ގާނޫނީ ގޮތުންވެސް، ޝަރުއީ ގޮތުންވެސް ރައީސް ޔާމީން އަޒުލުކުރުން ވާޖިބު!

ރައީސް އަބްދުﷲ ޔާމީން އަޒުލު ކުރުމަކީ ޝަރުއީ ގޮތުންވެސް ގާނޫނީ ގޮތުންވެސް ވާޖިބުވެފައިވާ ކަމެއް ކަަމަށް ކުރީގެ އިސްލާމިކް މިނިސްޓަރ ޑރ އަބްދުލް މަޖީިދު އަބްދުލް ބާރީ ވިދާޅުވެއްޖެ އެވެ.

ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަދައްކަވަމުން ޑރ މަޖީދު ވިދާޅުވީ، އިސްލާމް ދީނަކީ ނަސޭހަތުގެ ދީން ކަމަށްވާ އިރު އާންމުންނަށް ނަސޭހަތް ދިނުމާއި ވެރިންނަށް ނަސޭހަތް ދިނުންވެސް ހިމެނޭ ކަމަށެވެ. އަދި ފަރުދީގޮތުން މަސްއޫލިއްތު އަދާކުރުމުގައި ރައްޔިތުންގެ މަންދޫބުންގެ ގޮތުގައި މަޖިލީސް މެންބަރުން ހަަރަކާތްތެރިވެ އިސްކޮށް މަސައްކަތް ކުރަންޖެހޭނެ ކަމަށް އޭނާ ވިދާޅުވި އެވެ.

" ރައްޔިތުންގެ މަޖިލީހުގެ މެންބަރުންގެ ޒިންމާއެއް އެއީ، ވެރިޔަކަށް ހުންނަ މީހަކު ގާނޫނާއި ގަވައިދާ ހިލާފަށް އަމަލުކުރަމުންދާތީ އެބޭފުޅާ އަޒުލުކުރުން. އިސްލާމީ އިލްމުވެރިންގެ އަމަލުތަކުންވެސް އެނގޭ ގޮތުގައި މިހާތަލަށް ދިއާއިމަ ރައީސް އަޒުލުކުރުން." ޑރ މަޖީދު ވިދާޅުވި އެވެ.

ވެރިޔާ އަޒުލު ކުރުމުގެ މަސައްކަތް މަޖިލީހުން ކުރަންޖެހޭކަން ފާހަގަކުރައްވާ މަޖީދު ވިދާޅުވީ، މިކަން ކުރުމަށް ރައްޔިތުންގެ މަޖިލީހުގެ މެމްބަރުންނަށް ހިތްވަރުދޭންޖެހޭނީ އާންމު ރައްޔިތުން ކަމަށެވެ.

" އަޒުލުކުރަން ހަމަޖެހޭނެ، ގާނޫނީ ގޮތުންވެސް، ޝަރުއީ ގޮތުންވެސް އެކަންކުރަންޖެހޭނެ." މަޖީދު ވިދާޅުވި އެވެ.

ކީރިތި ރަސޫލާގެ ސުންނަތުން މިސާލު ޖައްސަވާ މަޖީދު ވިދާޅުވީ، އަނިޔާވެރިއަކަށް އެއީ އަނިޔާވެރިއެކޭ ބުނުމަށް ފަސް ޖެހޭ ކަމުގައިވާ ނަމަ، އެމީހަކަށް ﷲގެ މަދަދެއް ނޯންނާނެ ކަމަށް ރަސޫލާ ހަދީޘް ކުރައްވާފައިވާ ކަމަށެވެ. އަދި އެފަދަ ބައެއް ﷲ އާއި އެކު ނުވާ ކަމަށް ރަސޫލާ ހަދީޡްކުރެއްވި ކަަމަށް މަޖީދު ވިދާޅުވި އެވެ.

މަޖީދު ވިދާޅުވީ ކިތަންމެ ވަރަކަށް ތައުބާވެ، ހެޔޮއަމަލުތައް ކުރި ނަމަވެސް، މީހެއްގެ ހައްގަކަށް އަރައިގަނެފައިވާ ފާފައެއް ފުހެވިގެންދާނީ، އެހައްގަކަށް އަރައިގަނެވުނު މީހަކު މައާފު ކުރުމުން ކަމަށެވެ. އެގޮތުން ހައްޖަށް ދިޔައަސް ރޯދަ ހިފިޔަސް، ދަމު ނަމާދު ކުރި ނަމަވެސް އެކަން ﷲ ފުއްސަވާ ނުދެއްވާނެ ކަަމަށް މަޖީދު ވިދާޅުވި އެވެ.

އިސްލާމީ ޝަރީއަތުގައި ވެރިން އަޒުލުކުރުން ގާނޫނީ ހަމަތަކުގެ މަތިން ކުރުމަށް ހުރަސްނާޅާ ކަމަށާއި ވެރިޔަކަށް ހުންނަ މީހަކު ހުވަޔާ ހިލާފަށް ކަންކަން ކުރަން ފަށައިފި ކަމުގައިވާ ނަމަ ވެރިންނަށް ނަސޭހަތް ދިނުމަކީ އޮންނަކަމެއް ކަމަށެވެ. އަދި ވެރިޔަކަށް ހުންނަ މީހަކު ނަސޭހަތް ގަބޫލު ނުކޮށް އިންސާފުން ބޭރުން ކަންކަން ކުރަމުންދާ ނަމަ، ރާއްޖޭގެ ގާނޫނު އަސާސީގެ 100 ވަނަ މާއްދާގެ ދަށުން ވެރިޔަކަށް ހުންނަ މީހަކާ މެދު ފިޔަވަޅު އެޅުން ރައްޔިތުންގެ މަޖިލީހަށް ލިބިގެންވާ ޑރ މަޖީދު ވިދާޅުވި އެވެ.އަދި އެކަމަކީ ބަޣާވާތަށް ނުވާނެ ކަމަށް އޭނާ ވިދާޅުވި އެވެ.