ސައުދީ ޚާރިޖީ ވަޒީރުގެ ތާރީޚީ ދަތުރުފުޅެއް ވެސްޓްް ބޭންކަށް
މި ހަފުތާގެ ފަހު ކޮޅު ސައުދީގެ ޚާރިޖީ ވަޒީރު ވެސްޓް ބޭންކަށް ވަޑައިގަންނަވާއިރު، އޭނާ އަކީ 1967 ވަނަ އަހަރުގެ ފަހުން ވެސްޓް ބޭންކަަށް ވަޑައިގަންނަވާ ސައުދީގެ އެންމެ އިސް އޮފިޝަލުންގެ ތެރެއިން އެކަކު.
ސައުދީ އަރަބިއްޔާގެ ފޮރިން މިނިސްޓަރު ޕްރިންސް ފައިސަލް ބިން ފަރުހާން
ސައުދީ އަރަބިއްޔާގެ ޚާރިޖީ ވަޒީރު ޕްރިންސް ފައިސަލް ބިން ފަރުޙާން، ވެސްޓް ބޭންކަށް ވަޑައިގަންނަވަން ނިންމަވައިފި އެވެ.
މި ހަފުތާގެ ފަހު ކޮޅު ސައުދީގެ ޚާރިޖީ ވަޒީރު ވެސްޓް ބޭންކަށް ވަޑައިގަންނަވާއިރު، އޭނާ އަކީ 1967 ވަނަ އަހަރުގެ ފަހުން ވެސްޓް ބޭންކަަށް ވަޑައިގަންނަވާ ސައުދީގެ އެންމެ އިސް އޮފިޝަލުންގެ ތެރެއިން އެކަކެވެ.
ސައުދީ އަރަބިއްޔާގައި ހުންނަވާ ފަލަސްޠީނުގެ ސަފީރު މާޒެން ޣުނައިމް ވިދާޅުވި ގޮތުގައި، ސައުދީގެ ޚާރިޖީ ވަޒީރު ވަޑައިގަންނަވަނީ އެއް ދުވަހުގެ ދަތުރުފުޅެއްގަ އެވެ. އެ ދަތުރުފުޅުގައި ސައުދީ ވަފުދުގެ އެންމެ އިސް ބޭފުޅަކަށް ހުންނަވާނީ ވެސް ޚާރިޖީ ވަޒީރު އެވެ.
މި ދަތުރުފުޅުގައި ސައުދީގެ ޚާރިޖީ ވަޒީރު، ފަލަސްޠީނުގެ ރައީސް މަޙުބޫދު އައްބާސް އަދި އެހެނިހެން އިސް ބޭފުޅުންނާ ވެސް ބައްދަލު ކުރައްވާ ގޮތަށް ވަނީ ހަމަޖެހިފަ އެވެ. އަދި މި ދަތުރުފުޅުގައި މިޞްރު އަދި ޖޯޑަންގެ ޚާރިޖީ ވަޒީރު އަދި އެހެން ޤައުމުތަކުގެ އޮފިޝަލުން ބައިވެރިވާނެ ކަމަށް ވެސް ޣުނައިމް ވަނީ ވިދާޅުވެފަ އެވެ.
ސައުދީގެ އަލް އިޚްބާރިއްޔާ އަށް ދެއްވި ބަޔާނެއްގައި ޣުނައިމް ވިދާޅުވީ، 1967 ވަނަ އަހަރުގެ ބޯޑަރު ތަކުގެ މައްޗަށް ބިނާކޮށް އީސްޓް ޖެރޫސަލް ފަލަސްޠީނުގެ ވެރިކަން ކުރާ ރަށް ކަމުގައި ހަމަޖައްސައިގެން ދެ ދައުލަތުގެ ޙައްލެއް ހޯދުމަށް މަޝްވަރާ ކުރެވޭނެ ކަމަށެވެ.
ޖޫން މަހު ނިއުޔޯކް ގައި ހުންނަ އދ ގެ މައި މަރުކަޒު ގައި ސައޫދީ އަރަބިއްޔާ އަދި ފްރާންސް އިން ބާއްވާ ސަމިޓެއްގައި ފްރާންސް އިން ފަލަސްޠީނު ދައުލަތެއްގެ ގޮތުގައި ބަލައި ގަންނާނެ ކަމަށް ވަނީ އިއުލާން ކޮށްފަ އެވެ.
ސައޫދީ ޚާރިޖީ ވަޒީރުގެ ސީނިއަރ އެޑްވައިޒަރު މަނާލް ރަޟްވާން ވިދާޅުވި ގޮތުގައި، ސަރަހައްދީ ސުލްހަ ފެށޭނީ ފަލަސްޠީނު ދައުލަތެއްގެ ގޮތުގައި ބަލައިގަތުމުންނެވެ. އެއީ ހަމައެކަނި ސިމްބޮލިކް އަމަލެއްގެ ގޮތުގައި ނޫން ކަމަށާއި، އިސްތިރާޖީ ބޭނުމެއްގެ ގޮތުގައި ކުރަން ޖެހޭ ކަމެއް ކަމަށް ވެސް އޭނާ ވިދާޅުވި އެވެ.
ޖޫން މަހުގެ ސަމިޓާ ގުޅޭ ގޮތުން މި މަހުގެ ކުރީ ކޮޅު ރަޟްވާން ވިދާޅުވީ، މަދަނީ ރައްޔިތުން ދަނީ ވަގުތުން ހުއްޓަން ޖެހޭ ހަނގުރާމައެއްގެ އަގު ދައްކަމުން ކަމަށެވެ.
ވެސްޓް ބޭންކު ގައި ކަންކަން ގޯސްވަމުންދާ މިންވަރު ވެސް ވަރަށް ކަންބޮޑުވާ ހިސާބަކަށް ގޮސްފައިވާ ކަމަށް ވެސް އޭނާ ވިދާޅުވި އެވެ. އަދި ކޮންމެ ދުވަހަކު އުންމީދު ގެއްލެމުންދާ ކަމަށް ވެސް ވިދާޅުވި އެވެ.
މިއީ ހަމައެކަނި ހަނގުރާމަ ނިންމުމުގެ ވާހަކަ ދައްކަން ޖެހޭ ވަގުތެއް ނޫން ކަމަށާއި، އަށްޑިހަ އަހަރާ ގާތަށް ދިގު ދެމިގެން ދިޔަ މައްސަލައެއް ނިންމުމުގެ ވާހަކަ ދައްކަން ޖެހޭ ވަގުތު ކަމަށް ވެސް ވަނީ ވިދާޅުވެފަ އެވެ.
