އައިޖީއެމްއެޗްގައި ރޭގަނޑު އޯ.ޕީ.ޑީ ވަނީ ފެށިފައި، ދެން ޑޮކްޓަރަށް ދައްކާ ކިޔު ކުޑަވާނެ: ރައީސް މުއިއްޒު
31 މެއި 2025 | ހޮނިހިރު 08:09އެނދުގެ ޖާގަ އިތުރު ކުުރުމާއި، މުވައްޒަފުން އިތުރު ކުރުމަށް ދަނީ މަސައްކަތް ކުރަމުން
އައިޖީއެމްއެޗް ލެބޯޓްރީގައި ނަރުހެއް މަސައްކަތް ކުރަނީ --- ފޮޓޯ: ޔޫސުފް ސޮފްވާން
އައިޖީއެމްއެޗްގައި ރޭގަނޑު އޯ.ޕީ.ޑީ. ފެށިފައިވާ ކަމަށާއި، ޑޮކްޓަރަށް ދައްކާ ކިޔު ކުޑަވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މުއިއްޒު މިހެން ވިދާޅުވީ "ރައްޔިތުންނާއެކު" ޕޮޑްކާސްޓް އެޕިސޯޑް 7 ގައި ވާހަކަފުޅު ދައްކަވަމުންނެވެ.
ރައީސް މުއިއްޒު ވިދާޅުވީ މާލޭ ގްރޫޕް އޮފް ހޮސްޕިޓަލްސްގެ ތެރޭގައި ހުރި އައިޖީއެމްއެޗްއަކީ އެންމެ ގިނަ ދުވަސްވީ ހޮސްޕިޓަލް ކަމަށާއި، ޚިދުމަތް ފުޅާކުރަންޖެހޭ ކަމަށެވެ.
އެގޮތުން އެނދުގެ ޖާގަ އިތުރު ކުުރުމާއި، މުވައްޒަފުން އިތުރު ކުރަމުންދާ ކަމަށް އެމަނިކުފާނު ވިދާޅުވިއެވެ.
ރައީސް މުއިއްޒު ވިދާޅުވީ މާލޭ ގްރޫޕް އޮފް ހޮސްޕިޓަލްސް މި ކިޔާ ދަރުމަވަންތަ، އައިޖީއެމްއެޗް، ވިލިމާލެ އަދި ހުޅުމާލެ ހޮސްޕިޓަލް އަދި ތެލަސީމިއާ ސެންޓަރ، މި ހުރިހާ ތަނެއް ހިމެނޭހެން ގުޅިލާމެހިފައިވާ ނެޓްވަރކެއްގެ ތެރެއިން މި ހޮސްޕިޓަލްތައް ހިންގުމުގެ ނިޒާމު ގާއިމްކުރެވިފައިވާ ކަމަށެވެ. މިއީ ކުރިން މި އެއްތަން އަނެއްތަނާ ވާދަކުރާ ތަންތަންކަން ފާހަގަކުރައްވައި ރައީސް މުއިއްޒު ވިދާޅުވީ މިހާރު މިއީ އެއް މެނޭޖްމަންޓެއްގެ ތެރެއިން ވަރަށް އޯގަނައިޒްކޮށް ހިންގާ ތަންތަން ކަމަށެވެ.
ހަމަ ތިޔަ ވިދާޅުވިގޮތަށް، ރަށްރަށުން ވަރަށް ގިނަ މީހުން އައިސް ޚިދުމަތް ހޯދާ ތަނެއް. އަޅުގަނޑުމެން މިހާރު މި ހުޅުވީ 75 އެނދުގެ ޖާގަ އިތުރުކުރެވިގެން، މި ހުޅުވިގެންދިޔައީ. އެއީ، ވަރަށްބޮޑު ކުރިއެރުމެއް ލިބިގެންދާނެ ކަމެއް. ހަމަ މުޅި އައިޖީއެމްއެޗްގެ ސިއްހީ ޚިދުމަތް ދިނުން ހަމަ ވަރަށް ބޮޑަށް މަތިވެގެންދާނެ ކަމަކަށްވޭ. އަދި އޭގެއިތުރަށް، މުވައްޒަފުންވެސް ވަރަށްބޮޑު ތަނުން އެބަ އިތުރުކުރޭ. މިހާރު ފުރުޞަތު ހުޅުވާލައި ގާތްގަނޑަކަށް ނިމިފައި އެވަނީ 218 މަގާމަށް މުވައްޒަފުން ނެގުން. އޭގައި ގިނަ ޢަދަދަކަށް ހިމެނިގެންދަނީ ނަރުހުން. މިއީ ހަމަ ހުރިހާ ކަމެއް ހަމަޖެހިފައި އޮތް ކަމެއް. އެހެންވީމާ، މުވައްޒަފުން އިތުރުކުރެވި، ވަސީލަތް އިތުރުކުރެވި، އިމާރާތުގެ ޖާގައިގެ ގޮތުން އައި.ޖީ.އެމް.އެޗް. ވަރަށްބޮޑު ތަނުން މި ފުޅާކުރެވުނީ.ރައީސުލްޖުމްހޫރިއްޔާ ޑރ. މުހައްމަދު މުއިއްޒު
ރައީސް މުއިއްޒު ވިދާޅުވީ ސިއްހީ ދާއިރާ، މި އަހަރާއި މި އަންނަ އަހަރުގެ ތެރޭގައި ވަރަށްބޮޑު ތަނުން ރަނގަޅުވެގެންދާނެ ކަމަށެވެ. އަދި ވިދާޅުވީ އައިޖީއެމްއެޗްގައި ރޭގަނޑު އޯ.ޕީ.ޑީ. މިހާރު ފެށިފައިވާ ކަމަށާއި، އޭގެ ސަބަބުން ވަރަށް ބޮޑަށް ކިޔު ކުޑަވާނެ ކަމަށެވެ.
