ޣައްޒާގައި އިސްރާއީލް އިން ހިންގަމުން އަންނަ ހަނގުރާމަ ހުއްޓާލުމަށް އެމެރިކާ އިން ހުށަހަޅާފައިވާ ހުށަހެޅުން ހަމާސް އިން ޤަބޫލު ކޮށްފައިވާ ކަމަށާއި، ނަަމަވެސް އެ ހުށަހެޅުމާ އިސްރާއީލް އިން ދެކޮޅު ހަދާފައިވާ ކަމަށް މީޑިއާ ރިޕޯޓުތައް ބުނެފި އެވެ.

ފަލަޞްޠީނުގެ އިސް އޮފިޝަލަކާ ހަވާލާދީ މީޑިއާ ތަކުގައި ބުނެފައި ވަނީ، އެމެރިކާގެ ރައީސް ޑޮނަލްޑް ޓްރަމްޕްގެ ޚާއްސަ މަންދޫބު ސްޓީވް ވިކްޓޮފްގެ ފަރާތުން ހުށަހަޅާފައި އޮތް ހަނގުރާމަ ހުއްޓާލުމުގެ ހުށަހެޅުން އަދި ރަހީނުން ދޫކޮށްލުމުގެ ހުށަހެޅުން ހަމާސް އިން ޤަބޫލު ކޮށްފައިވާ ކަމަށެވެ.

ނަމަވެސް، އެއީ އެމެރިކާގެ ހުށަހެޅުމެއް ނޫން ކަމަށް ބުނެ އިސްރާއީލް އިން ވަނީ އެ ހުށަހެޅުން ބަލައި ގަންނަން ދެކޮޅު ހަދާފައި ކަމަށް ވެސް އޮފިޝަލާ ހަވާލާދީ ބުނެފައި އެވެ. 

ހަމާސްއާ ގާތް ގުޅުމެއް އޮންނަ ފަލަޞްޠީނުގެ އޮފިޝަލާ ހަވާލާދީ ބުނެފައިވާ ގޮތުގައި، އެ ހުށަހެޅުމުގެ ދަށުން ހަމާސްގެ ބެލުމުގެ ދަށުގައި ތިބި އިސްރާއީލްގެ 10 ރަހީނުން ދޫކޮށްލާނެ އެވެ. އަދި 70 ދުވަހުގެ މުއްދަތަކަށް ހަނގުރާމަ މެދު ވެސް ކަނޑާލާނެ އެވެ.

މީގެ އިތުރުން ޣައްޒާގައި ހުރި އިސްރާއީލްގެ އަސްކަރީ ބާރުތަކާއި، ސިފައިން އަނބުރާ ގެންދިޔުމަށް ވެސް އެ ހުށަހެޅުމުގައި ބުނެފައިވާ ކަމަށް ވަނީ ރިޕޯޓުކޮށްފަ އެވެ. 

އެހެން ނަމަވެސް، ހަމާސް އިން އެމެރިކާގެ ހުށަހެޅުން ޤަބޫލު ކޮށްފައިވާ ކަމަށް ދެކެވޭ ވާހަކަތައް ވިކްޓޮފް ވަނީ ދޮގު ކުރައްވާ ފައެވެ. އޭނާ މީޑިއާ އަކަށް ވިދާޅުވެފައި ވަނީ، މިހާރު ފެނިފައި ވަނީ ޤަބޫލު ކުރަން ވެސް ދަތި ކަމެއް ކަމަށާއި، މިހާރު މަޝްވަރާ ކުރެވެމުން ދަނީ އޭނާ ހުށަހަޅާފައި އޮތް ހުށަހެޅުމާ އެއްގޮތް ހުށަހެޅުމެއް ނޫން ކަމަށެވެ. 

ދާދި ފަހުން އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ އާންމު ކޮށްފައިވާ މެސެޖެއްގައި އޭނާ ބުނެފައި ވަނީ، ހަމާސްއާ ދެކޮޅަށް ކުރަމުން އަންނަ ހަނގުރާމަ އާއި އަދި ރަހީނުން ދޫކޮށްލުމާ ގުޅޭ ކުރިއެރުންތަކެއް "މިއަދު ނުވަތަ މާދަމާ" އިއުލާން ކުރެވިގެން ދާނެ ކަމަށެވެ. 

ޖަނަވަރީ މަހުގެ ތެރޭގައި ހަނގުރާމަ ހުއްޓާލުމަށް ވީ އެއްބަސްވުމާ ޚިލާފަށް، މާޗު މަހުގެ ތެރޭގައި އިސްރާއީލް އިން ވަނީ އަނެއްކާ ވެސް ޣައްޒާ އަށް ހަމަލާތައް ދޭން ފަށައިފަ އެވެ. އޭގެ ފަހުން މިހާތަނަށް ޣައްޒާ އިން ވަނީ 3700 އަށް ވުރެ ގިނަ ރައްޔިތުން ޝަހީދުވެފައި ކަމަށް އިދާރާ ތަކުން ވަނީ ހާމަކޮށްފަ އެވެ.