އީރާނަށް އަމާޒުކޮށް އިސްރާއީލް އިން ދެމުން އަންނަ ހަމަލާތައް ހުއްޓާލުމަށް، އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ އަށް ދަންނަވާފައި ވާނެ ކަމަށް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ނަތަންޔާހޫ އަށް، ޓްރަމްޕް މިހެން ދަންނަވާފައި ވަނީ އީރާނާއި އެމެރިކާއާ ދެމެދު ނިއުކްލިއާ އެއްބަސްވުމާ ގުޅޭ މަޝްވަރާތައް ކުރެވެމުން އަންނަ ދަނޑިވަޅެއްގަ އެވެ. ޓްރަމްޕް ވިދާޅުވީ އެ މަޝްވަރާތައް ކުރިއަށް ދަނިކޮށް، އީރާނަށް ހަމަލާ ދިނުމަކީ ރަނގަޅު ކަމެއް ނޫން ކަމަށެވެ.

އީރާނާއި އެމެރިކާއާ ދެމެދު ކުރިއަށް ގެންދަމުން އަންނަ ނިއުކްްލިއާ މަޝްވަރާތަކަށް އިޝާރާތް ކުރައްވައި ޓްރަމްޕް ވިދާޅުވީ، އެ މަޝްވަރާތައް ކުރިއަށް ދަނީ ރަނގަޅު މިސްރާބެއްގައި ކަމަށެވެ. އަދި އެ މަޝްވަރާތަކުން އެއްބަސްވުމަކާ ހަމައަށް ވާސިލްވެވިދާނެ ކަމަށް އުންމީދު ކުރައްވާ ކަމަށް ވެސް ޓްރަމްޕް ވަނީ ވިދާޅުވެފަ އެެެވެ.

މިއަހަރުގެ އޭޕްރީލް މަހުން ފެށިގެން އީރާނާއި އެމެރިކާއާ ދެމެދު އަންނަނީ ނިއުކްލިއާ އެއްބަސްވުމާ ގުޅޭ މަޝްވަރާތައް ކުރިއަށް ގެންދަމުންނެވެ. އޮމާން އިން މެދުވެރިއެއްގެ ދައުރު އަދާ ކުރަމުން އަންނަ މި މަޝްވަރާތަކުގައި މިހާތަނަށް ވަނީ ފަސް ބައްދަލުވުމެއް ބާއްވައިފަ އެވެ. އެންމެ ފަހުން، ފަސް ވަނަ ބުރުގެ މަޝްވަރާ ބައްދަލުވުން ކުރިއަށް ގެންދިޔައީ އިޓަލީގެ ވެރި ރަށް ރޯމްގަ އެވެ.

އީރާނާއި އެމެރިކާއާ ދެމެދު އެންމެ ފަހުން އެކުލަވާލާފައި އޮތް ނިއުކްލިއާ އެއްބަސްވުމުން އެެމެރިކާ ވަކިވެފައި ވަނީ ޓްރަމްޕްގެ ރިޔާސީ ފުރަތަމަ ދައުރުގެ ތެރޭގައި، 2018 ވަނަ އަހަރު އެވެ. 2015 ވަނަ އަހަރު އެކުލަވާލި އެއްބަސްވުމުން އެމެރިކާ ވަކިވި ފަހުން، މިހާރު ކުރިއަށް ގެންދަމުން އަންނަ މަޝްވަރާތަކަކީ ދެ ޤައުމުގެ ދެ މެދުގައި ކުރިއަށް ގެންދެވޭ ފުރަތަމަ މަޝްވަރާ އެވެ.

ބުދަ ދުވަހު އީރާނުން ބުނެފައި ވަނީ އެމެރިކާއާ އެކު އެއްބަސްވުމަކާ ހަމައަށް ވާސިލުވެވިއްޖެ ނަމަ، އދ ގެ ނިއުކްލިއާ ވޮޗްޑޮގް އަދި އެމެރިކާ އަށް ނިއުކްލިއާ ފެސިޓީތައް ބަލައި ފާާސް ކުރުމުގެ ފުރުސަތު ދެވިދާނެ ކަމަށެވެ. އެހެން ނަމަވެސް، އީރާންގެ ނިއުކްލިއާ ތަންތަނަށް އިސްރާއީލް އިން ހަމަލާ ދިނުމަށް ތައްޔާރުވަމުން ދާ ކަމަށް މީޑިއާ ތަކުގައި ވަނީ ރިޕޯޓު ކޮށްފަ އެވެ.  

އީރާނާ ދެކޮޅަށް ހަނގުރާމަވެރި ފިޔަވަޅުތަކެއް އަލައި، ހަމަލާތަކެއް ދޭނެ ކަމުގެ އިންޒާރު އިސްރާއީލް ވަނީ މީގެ ކުރިންް ވެސް ދީފަ އެވެ.