މިނިވަން ނުވެ، މިގައުމުގެ އެއްވެސް މުއައްސަސާއެއް މިނިވަންނުވާނެ: އަލީ ހުސެއިން
މަޖިލީހުން މިއަދު ޒިންމާ ނުނަގާ، ސަރުކާރު ޖަވާބުދާރީ ކުރުވުމުގެ އެއްވެސް މަސައްކަތެއް ނުކުރޭ
މަޖިލީހުގެ ކެންދޫ ދާއިރާގެ ކުރީގެ މެމްބަރު އަލީ ހުސައިން ރާއްޖެ ޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަނީ
ރައްޔިތުންގެ މަޖިލިސް މިނިވަން ނުވެ، މިގައުމުގެ އެއްވެސް މުއައްސަސާއެއް މިނިވަންނުވާނެ ކަމަށް މަޝްހޫރު ގާނޫނީ ވަކީލް އަލީ ހުސެއިން ވިދާޅުވެއްޖެ އެވެ.
ރާއްޖެޓީވީގައި ވާހަކަދައްކަވަމުން އަލީ ހުސެއިން ވިދާޅުވީ، ރައީސުލްޖުމްހޫރިއްޔާ ޑރ.މުހައްމަދު މުއިއްޒު ސަރުކާރުގެ ބޮޑު މެޖޯރިޓީއޮތް 20 ވަނަ ރައްޔިތުންގެ މަޖިލީހަކީ މިނިވަންތަނެއް ނޫން ކަމަށެވެ. މަޖިލީހުން މިއަދު ޒިންމާ ނުނަގާ ކަމަށާއި، ސަރުކާރު ޖަވާބުދާރީ ކުރުވުމުގެ އެއްވެސް މަސައްކަތެއް ނުކުރާ ކަމަށެވެ.
އަލީ ހުސެއިން ވިދާޅުވީ މަޖިލިސް މިނިވަންނުވެ، ގައުމުގެ އެއްވެސް މުއައްސަސާއެއް މިނިވަން ނުވާނެ ކަމަށާއި، މިއަދު ޖޭއެސްސީއަކީ ވެސް މިނިވަން ތަނެއް ނޫން ކަމަށެވެ. އަދި ވިދާޅުވީ ޖޭއެސްސީ މިނިވަންނުވެ، ކޯޓުތައް މިނިވަން ނުވާނެ ކަމަށެވެ.
އަލީ ހުސެއިން ވިދާޅުވީ ވެރިކަމަށް އަންނަ މީހާއަށް ރައްޔިތުން މަޖިލީހުގެ ކޮންޓްރޯލް ލިބުމުން ގައުމު އެ ލިބެނީ ހިތަކަށް ކަމަށާއި، ކުރަމުންދަނީ ހިތުހުރި ކަމެއް ކަމަށެވެ. އަދި މިކަން ރައްޔިތުން ބަދަލުކުރަންޖެހޭ ކަމަށް އޭނާ ވިދާޅުވިއެވެ.
އަޅުގަނޑުމެންނަށް މިފެންނަނީ ރައީސް ޖަވާބުދާރީވުން ނުވަތަ ސަރުކާރުން ޖަވާބުދާރީ ކުރުވުމުގެ ޒިންމާ އެޅިފައިވާ ފަރާތްތަކުގެ ޒިންމާ އަދާނުކުރޭ. އެންމެ މުހިންމު ކަމަކަށް ރައްޔިތުންގެ މަޖިލިސް. ރައްޔިތުންގެ މަޖިލިސް މިނިވަން ނުވާ ކަމަށްވަންޏާ ދެން އަޅުގަނޑު ގަބޫލުކުރާގޮތުގައި މިގައުމުގެ އެއްވެސް މުއައްސަސާއެއް މިނިވަން ނުވާނެ. މިނިވަން މުއައްސަސާތައް މިނިވަން ވަނީ ރައްޔިތުންގެ މަޖިލިސް މިނިވަންވީމަ. ރައްޔިތުންގެ މަޖިލިސް މިނިވަން ނުވަންޏާ ޖޭއެސްސީ މިނިވަން ނުވާނެ. ޖޭއެސްސީ މިނިވަން ނުވަންޏާ ކޯޓުތަކެއް މިނިވަނެއް ނުވާނެ. އަޅުގަނޑުމެންނަށް އޮޅިގެން ނަމަވެސް ގާނޫނު އަސާސީ ފަރުމާ ކުރެވިފައިމިއޮތީ އެގޮތަށް ހަގީގަތުގައި.މަޝްހޫރު ގާނޫނީ ވަކީލް އަލީ ހުސެއިން
މި ސަރުކާރުން ރައްޔިތުންގެ މަޖިލިސް މެދުވެރިކޮށް، ގާނޫނު އަސާސީއަށް ގެންނަ ބަދަލުތަކަށް އިޝާރާތް ކުރައްވައި އަލީ ހުސެއިން ވިދާޅުވީ އެކަމަށް ޗެލެންޖުކޮށް، ކޯޓުތައް ނުދެވޭ ކަމަށްވާނަމަ މިގައުމުގައި ކޯޓުތައް ބެހެއްޓުމުގެ އެއްވެސް ބޭނުމެއް ނެތް ކަމަށެވެ.
