ލޯންޗަކާއި ޓަގެއް ޖެހި ނުރައްކާތެރި އެކްސިޑެންޓެއް ހިނގައިފި
31 މެއި 2025 | ހޮނިހިރު 16:34އެކްސިޑެންޓުގައި ލޯންޗު ދުއްވަން އިން ކައްޕިއަށް އަނިޔާވެފައިވޭ
ލޯންޗަކާއި ޓަގެއް ޖެހި އެކްސިޑެންޓުވުން
އދ. އަތޮޅަށް ދަތުރުކުރި ލޯންޗަކާއި ޓަގު ބޯޓެއް ޖެހި އެކްސިޑެންޓެއް ހިނގައިފިއެވެ.
ފުލުހުން ބުނީ، ހޮނިހިރު ދުވަހު 15:30 ހާއިރު މާލެއިން އދ. އަތޮޅަށް ދަތުރުކުރި ލޯންޗަކާއި މާލެ އެމްޕީއެލް ޖެޓީއަށް ވަންނަން ދިޔަ ޓަގެއް ޖެހި އެކްސިޑެންޓު ވެފައިވާ ކަމަށެވެ.
އަދި އެ އެކްސިޑެންޓުގައި ލޯންޗު ދުއްވަން އިން ކައްޕިއަށް އަނިޔާވެފައިވާއިރު، އޭނާއަށް ހޮސްޕިޓަލުގައި ފަރުވާ ދެމުންދާ ކަމަށް ފުލުހުން ވަނީ ބުނެފައެވެ. ނަމަވެސް ލިބުނު އަނިޔާގެ އެއްވެސް ތަފްސީލެއް ހިއްސާކޮށްފައެއް ނުވެއެވެ. ފުލުހުން ބުނިގޮތުގައި އިތުރު މީހަކަށް އަނިޔާވެފައެއް ނުވެއެވެ.
ފުލުހުން ވަނީ އެކްސިޑެންޓްވި ލޯންޗުގެ ބައެއް ޕޮޓޯތަށް އާންމުކޮށްފައެވެ. އެ ފޮޓޯތަކުން ފެންނަގޮތުގައި ލޯންޗު ދުއްވުމަށް ކައްޕި އިންނަ ދިމާ ބޭރު ވަނީ ވަރަށް ބޮޑަށް ފަޅައިގެން ގޮސްފައެވެ. އަދި ލޯންޗު ތެރޭގައި ބިއްލޫރިތައް ފުނޑު ފުނޑު ވެފައިވާ މަންޒަރު ފެނެއެވެ.
އެކްސިޑެންޓުގައި ޓަގް ބޯޓަށް ލިބުނީ ކޮން ގެއްލުމެއް ކަމެއް ފުލުހުން ހިއްސާކޮށްފައެއް ނުވެއެވެ. ފުލުހުން ބުނީ މި ހާދިސާ އިތުރަށް ތަހުގީގު ކުރަމުންދާ ކަމަށެވެ.
