މިނިވަން 60 ގެ ލޯގޯ ފަރުމާ ކޮށްގެން 30،000 ރުފިޔާ ހޯދުމުގެ ފުރުސަތު
3 ޖޫން 2025 | އަންގާރަ 05:50މި އިނާމަށް ވާދަކުރަން ބޭނުންވާ ފަރާތްތަކުން ލޯގޯ ފަރުމާކުރުމަށްފަހު 2025 ޖޫން 15 ވާ އާދިއްތަ ދުވަހު އޮފީސް ބަންދުކުރުމުގެ ކުރިން
ދިވެހިބަހާއި ސަގާފަތާއި ތަރިކައާ ބެހޭ ވުޒާރާ
ދިވެހިރާއްޖޭގެ މިނިވަންކަމަށް 60 އަހަރު ފާހަގަކުރުމަށް މި އަހަރު އާންމުކޮށް ބޭނުންކުރާ ލޯގޯއެއް ފަރުމާ ކުރުމަށް ދިވެހިބަހާއި ސަގާފަތާއި ތަރިކައާ ބެހޭ ވުޒާރާއިން ހުޅުވާލައިފިއެވެ.
އެ ވުޒާރާއިން ބުނީ މިވަން 60 ގެ އެންމެ މޮޅު ލޯގޯ ފަރުމާކުރާ ފަރާތަކަށް -/30،000 ރުފިޔާގެ ފައިސާގެ އިނާމެއް ދިނުމަށް ހަމަޖެހިފައިވާ ކަމަށެވެ. މި އިނާމަށް ވާދަކުރަން ބޭނުންވާ ފަރާތްތަކުން ލޯގޯ ފަރުމާކުރުމަށްފަހު 2025 ޖޫން 15 ވާ އާދިއްތަ ދުވަހު އޮފީސް ބަންދުކުރުމުގެ ކުރިން ހުށައެޅުމަށް އެ ވުޒާރާއިން ވަނީ އަންގާފައެެވެ.
އެ ލޯގޯއިން ރަމްޒުކޮށްދޭން ޖެހޭ ކަންތައްތަކެއް އެ ވުޒާރާއިން ވަނީ ފާހަގަކޮށްފައެވެ.
އެއީ،
- އިސްލާމްދީނާއި ދިވެހިބަހާއި ސަގަފާތާއި ތަރިކަތައް
- ދިވެހިވަންތަކަމާއި ދިވެހި ބިމުގައި ދިވެހި ދައުލަތް މިނިވަންކަމާއެކު ދެމިއޮތްކަން
- ދިވެހި ދައުލަތުގެ އެވޭލާކަމާއި މިނިވަންކަމުގެ 60 އަހަރު، އެގޮތުގައި ދެމިތިބުމަށް ކުރާ އުންމީދުތައް
- މިނިވަންކަމުގެ 60 އަހަރު ހޯދި ކުރިއެރުންތަކާއި އުންމީދުކުރާ ކުރިއެރުންތައް
- ލޯގޯގައި ބޭނުންކުރެވޭ ކުލަތަކަކީ ގައުމީ ކުލަތަކަށް ވުން (އިތުރު ކުލައެއް ބޭނުންކުރާނަމަ، ދިވެހި ކަނޑާއި ރާއްޖޭގެ މާހައުލު ރަމްޒުކޮށްދޭ ނޫކުލަ ބޭނުންކުރުން)
- މުނާސަބަތާ ގުޅޭ އެކި ކަންކަމުގައި، މިސާލަކަށް ބެޖާއި ސްޓިކާގެ ގޮތުގައި ބޭނުންކުރުމަށާއި ބެނާއާއި ޗާޕުކުރާ ލިޔުންތަކާއި ޓީޝާޓު ފަދަ ތަކެތީގައި ބޭނުންކުރަން ފަސޭހަ ފަރުމާއަކަށްވުން
- މީޑިއާގައާއި އެނިމޭޝަނާއި ވީޑިއޯތަކުގައި ބޭނުންކުރެވޭ ލޯގޯއަކަށްވުން
މީގެ އިތުރުން ހުށަހަޅާ ލޯގޯއަށް މާކްސް ދިނުމުގައި ބަލާނެ މިންގަނޑުތަށް އެ ވުޒާރާއިން ވަނީ ހާމަކޮށްފައެވެ. އެގޮތުން، ލޯގޯގެ ކޮލިޓީއާއި ޓެކްނިކަލް ފެންވަރަށް 30 މާކްސް ލިބޭއިރު، އަސްލުވަންތަކަމާއި އުފެއްދުންތެރިކަމުގެ އިތުރުން މަސައްކަތްތެރިކަމަށް ލިބެނީ 20 މާކުހެވެ. އަދި ދިވެހިވަންތަކަމަށް ބަލައި، 20 މާކްސް ދޭއިރު، މިނިވަން 60ގެ ސިފަތައް ރަމްޒުކޮށްދީފައިވާ މިންވަރަށް ދެނީ 30 މާކުހެވެ.
ރާއްޖޭގެ މިނިވަން ކަމަށް 50 އަހަރު ފުރުންވެސް ރާއްޖޭގެ ހުރިހާ ސަރަހައްދެއްގަ ވަރަށް ކުލަގަދަކޮށް ފާހަގަކޮށްފައިވާކަން ފާހަގަކޮށްލެވެއެވެ.
