އެމެރިކާގެ ހުށަހެޅުން ލިބިފައިވާ ކަމަށް އީރާނުން ބުނެފި
1 ޖޫން 2025 | އާދީއްތަ 06:48އެކަމާ ގުޅިގެން އަރާޤްޗީ އޭނާގެ ރަސްމީ އެކްސް އެކައުންޓުގައި ކުރެއްވި ޕޯސްޓެއްގައި ވިދާޅުވެފައި ވަނީ، އީރާންގެ އުސޫލުތަކާއި، ޤައުމީ މަސްލަހަތާއި، އަދި އެ ޤައުމުގެ ރައްޔިތުންގެ ހައްޤުތަކާ އެއް ގޮތްވާ ގޮތުގެ މަތިން އެމެރިކާ އިން ހުށަހަޅާފައިވާ ހުށަހެޅުމަށް އީރާނުން ޖަވާބު ދޭނެ ކަމަށް.
އީރާންގެ ނިއުކްލިއަރ ޕަވާ ޕްލާންޓެއްގައި އެ ޤައުމުގެ ދިދަ
އީރާނާއި އެމެރިކާއާ ދެމެދު ކުރިއަށް ގެންދަމުން އަންނަ ނިއުކްލިއާ މަޝްވަރާތަކުގައި، އެމެރިކާ އިން ހުށަހަޅާ ބައެއް ކަންކަން ލިބިފައިވާ ކަމަށް އީރާނުން ބުނެފި އެވެ.
އީރާންގެ ޚާރިޖީ ވަޒީރު އައްވާސް އަރާޤްޗީ ވިދާޅުވީ، ހޮނިހިރު ދުވަހު އޭނާ އޮމާން އަށް ކުރެއްވި ކުރު ދަތުރުުފުޅުގައި، އޮމާންގެ ޚާރިޖީ ވަޒީރު ވަނީ އެކަންކަން ހިއްސާ ކުރައްވާފައި ކަމަށެވެ. އެއީ އީރާނާއި އެމެރިކާއާ ދެމެދު އެއްބަސްވުމެއް ޤާއިމު ކުރުމަށް ހުށަހަޅާފައިވާ ކަންކަމެވެ.
އެކަމާ ގުޅިގެން އަރާޤްޗީ އޭނާގެ ރަސްމީ އެކްސް އެކައުންޓުގައި ކުރެއްވި ޕޯސްޓެއްގައި ވިދާޅުވެފައި ވަނީ، އީރާންގެ އުސޫލުތަކާއި، ޤައުމީ މަސްލަހަތާއި، އަދި އެ ޤައުމުގެ ރައްޔިތުންގެ ހައްޤުތަކާ އެއް ގޮތްވާ ގޮތުގެ މަތިން އެމެރިކާ އިން ހުށަހަޅާފައިވާ ހުށަހެޅުމަށް އީރާނުން ޖަވާބު ދޭނެ ކަމަށެވެ.
މި ވާހަކަތައް އައިސްފައި މި ވަނީ އީރާނާާއި އެމެރިކާއާ ދެމެދު ނިއުކްލިއާ މަޝްވަރާތައް ކުރިއަށް ގެންދަމުން އަންނަ މުހިންމު ދަނޑިވަޅައެއްގަ އެވެ. އެ މަޝްވަރާތަކުގެ ފަސް ބައްދަލުވުމެއް މިހާތަނަށް ބާއްވާފައިވާއިރު، ދެން އޮތީ ހަ ވަނަ ބުރުގެ ބައްދަލުވުމެވެ. ނަމަވެސް، އެ ބައްދަލުވުން އޮންނާނެ ތާރީޚެއް އަދި ތަނެއް ހާމަކޮށްފައި ނުވެ އެވެ.
އީރާނާއި އެމެރިކާއާ ދެމެދު ކުރިއަށް ގެންދާ މަޝްވަރާތަކުގައި މެދުވެރިއެއްގެ ދައުރު އަދާ ކުރަނީ އޮމާން އިންނެވެ. އެންމެ ފަހުން ފަސް ވަނަ ބުރުގެ ބައްދަލުވުން ބާއްވާފައި ވަނީ އިޓަލީގެ ވެރި ރަށް ރޯމްގަ އެވެ.
ހޮނިހިރު ދުވަހު އީރާންގެ ޚާރިޖީ ވުޒާރާ އިން ވަނީ އިސްރާއީލާ ވަރަށް ބޮޑަށް ފާޑު ވެސް ކިޔައިފަ އެވެ. އެގޮތުން އީރާންގެ ނިއުކްލިއާ ޕްރޮގްރާމާ ގުޅޭ ގޮތުން އދ ގެ ނިއުކްލިއާ ވޮޗްޑޮގްގެ އައު ރިޕޯޓަށް އިސްރާއީލް އިން އިތުބާރު ނުހިފޭ އަދި އޮޅުވާލާފައިވާ މައުލޫމާތު ދީފައިވާ ކަމަށް ވަނީ ބުނެފަ އެވެ.
އީރާނާއި އެމެރިކާއާ ދެމެދު މުހިންމު މަޝްވަރާތަކެއް ހިނގަމުން އަންނަ މި ދަނޑިވަޅުގައި އީރާނަށް އަމާޒުކޮށް ހަމަލާ ދިނުން ހުއްޓާލުމަށް، އެމެރިކާގެ ރައީސް ޑޮނަލްޑް ޓްރަމްޕް ވަނީ އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ އަށް އަންގަވައިފަ އެވެ. ޓްރަމްޕް ވިދާޅުވެފައި ވަނީ، ވިދާޅުވީ މަޝްވަރާތައް ކުރިއަށް ދަނިކޮށް، އީރާނަށް ހަމަލާ ދިނުމަކީ ރަނގަޅު ކަމެއް ނޫން ކަމަށެވެ.
އީރާނާއި އެމެރިކާއާ ދެމެދު ކުރިއަށް ގެންދަމުން އަންނަ ނިއުކްްލިއަރ މަޝްވަރާތަކަށް އިޝާރާތް ކުރައްވައި އެ ދުވަހު ޓްރަމްޕް ވިދާޅުވީ، އެ މަޝްވަރާތައް ކުރިއަށް ދަނީ ރަނގަޅު މިސްރާބެއްގައި ކަމަށް ޤަބޫލު ކުރައްވާ ކަމަށެވެ. އަދި އެ މަޝްވަރާތަކުން އެއްބަސްވުމަކާ ހަމައަށް ވާސިލްވެވިދާނެ ކަމަށް އުންމީދު ކުރައްވާ ކަމަށް ވެސް ޓްރަމްޕް ވިދާޅުވެފައިވެ އެވެ.
އީރާނާއި އެމެރިކާއާ ދެމެދު އެންމެ ފަހުން އެކުލަވާލާފައި އޮތް ނިއުކްލިއާ އެއްބަސްވުމުން އެެމެރިކާ ވަކިވެފައި ވަނީ ޓްރަމްޕްގެ ރިޔާސީ ފުރަތަމަ ދައުރުގެ ތެރޭގައި، 2018 ވަނަ އަހަރު އެވެ. 2015 ވަނަ އަހަރު އެކުލަވާލި އެއްބަސްވުމުން އެމެރިކާ ވަކިވި ފަހުން، މިހާރު ކުރިއަށް ގެންދަމުން އަންނަ މަޝްވަރާތަކަކީ ދެ ޤައުމުގެ ދެ މެދުގައި ކުރިއަށް ގެންދެވޭ ފުރަތަމަ މަޝްވަރާ އެވެ.
