ޔޫރަޕްގެ ގައުމުތަކުން ފަލަސްތީނު ބަލައިގަންނަން އުޅޭ ނަމަ އިތުރު ބިންތަކަށް ވެރިވެ ގަންނާނެ ކަމަށް އިސްރާއީލުން ބުނެފި
އިސްރާއީލުގެ ޕްލޭނަކީ "ވެސްޓް ބޭންކުގެ ބިމުގެ ބޮޑުބައެއް އިސްރާއީލުގެ ބިމުގެ ބައެއްގެ ގޮތުގައި ހެދުމާއި، ޚާން އަލް-އަޙްމަރުގެ ރައްޔިތުން އެތަނުން ބޭރު ކުރުމާއި، އަދި ބޭންކިންގ ނިޒާމަށް ހުރަސްއެޅުމެވެ.
ހުޅަނގު އައްސޭރީގެ ގަދީމީ ސިޓީއެއް ކަމަށްވާ ހިބްރޯންގައި ފަލަސްތީނުގެ އަންހެނަކު އިސްރާއީލުގެ ސިފައިންގެ ހަތިޔާރު އެޅި ފައުޖެއްގެ ކުރިމަތީގައި ހުއްޓި އެމީހުންގެ ހަރަކާތްތައް ވީޑިއޯ ކުރަނީ - 31 މެއި 2025
ޔޫރަޕްގެ ގައުމުތަކުން ފަލަސްތީނު ދައުލަތެއްގެ ގޮތުގައި ބަލައިގަންނަން އުޅޭ ނަމަ، ފަލަސްތީނުގެ އިތުރު ބިންތަކަށް ވެރިވެ ގަންނާނެ ކަމަށް އިސްރާއީލުން ބުނެފި އެވެ.
އިސްރާއީލުގެ ފައިނޭންސް މިނިސްޓަރު ބެޒަލެލް ސްމޮޓްރިޗް ބުނެފައި ވަނީ ޔޫރަޕިއަން ޔޫނިއަނުން ފަލަސްތީނު ދައުލަތެއްގެ ގޮތުގައި ބަލައިގަންނަން އުޅޭ ނަމަ، އިސްރާއީލުން ވެސްޓް ބޭންކުގައި ބިން ވެރި ކޮށްލުން "އިތުރުކުރާނެ" ކަމަށެވެ.
"ފްރާންސް އަދި އެހެން ބައެއް ޔޫރަޕުގެ ޤައުމުތަކުން ފަލަސްތީނު ދައުލަތެއްގެ ގޮތުގައި ބަލައިގަތުމަށް ގޮވާލުން ކުރިއަށް ގެންދާނަމަ، އަހަރެމެން ވެސްޓް ބޭންކުގެ އިތުރު ބިން ވެރިކޮށްލުމުގެ ޕްލޭނެއް އެބައޮތް،" ސްމޮޓްރިޗް ހުކުރު ދުވަހު ބުންޏެވެ.
އޭނާ އިތުރަށް ބުނި ގޮތުގައި އެ ޕްލޭނުގައި "ވެސްޓް ބޭންކުގެ ބިމުގެ "އޭރިއާ ސީ" ގެ ގޮތުގައި ފާހަގަ ކޮށްފައި އޮންނަ ބިމުގެ މައްޗަށް ބާރު ހިންގުމާއި، ޚާން އަލް-އަޙްމަރުގެ ރައްޔިތުން އެތަނުން ބޭރު ކުރުމާއި، އަދި ބޭންކިންގ ނިޒާމަށް ހުރަސްއެޅުން ހިމެނެއެވެ."
"އޭރިއާ ސީ" އަކީ އިސްރާއީލުން ގަވައިދާ ޚިލާފަށް ހިފާފައިވާ ބިމުގެ ސަރަޙައްދުގެ ގާތްގަނޑަކަށް 60 އިންސައްތަ ހިއްސާކުރާ ބައެކެވެ. އަދި މިއީ ގިނަ އަދަދަކަށް ގަވައިދާ ޚިލާފަށް އިސްރާއީލުގެ އާބާދީތައް ޤާއިމުކޮށްފައިވާ ސަރަޙައްދެކެވެ.
ބުރާސްފަތި ދުވަހު، ފިނޭންސް މިނިސްޓަރު ވަނީ އިސްރާއީލުން ހިފާފައިވާ ވެސްޓް ބޭންކުގައި އަލަށް ބިނާކޮށްފައިވާ ޣައިރު ޤާނޫނީ އާބާދީތަކަށް ޒިޔާރަތް ކޮށްފައެވެ.