އެހީތެރިކަން ދޭނެ. އާދެ، އެއްތަނުން އަނެއްތަނަށް ސްޕެޝަލިސްޓުން ބަދަލުކުރެވޭނެ. ސުޕަރ ސްޕެޝަލިސްޓުން ބަދަލުކުރެވޭނެ. މިހާރު ނައިޓް އޯ.ޕީ.ޑީ.، ރޭގަނޑު އޯ.ޕީ.ޑީ. މިހާރު ފެށިފައި އެވަނީ އައި.ޖީ.އެމް.އެޗް.ގައި. އޭގެ ސަބަބުން ވަރަށް ބޮޑަށް ކިޔު ކުޑަވެގެންދާނެ. އެންމެ ގިނައިން ބަލިތަކަށް ފަރުވާ ހޯދަން ކިޔުގައި ޖެހިފައި ތިބި މީހުންގެ ކިޔު ކުޑަކޮށްލުން އިރާދަކުރެއްވިއްޔާ މީގެތެރެއިން ހާސިލުވާނެ. އިމްޕޭޝަންޓުންނަށް ފަސޭހައިން ބޭސް ލިބޭނެގޮތް މިހާރު އެވަނީ ފެށިފައި. މިވެސް ވަރަށް ބޮޑަށް ރައްޔިތުން، ޕޭޝަންޓުން އެދެމުންދާ އަދި ހޮސްޕިޓަލުންވެސް އެދެމުންދާ ކަމެއް.ރައީސުލްޖުމްހޫރިއްޔާ ޑރ. މުހައްމަދު މުއިއްޒު
ރައީސް މުއިއްޒު ވިދާޅުވީ މާލެ ސަރަހައްދުގެ އިތުރުން ރާއްޖޭގެ ހުރިހާ ސަރަހައްދެއްގައި ވެސް ހޮސްޕިޓަލްތައް ފެންވަރު ރަނގަޅުކުރުމުގެ މަސައްކަތް ކުރަމުންދާ ކަމަށެވެ.
އެގޮތުން ކުޅުދުއްފުށި، ތިނަދޫ، އައްޑޫސިޓީ އަދި އުނގޫފާރު. ޓަރޝަރީ ހޮސްޕިޓަލްތައް ގާއިމްކުރާނެ ކަމަށް އެމަނިކުފާނު ވިދާޅުވިއެވެ.
ރައީސް މުއިއްޒު މިމޭރުމުން ވާހަކަފުޅު ދެއްކެވި ނަމަވެސް މިއިން އެއްވެސް ރަށެއްގައި ޓަރޝަރީ ހޮސްޕިޓަލްތައް ގާއިމްކުރުމުގެ އެއްވެސް އަމަލީ މަސައްކަތެއް ފެށިފައެއްނުވެއެވެ. އަދި ހުޅުމާލެ ހޮސްޕިޓަލް ޓަރޝަރީ ފެންވަރަށް ބަދަލުކޮށް އަލުން ހުޅުވި ނަމަވެސް އެކަށީގެންވާ ފަރުވާ އެ ހޮސްޕިޓަލުން ނުލިބޭކަމުގެ ޝަކުވާ ބޮޑެވެ. މީގެ އިތުރުން މީގެ ކުރިން ލިބުނު ގިނަ ސިއްހީ ޚިދުމަތްތަކާއި، އާސަންދައިން ލިބޭ ބޭސް ނުލިބޭ ކަމުގެ ޝަކުވާ ވެސް ވަނީ ބޮޑުވެފައެވެ. މިސަރުކާރުގައި ސިއްހީ އިހުމާލުގެ ގިނަ މައްސަލަތައް ފެންމަތިވަމުންދާއިރު، އަތޮޅުތެރޭގެ ރަށްތަކުގައި ސިއްހީ މަރުކަޒުތަކުގައި ބޭނުންކުރާ އެމްބިއުލާންސް ހަލާކުވެ، ސްޓްރެޗަރގައި ބަލި މީހުން އުފުލާ ވީޑިއޯއާއި، ފޮޓޯ ދާދި ފަހުން ވަނީ ސޯޝަލް މީޑިއާގައި ވެސް އާއްމުވެގެން ގޮސްފައެވެ.