އަޅުގަނޑު މިއަދުވެސް ގަބޫލުކުރަނީ ގާނޫނު އަސާސީއަށް ގެންނަ ކޮންމެ ބަދަލެއް ގެންނަ ކޮންމެ އިސްލާހެއް އެއީ ޖުޑީޝަލް ރެވިއު އުސޫލުން މިރާއްޖޭގެ ހައިކޯޓުގައި ވެސް ސުޕްރީމް ކޯޓުގައި ވެސް ޗެލެންޖު ކުރެވެންޖެހޭނެ. ގާނޫނު އަސާސީގައި ހަމަ ހިތުހުރި އެއްޗެއް ލިޔުނީމަ އެވާހަކަ ހިފައިގެން ކޯޓަށް ނުދެވެންޏާ އެކަމަށް ކޯޓުގައި ޗެލެންޖް ނުކުރެވޭ ކަމަށްވަންޏާ ދެން ކޯޓުތައް ހުރުމުގެ ބޭނުމެއް ނެތެއްނުންތޯ ހަގީގަތުގައި. ކީއްކުރަން ބަހައްޓާ ހައިކޯޓެއް ތޯ. ކީއްކުރަން ބަހައްޓާ ސުޕްރީމް ކޯޓެއްތޯ. ކީއްކުރަންތޯ އަޅުގަނޑުމެން ކިޔަނީ ތިން ބާރުވަކިވެފައިވާ ނިޒާމެކޭ. މިތާގައި މިއޮތީ ޑިމޮކްރަސީ އެކޭ. ނޫން. އެއެއް ނެތް ހަގީގަތުގައި.މަޝްހޫރު ގާނޫނީ ވަކީލް އަލީ ހުސެއިން
އަލީ ހުސެއިން ވިދާޅުވީ ސުޕްރީމްކޯޓުގެ ފަނޑިޔާރުކަމުން ޑރ. އަޒްމިރަލްދާ ޒާހިރު އާއި މަހާޒް އަލީ ޒާހިރު ވަކި ކުރެއްވުމުގެ މަސައްކަތްތައް ކުރިއަށް ގެންދިއުމުގައި ޖޭއެސްސީ ދެއްކީ ތާކުންތާކު ނުޖެހޭ ވާހަކަތަަކެއް ކަމަށާއި، އެއީ ކުޑަ ކުދިން ގާތުގައި ދައްކާ ޒާތުގެ ވާހަކަތަކެއް ކަމަށެވެ. އަދި ވިދާޅުވީ ޖޭއެސްސީއަށް މިއަދު ރައްޔިތުންގެ އިތުބާރު ނެތް ކަމަށެވެ.
އަލީ ހުސެއިން ވިދާޅުވީ މިސަރުކާރުގައި ރާއްޖޭގައި ކަންކަން ހިނގާ ގޮތަށް ބަލާއިރު، ފުރިހަމަ ޑިމޮކްރަސީ ނެތްކަން ހާމަވެފައިވާ ކަމަށާއި، ރައްޔިތުން އެދޭ ޑިމޮކްރަސީ ގެނައުމަށް މަސައްކަތް ކުރަންޖެހޭ ކަމަށެވެ.