ސްމޮޓްރިޗް ހާމަ ކުރި ގޮތުގައި އައު އާބާދީ ތަކަށް ގާނޫނީ ގޮތުން ހުއްދަ ދިނުމުގެ މަސައްކަތް އަވަސް ކުރުމަށާއި، އިސްރާއީލުން ބޭނުން ކުރަމުންދާ ވެސްޓް ބޭންކުގެ ބާކީ އޮތް ހުރިހާ ބިމެއްގެ މައްޗަށް "އިސްރާއީލުގެ ބާރު" ހިންގުމުގެ ޕްލޭނެއް އެކުލަވާލުމަށް ސީދާ އިރުޝާދު ދީފައިވާ ކަމަށެވެ.
ސްމޮޓްރިޗް އަކީ ބައިނަލް އަގްވާމީ ގާނޫނު ތަކަށް ގޮން ޖަހާ އިސްރާއީލުގެ އާބާދީތައް ފުޅާކުރުމާއި އިސްރާއީލުން ހިފާފައިވާ ވެސްޓް ބޭންކު ވެރިކޮށްލުމަށް ގެންގުޅޭ ޕްލޭންތަކުގެ އިސް ބައިވެރިއެކެވެ.
ފްރާންސްއިން ފަހަކަށް އައިސް ގެންދަނީ ޔޫރަޕިއަން ޔޫނިއަންގެ މެންބަރު ޤައުމުތަކަށް ފަލަސްތީނު ދައުލަތެއްގެ ގޮތުގައި ބަލައިގަތުމަށް ގޮވާލަމުންނެވެ.
ފްރާންސް އާއި ސަޢޫދީ ޢަރަބިއްޔާ އިން ގުޅިގެން މި މަހު ފަލަސްތީނު ބަލައިގަތުމަށް އަމާޒުކޮށްގެން އދ. ގެ ބައްދަލުވުމެއް ބާއްވަން ހަމަޖެހިފައިވެއެވެ.
ޖުމްލަ ގޮތެއްގައި، ދުނިޔޭގެ 143 ޤައުމަކުން ވަނީ އދ. ގައި ފަލަސްތީނުގެ ދަރަޖަ މަތި ކުރުމަށް ގޮވާލާ ފާސް ކުރި ގަރާރަކަށް ވޯޓު ދީފައެވެ.
އދ. ގެ މި ޤަރާރުން ފަލަސްތީނަށް އިތުރު "ޙައްޤުތަކާއި އިމްތިޔާޒުތައް" ދީފައިވެއެވެ. އަދި މިގޮތުން ފަލަސްތީނަކީ އދ. ގެ ފުރިހަމަ މެންބަރެއްގެ ގޮތުގައި ބައިވެރިވުމަށް ޝަރުޠު ފުރިހަމަވާ ދައުލަތެއްގެ ގޮތުގައި ބަލައިގަނެފައިވެއެވެ.
ނަމަވެސް، އެމެރިކާ އިން ގެންދަނީ އިސްރާއީލުގެ ފަރާތުން ފަލަސްތީނާ ދެކޮޅަށް ހުށަހަޅާ ޤަރާރުތަކަށް ތާއީދުކޮށް، ފަލަސްތީން އާ އެއް ކޮޅަށް ހުށަހަޅާ ކޮންމެ ކަމަކަށް ވީޓޯގެ ބާރު ބޭނުންކޮށް، ފަލަސްތީނު އދ. ގެ ފުރިހަމަ މެންބަރެއްގެ ގޮތުގައި ބަލައިގަތުމާ ދެކޮޅު ހަދަމުންނެވެ.
އެމެރިކާ އަކީ ބައިނަލް އަގްވާމީ ދުނިޔޭގައި އިސްރާއީލުގެ ދިފާއުގައި މަސައްކަތް ކުރާ މައިގަނޑު ބާރަކަށް ވުމުގެ އިތުރުން، އިސްރާއީލުގެ ވެރިންނަށް ޣައްޒާގައި ފަލަސްތީނުގެ ނަސްލު ނައްތާލުމަށާއި، މަޖުބޫރުން ގޯތި ގެދޮރުން ނެރުމަށާއި، ކުޑަކުދިން މެރުމާއި، އަދި ފަލަސްތީން ރައްޔިތުންގެ ބިންތައް އަތުލައިގަތުމާއި އެ ބިންތަކުގެ މައްޗަށް ބާރު ހިންގުން ފަދަ އަނިޔާވެރި ޢަމަލުތައް ހިންގުމަށް ވެސް އެންމެ ބޮޑު ހިތްވަރަކަށް ވެފައިވަނީ އެމެރިކާ އެވެ.
