ޢީދާއި ގުޅިގެން ބަންދުވާނީ ކަލަންޑަރުގައިވާ ދުވަސްތައް އެކަނި
28 މެއި 2025 | ބުދަ 08:21ކަލަންޑަރުގައި ވާގޮތަށް އަންނަ މަހުގެ 10ވާ އަންގާރަ ދުވަހު ސަރުކާރު އޮފީސްތައް ހުޅުވޭނެ
ކަމަދޫގައި ބޭއްވި އީދު ހަރަކާތްތަކުގެ ތެރެއިން
މިފަހަރު އަޞްހާ ޢީދާއި ގުޅިގެން ކަލަންޑާރުގައިވާ ދުވަސްތަށް ފިޔަވާ އިތުރު ދުވަހެއް ބަންދު ނުކުރާނެކަމަށް ސަރުކާރުން ބުނެފިއެވެ.
ރައީސް އޮފީހުގެ ތަރުޖަމާނު ހީނާ ވަލީދު އެކްސްގައި ކުރެއްވި ޕޯސްޓެއްގައި ވިދާޅުވީ، މިއަހަރުގެ ހައްޖު ދުވަސް ދިމާވަނީ، 5 ޖޫން ވާ ބުރާސްފަތި ދުވަސް ކަމުގައި ސަޢޫދިއަރަބިއްޔާއިން ކަނޑައަޅުއްވާފައިވާތީ ޙައްޖު ދުވަހާއި އަޞްހާ ޢީދާ ގުޅިގެން ބަންދުވާނީ، މިހާރުވެސް ކަލަންޑަރުގައި ބަންދު ކަމަށް ކަނޑައަޅާފައިވާ ދުވަސްތައް ކަމަށެވެ.
އެހެންކަމުން، ކަލަންޑަރުގައިވާ ގޮތަށް އަންނަ މަހުގެ 10ވާ އަންގާރަ ދުވަހު ސަރުކާރު އޮފީސްތައް ހުޅުވޭނެއެވެ.
ހައްޖު ދުވަހާއި ގުޅިގެން ޖޫން މަހުގެ 5 ވަނަ ދުވަހުން ފެށިގެން 9ވަނަ ދުވަހަށް ސަރުކާރު ބަންދުވާނެއެވެ. އެއީ، ފަސް ދުވަހުގެ ބަންދެކެވެ. އާންމު ގޮތެއްގައި ޢީދާ ގުޅިގެން ބަންދުވާ ދުވަސްތައް ހަފްތާގެ މެދުން ނިމޭނަމަ ހަފުތާގެ ބާކީ ދުވަސްތައް ސަރުކާރުން ބަންދު ކުރެއެވެ. އަދި މިއަހަރަކީ މިފަހުން އެންމެ ކުރު ޢީދު ޗުއްޓީ ލިބޭ އަހަރެވެ.
