ބޮޑެތި ކުށްތަކެއްގެ ރިކޯޑު އޮތް މީހަކު 67،000 ރުފިޔާގެ އަގުބޮޑު ގަޑިއެއް ވަގަށް ނެގި ކަމުގެ ތުހުމަތުގައި އަނެއްކާ ވެސް ހައްޔަރުކޮށްފި
ސިމާދުގެ ބަންދަށް 15 ދުވަސް ވަނީ ޖަހާފައި
ކްރިމިނަލް ކޯޓު
ބޮޑެތި ކުށްތަކެއްގެ ރިކޯޑު އޮތް މީހަކު 67،000 ރުފިޔާގެ އަގުބޮޑު ގަޑިއެއް ވަގަށް ނެގި ކަމުގެ ތުހުމަތުގައި އަނެއްކާ ވެސް މީހަކު ހައްޔަރުކޮށްފިއެވެ.
ވައްކަމުގެ ތުހުމަތުގައި ހައްޔަރުކޮށްފައިވަނީ ސ. ހުޅުދޫ، އަބުލަޢީގެ 47 އަހަރުގެ މުހައްމަދު ސިމާދެވެ. އޭނާ ހައްޔަރުކޮށްފައިވަނީ މިދިޔަ އަންގާރަ ދުވަހެވެ. އަދި ސިމާދުގެ ބަންދަށް 15 ދުވަސް ވަނީ ޖަހާފައެވެ.
ބަންދުގައި ބެހެއްޓުމަށް އަމުރުކުރި ސަބަބުގެ ގޮތުގައި ބުނެފައިވަނީ، ފިހާރައަކުން 67،000 ރުފިޔާގެ އަގުހުރި އޮމެގާ ބްރޭންޑްގެ ގަޑިއެއް ވަގަށް ނެގިކަމަށް ތުހުމަތުކުރެވޭ ކަމަށާއި، ގަޑި ވަގަށް ނަގާފައިވަނީ 3 މީހުން ގުޅިގެން ރާވައިގެން ކަމަށެވެ.
ލިބިފައިވާ ސީސީޓީވީ ފުޓޭޖް ސްނެޕްޝޮޓްތަކާއި، ބަޔާންތަކުން އެނގޭގޮތުގައި އޭނާ ވަނީ އަންހެން ހެދުން އަޅައިގެން (ސިފަ ނޭނގޭ ގޮތަށް މޫނު ބުރުގާ) އަޅައިގެން ފިހާރަތެރެއަށް ވަދެ ގަޑި ނަގާފައިވާ ކަމަށާއި، މިހާތަނަށް އައިރު ގަޑި އަދި ހޯދިފައިނުވާ ކަމަށް ފުލުހުން ބުނެފައިވެއެވެ. ނަމަވެސް ބެލެވޭ ގޮތުގައި ގަޑި ވަނީ އެހެން މީހަކަށް ވިއްކާފައިވާ ކަމަށް ފުލުހުން ބުނެއެވެ.
މީގެ އިތުރުން ބަންދުގައި ބަހައްޓަންޖެހޭ ހާލަތް އޮތް ކަމަށް ދެކޭ ސަބަބުގެ ގޮތުގައި ބުނެފައިވަނީ މުޖުތަމައުގެ ސަލާމަތާއި ރައްކާތެރިކަމަށްޓަކައި ޝަރީއަތް ކުރުމާބެހޭ ޖިނާއީ އިޖުރާއަތުގެ ގަވާއިދުގެ 13 ވަނަ މާއްދާގެ (ނ) ގެ (1) ވަނަ ނުކުތާ ފާއިތުވެދިޔަ އަހަރެއްގާ ދުވަސްތެރޭގައި ޖިނާއީ ގިނަ ހައްޔަރު/ ބަންދު ރިކޯޑު ހިމެނޭ ކަމަށެވެ. މީގެ ތެރޭގައި މަސްތުވާތަކެތި ވިއްކުން، ގަތުން، އަދި ބޭނުންކުރުން، ކައުންޓަފީސް ފައިސާ ގެންގުޅުން، ސައިކަލު ވަގަށްނެގުން، ހަތިޔާރު ބޭނުންކޮށްގެން ފޭރުން، ފިހާރަތަކުން ވައްކަން ކުރުން ހިމެނޭ ކަމަށެވެ.
މި މައްސަލަ ފުލުހުން ގެންދަނީ އިތުރަށް ތަހުގީގު ކުރަމުންނެވެ.
