ފުއެންޓޭ ބުނީ ޕޯޗުގަލްއާ ދެކޮޅަށް ނެރޭނީ އެންމެ ވަރުގަދަ ޓީމު ކަމަށް

ޔުއެފާ ނޭޝަންސް ލީގުގެ ފައިނަލްގައި ޕޯޗުގަލްއާ ދެކޮޅަށް ނެރޭނީ އެންމެ ވަރުގަދަ ޓީމު ކަމަށް، އެންމެ ފަހުގެ ޗެމްޕިއަން ސްޕެއިންގެ ކޯޗު ލުއިސް ޑި ލާ ފުއެންޓޭ ބުނެފި އެވެ.

ޕޯޗުގަލް އަކީ ޔުއެފާ ނޭޝަންސް ލީގުގެ އެންމެ ފުރަތަމަ ޗެމްޕިއަނުންނެވެ. އަދި ސްޕެއިން އަކީ މުބާރާތުގެ އެންމެ ފަހުގެ ޗެމްޕިއަނުންނެވެ. މި ދެ ޓީމު ކުޅޭ ފައިނަލް މެޗު އޮތީ އާދީއްތަ ދުވަހުގެ ރޭ އެވެ.

ފައިނަލް މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ފުއެންޓޭ ބުނީ، ސްޕެއިންގެ ހުރިހާ ކުޅުންތެރިން ވެސް ތިބީ ރަނގަޅު ޙާލަތެއްގައި ކަމަށެވެ. އަދި ފައިނަލްގެ ކުރިން އޮތް އެންމެ ހިތްހަމަ ޖެހޭ ކަމަކީ، ހުރިހާ ކުޅުންތެރިން ވެސް ފިޓުކޮށް ތިބުން ކަމަށް ފުއެންޓޭ ބުންޏެވެ.

ޕޯޗުގަލްއާ ދެކޮޅަށް ކުޅޭ ފައިނަލް މެޗުގެ ކުރިން ސްޕެއިން އިން ކުރިއަށް ގެންދިޔަ ފަރިތަކުރުންތަކާ މެދު ވެސް ފުއެންޓޭ ހުރީ ވަރަށް ހިތްހަމަ ޖެހިފަ އެވެ. އޭނާ ބުނީ ފަރިތަކުރުމުގައި ޓީމު ފެނުނީ ވަރަށް ރަނގަޅަށް ކަމަށާއި، ފައިނަލްގައި ޕޯޗުގަލްއާ ދެކޮޅަށް ނެރޭނީ ސްޕެއިންގެ އެންމެ ވަރުގަދަ ޓީމު ކަމަށެވެ.

މީގެ އިތުރުން ފުއެންޓޭ ބުނީ ޕޯޗުގަލް އަކީ ވަރުގަދަ ޓީމެއް ކަމަށާއި، އެ ޓީމުގައި ތިބީ ހުނަރުވެރި ކުޅުންތެރިން ކަމަށެވެ. ޚާއްސަކޮށް ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އަދި ވެސް އަންނަނީ ތަފާތު ދައްކަމުން ކަމަށާއި، އޭނާ އަކީ ފުޓުބޯޅައިގެ ލެޖެންޑެއް ކަަމަށް ވެސް ފުއެންޓޭ ބުންޏެވެ. އެހެންކަމުން ފައިނަލް މެޗުގައި ސްޕެއިން ފެންނަން ޖެެހޭނީ ވަރަށް ހުށިޔާރުކޮށް ކަމަށް ވެސް އޭނާ ވަނީ ބުނެފަ އެވެ.

އިތުރަށް ވާހަކަ ދައްކަމުން ފުއެންޓޭ ބުނީ ސްޕެއިންގެ ލަމީން ޔަމާލް އަންނަނީ ޒުވާން އުމުރުގައި ވެސް އެތައް ކަމެއް ސާބިތުކޮށްދެމުން ކަމަށެވެ. ޚާއްސަކޮށް ހުނަރުވެރި ކުޅުމެއް ދައްކައި، އިތުބާރާ އެކު އޭނާ ކުޅެމުން އަންނަކަން ފުއެންޓޭ ފާހަގަ ކުރި އެވެ. އަދި ވަކިން ޚާއްސަކޮށް އެއްވެސް ހާސްކަމެއް ޔަމާލްގެ ފަރާތުން ނުފެންނަ ކަމަށް އޭނާ ބުންޏެވެ.

ފުއެންޓޭ ބުނީ އޭނާ ހުރީ ވަރަށް ބޮޑު އިތުބާރެއްގައި ކަމަށާއި، އެ އިތުބާރު އޭނާ އަށް ލިބެނީ ކުޅުންތެރިން ކުރަމުން އަންނަ މަސައްކަތުންް ކަމަށެވެ. އެހެންކަމުން ނޭޝަންސް ލީގު ކާމިޔާބު ކުރެވޭނެ ކަމުގެ ފުރިހަމަ އުންމީދާ އެކު ހުރި ކަަމަށް ވެސް ފުއެންޓޭ ބުންޏެވެ.

ސްޕެއިން އާއި ޕޯޗުގަލް ބައްދަލު ކުރާ ނޭޝަންސް ލީގުގެ ފައިނަލް މެޗު ފަށާނީ އާދިއްތަ ދުވަހުގެ ރޭ ދަންވަރު ރާއްޖެ ގަޑިން 12 ޖަހާއިރު އެވެ.